Nahisubay sa Kabubut-on sa Ginoo

Ni Elder Alfred Kyungu

Sa Seventy

Kita mahimong mas Kristohanon kon kita mosunod sa Iyang ehemplo sa pagbuhat sa kabubut-on sa Iyang Amahan.

ang Manluluwas ug ang Iyang mga sumusunod nga naglakaw

Pipila sa labing importante nga mga desisyon nga atong himoon sa kinabuhi mao ang mga desisyon nga makaapekto sa uban. Sagad kini nga mahitabo sa higayon nga kita modesisyon sa pagdawat og mga calling sa pagserbisyo sa Simbahan.

Pananglitan, sa dihang gitawag ko nga mahimong presidente sa misyon, ang akong asawa, si Lucie, gitawag isip akong kompanyon. Gusto namo nga magkahiusa kami samtang magserbisyo. Nasayod kami nga kana nagpasabot nga importante alang kanamo isip magtiayon nga mahisubay kami sa kabubut-on sa Ginoo. Dugang pa, ang among mga anak maapektohan sa among calling kay mokuyog man sila namo. Mga batan-on pa sila, nag-edad og 14, 11, ug 7. Ang pagbiya sa balay sulod sa tulo ka tuig dako kaayo nga pag-adjust sa ilang kinabuhi, busa ang pagka-nahisubay sa kabubut-on sa Ginoo importante usab alang nila.

Kami nakahukom nga isip usa ka pamilya gusto kami nga manag-ubang moserbisyo sa Ginoo. Sama sa giingon sa akong asawa, “Kitang tanan gusto nga mopaingon sa sama nga padulngan.” Ug isip usa ka pamilya kami napanalanginan samtang manag-ubang nagserbisyo didto sa Democratic Republic of the Congo Mbuji-Mayi Mission.

Ang manag-uban nga pagserbisyo nakapalig-on sa among panaghiusa ug kapasidad sa pag-atubang sa mga hagit nga may kalabotan sa bag-ong kultura, diha sa bag-ong siyudad, nga may bag-ong lokal nga pinulongan. Nakatabang kini namo nga mahimong mas daling maka-adjust samtang nagtubag kami sa panginahanglan sa pagtambong sa mga seminar sa pagpangulo ug mga zone conference ug sa gihapon motubag sa mga panginahanglan sa among mga anak. Ang among pamilya nga mga pag-ampo ug pagtuon sa kasulatan nahimong mas makahuloganon, ug ang among mga pagpamatuod mas milig-on samtang nagtan-aw kami sa mga kinabig, mga miyembro, ug mga misyonaryo nga nahigugma ug mihangop sa ebanghelyo.

Pagbuhat sa Kabubut-on sa Amahan

Nganong importante kaayo nga kita magtinguha nga masayod ug mobuhat sa kabubut-on sa atong Langitnong Amahan?

Dinhi niini, sama diha sa tanang butang, si Ginoong Jesukristo nagpakita og ehemplo. Miingon Siya:

“Kay nanaog ako gikan sa langit dili aron pagbuhat sa akong kaugalingong kabubut-on kondili aron pagbuhat sa kabubut-on sa nagpadala kanako” (Juan 6:38).
“Dili ang tanan nga magtawag kanakog ‘Ginoo, Ginoo,’ makasulod sa gingharian sa langit kondili kadto lamang nagtuman sa kabubut-on sa akong Amahan nga atua sa langit” (Mateo 7:21).
“Ang buot magbuhat sa gisugo sa Dios mahibalo kon ang akong gitudlo gikan ba sa Dios o nagsulti ba lamang ako sa kaugalingon kong pagbuot” (Juan 7:17).

Sa laing pagkasulti:

Kita mahimong mas mahisama ni Kristo samtang magsunod kita sa Iyang ehemplo sa pagbuhat sa kabubut-on sa Iyang Amahan.
Kita kinahanglang magmasulundon aron mahimong takos.
Samtang magsunod kita sa ehemplo ni Kristo sa pagtinguha sa pagbuhat sa kabubut-on sa Dios, kita makakat-on pinaagi sa atong pagkamasulondon nga ang mga baroganan sa ebanghelyo tinuod.

Pinaagi sa pagsunod sa Manluluwas, kita mas mahisama Kaniya. Ug kon kita mas mahisama Kaniya, kita mas mahisama sa Amahan. Busa kita makakat-on sa pagbuhat sa kabubut-on sa Amahan pinaagi sa pagkamasulundon ngadto sa mga pagtulon-an sa Anak.

Pagtukod diha sa usa ka Bato

Si Jesukristo miingon usab nga kadtong naminaw ug nagbuhat sa Iyang mga panultihon nahisama sa usa ka “maalamong tawo nga nagtukod sa iyang balay diha sa bato:

“Sa dihang mibundak ang ulan ug mibaha ang mga suba ug ang hangin mihapak ug mikusokuso niadtong balaya, wala kini matumba kay natukod man diha sa bato” (Mateo 7:24–25).

Sa susamang paagi, si Helaman mitudlo sa iyang mga anak nga lalaki: “Hinumdomi nga kini diha sa lig-on nga sukaranan sa atong Manunubos kinsa mao si Kristo, ang anak sa Dios, nga kamo kinahanglan gayod motukod sa inyong tukuranan; nga sa panahon nga ang yawa mopadala sa iyang mapintas nga mga hangin, oo, ang iyang mga panâ diha sa alimpulos, oo, sa diha nga ang tanan niya nga ulan nga yelo ug ang iyang mapintas nga unos mohampak diha kaninyo, kini walay gahom ibabaw kaninyo sa pagbitad kaninyo ngadto sa bung-aw sa pagkauyamot ug walay kataposan nga pagkaalaot, tungod sa lig-on nga sukaranan diin kamo natukod nga mao ang tinuod nga tukoranan, usa ka tukoranan diin kon ang mga tawo magtukod dili sila mapukan” (Helaman 5:12).

Kini nagpasabot nga kon ang atong kabubut-on nahisubay sa kabubut-on sa Dios ug mosunod sa Iyang kabubut-on, hatagan kita og kalig-on nga atong kinahanglanon aron mabuntog ang atong kaugalingong mga unos sa kinabuhi. Ang atong hugot nga pagtuo molahutay.

Isip usa ka pamilya nga manag-ubang nagserbisyo sa natad sa misyon, kami nakasaksi sa kamatuoran—alang sa among kaugalingon ug alang sa uban—nga kita makaila ni Jesukristo pinaagi sa pagbuhat sa Iyang kabubut-on. Nakita namo unsay nahitabo sa kinabuhi niadtong naminaw sa Iyang tingog, nagsunod sa Iyang mga sugo, ug midawat sa Iyang kabubut-on diha sa ilang kinabuhi. Nadawat namo ang mga panalangin samtang nagtuman kami sa among kaugalingong mga calling, ug nakita namo ang espirituhanon nga paglambo sa mga misyonaryo ug sa lokal nga mga miyembro sa Simbahan, lakip na ang bag-ong mga kinabig, kinsa midawat og mga calling, mipaambit sa Iyang ebanghelyo, ug nangalagad sa usag usa. Nakat-onan namo nga ang pagbuhat sa Iyang kabubut-on yano ra. Nagpasabot kini sa pagbuhat sa unsay kinahanglan natong buhaton aron sa pagtabang sa Dios nga matuman ang Iyang buhat ug Iyang himaya nga mao “ang pagpahinabo sa pagka-imortal ug sa kinabuhi nga dayon sa tawo” (Moises 1:39).

Nakita namo nga, sama sa katawhan ni Hari Benjamin, kadtong mipahisubay sa ilang kaugalingon ngadto sa kabubut-on sa Ginoo “mauyunon sa pagsulod ngadto sa usa ka pakigsaad uban sa atong Dios sa pagbuhat sa iyang kabubut-on, ug magmasulundon sa iyang mga sugo diha sa tanan nga mga butang nga siya mosugo kanamo” (Mosiah 5:5).

Pagpaambit sa Iyang Saad

Sa dihang among gidawat ang tawag nga gihatag ni Presidente Russell M. Nelson nga moserbisyo isip mga lider sa misyon, ang akong asawa ug ako nasayod nga kami nagbuhat sa gusto sa Ginoo nga ipabuhat namo. Ug nalipay kami nga ang among mga anak miapil namo niana nga pagserbisyo. Gibiyaan namo ang tanan, apan nasayod kami nga adunay maanindot nga mga panalangin nga anaa sa unahan. Kami mahinamon nga mopaambit sa saad sa Manluluwas: “Kay buot sa akong Amahan nga ang tanan nga makakita sa Anak ug motuo kaniya makabaton sa kinabuhing walay kataposan ug banhawon ko sila sa kataposang adlaw” (Juan 6:40).

Pag-ila sa Iyang Kabubut-on

Ania ang pipila ka butang nga akong isugyot aron matabangan kita nga mahisubay sa kabubut-on sa Dios:

Mangita. Ang mga kasulatan makatabang nato nga masayod sa kabubut-on sa atong Langitnong Amahan. “Pangita, ug kamo makakaplag” (Mateo 7:7).
Maghinulsol. Ang paghinulsol makahimo nato nga mobati og kakomportable sa atong relasyon sa Langitnong Amahan. Kana mogiya nato ngadto sa paghinulsol mopahisubay nato sa kabubut-on sa Dios.
Mag-ampo. Kon bation nato ang kalinaw sa atong kasingkasing samtang kita mag-ampo, kita makasiguro nga kita anaa sa dalan sa Langitnong Amahan.
Motuman. Ang buhi nga mga propeta ug mga apostoles nagtambag nato kon unsaon nga mas mapaduol ngadto ni Kristo, nga mao usab ang makapahimo nato nga mas mapaduol sa Langitnong Amahan.
Mosunod sa Espiritu. Ang Espiritu Santo mopadayag “sa kamatuoran sa tanan nga mga butang” (Moroni 10:5). Siya mohimo kanatong angayan nga makadawat og personal nga pagpadayag.
Mopaambit. Kon bation nato nga giaghat sa pagpaambit sa ebanghelyo ug mibuhat niini, kita nagbuhat sa kabubut-on sa Langitnong Amahan (tan-awa sa Mateo 28:19–20).