Welcome Niini nga Isyu

Posible Ba nga Makatukod og Zion Karon?

Litrato sa maayong kabubut-on sa mga tagsulat

Gikan sa mga tawo nga mihulma sa siyudad sa Enoch ug gikan sa mga Nephite human sa pagbisita ni Kristo, atong makat-onan ang kabahin sa mga komunidad nga naghigugma ug nag-amuma sa usag usa diha sa usa ka maanindot ug balaanong paagi. Isip magtiayon, kami kanunay nga maghunahuna, ang sama ba nga komunidad anaa pa karon?

Sa milabay nga pipila ka tuig, kami napanalanginan og mga oportunidad nga matagamtaman ang pagpakigdait uban sa mga African nga mga kagiw nga mibalhin og puyo sa Spokane, Washington, USA. Samtang kami nakamugna og mga relasyon uban niining nindot nga mga indibidwal ug mga pamilya, kami nahimong mga benepisyaryo sa daghan kaayong gugma ug kaaghop. Kami mahinamon alang kaninyo nga makadungog sa pipila sa ilang istorya (tan-awa sa pahina 8). Kami nakat-on og daghan kaayo gikan sa ilang hugot nga pagtuo ug gugma alang sa Manluluwas, si Jesukristo. Ang ilang mga kasinatian, kabilin, ug determinasyon sa pagsunod Kaniya nakapalambo og maayo sa among mga kinabuhi ug nakapalig-on sa among ward ug sa among tibuok komunidad.

Ang among African nga mga higala nahimong dako nga mga ehemplo sa pagkadisipulo. Sama sa gitudlo ni Elder Dale G. Renlund niini nga isyu, si Jesus wala lang mohangyo sa Iyang mga disipulo sa Bag-ong Tugon sa pagsunod Kaniya apan usab midapit sa tanang umaabot nga mga disipulo, lakip ang matag usa kanato, sa pagsunod Kaniya. Isip mga disipulo “kita kinahanglan nga mahunahunaong mopahiangay sa atong kabubut-on ngadto sa kabubut-on sa atong Amahan sa Langit” (tan-awa sa pahina 4). Sa pagbuhat sa ingon, kita makakat-on sa paghigugma sama sa Iyang paghigugma ug moserbisyo sama sa gusto Niya nga kita moserbisyo.

Oo, posible kini nga makamugna og usa ka komunidad sa katawhan nga naghigugma ug nag-amuma sa usag usa diha sa usa ka maanindot ug balaanong paagi. Amo kining nakita nga nahitabo.

Matinuoron,

Alice ug Philip Huber