“Gimarkahan Niya ang Agianan ug Migiya sa Dalan,” Liahona, Peb. 2023.
Gimarkahan Niya ang Agianan ug Migiya sa Dalan
Kon kita mosunod ni Jesukristo, mobuhat sa unsay Iyang gihimo, kita mahimong masaligon nga makabalik sa atong langitnong panimalay.
Si Kristo nga Nagtawag ni Pedro ug ni Andres, ni Harry Anderson
Pipila ka tuig ang milabay, ang akong pamilya ug ako nakadesisyon nga mag-hike sa usa ka agianan sa bukid sa Iceland aron makita ang usa ka sikat nga busay. Wala pa kami sukad nakaadto niini nga bukid. Dili kami sigurado kabahin sa agianan, ug dili kami sinati nga mga hiker.
Among gibantayan ang uban nga nagsugod padulong sa agianan ug misunod. Sa wala madugay, sila dili na makita, ug mao usab ang agianan. Among gitan-aw og maayo ug nakabantay og gipundok nga mga bato, gitawag og mga timailhan, sa regular nga sal-ang nagtimaan sa agianan padulong sa busay. Kami nahimong masaligon nga kon makaplagan namo ang mga timailhan, kini mogiya namo ngadto sa busay.
Mga pat-ak sa yuta duol sa agianan adunay puti, humok nga gapason nga mga sagbot,1 nga mitubo sa tubigon nga kapatagan. Ang pagtunob ngadto sa mga gapason nga sagbot kanunay nga magbilin namo og lapokon, puno sa tubig nga sapatos. Among nahibaloan nga ang gapason nga mga sagbot nagtimaan og agianan nga dili mi ganahan nga mosunod.
Ang agianan dili sayon. Usahay kini tungason, ug naluya kami. Apan kami nagpadayon, nagbantay og maayo sa mga timailhan ug naglikay sa gapason nga sagbot. Sa kataposan ang among mga paningkamot gigantihan. Nakaabot mi sa nindot kaayo nga busay ug nalingaw sa talan-awon gikan sa ibabaw sa bukid ug sa kabugnaw sa tubig.
Samtang kami midulhog sa bukid, among nakita ang mga kakuyaw nga wala namo makit-i sa una. Ang mga timailhan nakatabang namo nga malikayan ang lawom nga mga lim-aw sa tubig ug ang tungason nga mga pangpang. Kami mapasalamaton nga kadtong mga timailhan luwas nga migiya namo padulong sa among tumong.
Ang atong panaw sa kinabuhi sama niini nga hike sa ting-init. Kita gusto nga mobalik ngadto sa atong langitnong panimalay, apan ang agianan mahimong lisod sa pagtadlas. Samtang kita magtuon sa kinabuhi ug mga pagtulon-an ni Jesukristo, kita makakat-on kon giunsa niya pagpakabuhi sa mortalidad, nagbutang og makahuloganong mga timailhan alang kanato sa pagsunod. Kon kita mosunod niadto nga mga timailhan, mobuhat sa unsay gihimo ni Jesus, kita masaligon nga makabalik ug makaabot sa atong destinasyon.
Timailhan 1: Hibaloi Kon Kinsa Ka
Si Jesukristo nakahibalo kon kinsa Siya (tan-awa sa Lucas 2:49). Bisan kon kita wala makahibalo unsa ang Iyang gibati samtang Siya gibunyagan ni Juan, ang balaanong pasalig tingali makapahupay sa dihang ang Iyang Amahan namulong ngadto Kaniya “gikan sa langit, nag-ingon, Ikaw akong Anak nga Pinalangga; kanimo may kalipay ako” (Marcos 1:11).
Uban sa pagsalig sa Iyang pagkatawo, si Jesukristo nakahimo sa pagdeklarar ngadto ni Pedro ug Andres, “Ako mao siya kinsa gikasulat sa mga propeta” (Hubad ni Joseph Smith, Mateo 4:18 [diha sa Hubad ni Joseph Smith Apendiks, Mateo 4:18]). Ug ngadto sa babaye nga taga-Samaria, Siya mideklarar, “Ako nga nakigsulti kanimo mao siya [kana nga Mesiyas, nga gitawag og Kristo]” (tan-awa sa Juan 4:25–26).
Ang pagkahibalo kon kinsa kita usa ka timailhan nga importante kaayo. Ang atong labing importanteng ilhanan mao ang pagkahimong mga anak sa Dios, dili igsapayan ang unsa pa nga gipili nato nga pag-ila sa atong kaugalingon. Kon kita mapakyas sa pagkakita niini nga timailhan, kita mahimong masaag sa agianan ug maadto sa gapason nga sagbot.
Timailhan 2: Hibaloi ang Kabubut-on sa Langitnong Amahan
Si Jesukristo nagtinguha sa pagkahibalo sa kabubut-on sa Iyang Amahan. Human sa Iyang bunyag, “Si Jesus gigiyahan sa Espiritu, ngadto sa kamingawan, aron makig-uban sa Dios.
“Ug human siya nagpuasa sulod sa kap-atan ka adlaw ug kap-atan ka gabii ug nakig-uban sa Dios, ug tapos niini gibati niya ang kagutom ug gibiyaan aron tintalon sa yawa” (Hubad ni Joseph Smith, Mateo 4:1–2 [tan-awa usab sa Mateo 4:1–2]).
Nganong si Jesus miadto sa kamingawan aron makig-istorya sa Dios? Makataronganon ang pagtuo nga Iya kining gibuhat aron makahibalo sa kabubut-on sa Iyang Amahan, aron nga wala na ang pagduda kon unsa ang mga gusto sa Dios alang Kaniya. Sama usab, ang makahibalo kita sa kabubut-on sa Dios usa ka timailhan. Kon kita wala makahibalo unsa ang kabubut-on sa Dios alang kanato, kita masaag ngadto sa gapason nga sagbot.
Atong mahibaloan ang kabubut-on sa Dios alang kanato diha sa mga kasulatan, gikan sa mga pulong sa buhi nga mga propeta, ug pinaagi sa mga paghunghong sa Espiritu Santo. Apan kita kinahanglan nga magtinguha nga makauban ug makig-istorya sa Dios diha sa pag-ampo, sama sa gibuhat ni Jesus. Ang pagkat-on sa atong tinuod nga relasyon sa Dios, nga Siya mao ang atong Amahan ug kita Iyang mga anak, makahimo sa pag-ampo nga natural (tan-awa sa Mateo 7:7–11). Ang mga kalisod sa pag-ampo nagsugod gikan sa pagkalimot niini nga relasyon.2
Timailhan 3: Ipahiangay ang Atong Kabubut-on sa Kabubut-on sa Langitnong Amahan
Si Jesukristo mipahiangay sa Iyang kabubut-on sa kabubut-on sa Iyang Amahan. Makausa, samtang nagbiyahe, si Jesus milingkod sa atabay ni Jacob nga naa sa gawas sa lungsod sa Sicar sa Samaria samtang ang Iyang mga disipulo miadto sa lungsod aron sa pagpalit og pagkaon. Usa ka Samarianhon nga babaye ang miabot aron sa pagkalos og tubig, ug si Jesus mihangyo kaniya sa pagkalos alang kaniya. Siya nakurat sa hangyo, kay naggikan kini sa usa ka Judeo. Sa misunod nga diskusyon, siya nakahibalo nga si Jesus mao ang gisaad nga Mesiyas. Siya mibalik sa lungsod, nagpahayag nga iyang nahimamat ang Kristo (tan-awa sa Juan 4:3–29).
Sa dihang nahibalik ang mga disipulo, ilang giawhag si Jesus nga mokaon sa pagkaon nga ilang gipalit (tan-awa sa Juan 4:31) ug “nangahibulong” nga Siya nakigsulti sa usa ka Samarianhon nga babaye (tan-awa sa Juan 4:27). Ang Manluluwas mitubag, “Ang akong pagkaon mao ang pagbuhat sa kabubut-on sa nagpadala kanako” (John 4:34). Ang pagkaon ni Jesus—ang Iyang katuyoan—mao ang pagbuhat sa kabubut-on sa Amahan ug pagtuman sa buluhaton sa Amahan. Siya miingon, “Kay ako nanaog gikan sa langit, dili sa pagbuhat sa akong kaugalingong kabubut-on, kon dili sa kabubut-on sa nagpadala kanako” (Juan 6:38). Si Jesus mitugot nga ang Iyang kabubut-on “matuhop sa kabubut-on sa Amahan” (Mosiah 15:7), mipahiangay sa Iyang kabubut-on sa kabubut-on sa Dios. Kini lain nga timailhan nga gibilin ni Jesus kanato.
Kita kinahanglan nga mopahiangay sa atong kabubut-on ngadto sa kabubut-on sa atong Amahan sa Langit. Ang pag-ampo usa sa mga paagi nga ato kining mahimo. “Ang katuyoan sa pag-ampo dili sa pag-usab sa kabubut-on sa Dios” apan sa pagtabang nato nga makat-on ug modawat sa Iyang kabubut-on.3
Timailhan 4: Mohimo ug Motuman sa mga Pakigsaad uban sa Dios
Si Jesukristo gibunyagan “aron sa pagtuman sa tanan nga pagkamatarong” (2 Nephi 31:5). Siya miingon ni Nicodemo, “Gawas kon ang tawo igaanak sa tubig ug sa Espiritu, dili siya makasulod sa gingharian sa Dios” (Juan 3:5). Si Jesus miingon sa Iyang umaabot nga mga disipulo, “Sumunod kamo kanako” (Mateo 4:19).
Ato kining gibuhat pinaagi sa pagpakita og hugot nga pagtuo diha ni Jesukristo, paghinulsol, pagpabunyag diha sa Iyang ngalan, pagdawat sa Espiritu Santo, ug pagpadayon sa paghimo ug pagtuman sa mga pakigsaad uban sa Dios. Kita misaad sa pagtuman sa mga sugo ni Kristo, nga gihatag alang sa atong kaayohan. Ang matag pakigsaad usa ka timailhan subay sa dalan sa pakigsaad nga mopadulong ngadto ni Kristo.
Sa among hike sa ting-init, kami adunay kagawasan sa pagpili og lahi nga dalan padulong sa tumoy sa bukid, apan ang usa ka lahi nga agianan tingali dili unta, ug may kalagmitan nga dili gayod, mopadulong ngadto sa busay. Mahimong malangay mi tungod kay malubong mi sa lapok, mapakgang tungod sa delikado nga mga pangpang, o dili mopadayon tungod sa kakapoy. Ang pagpabilin sa agianan mihatag sa labing direkta ug sigurado nga rota ngadto sa among destinasyon.
Sa kinabuhi, kita dili makamugna og atong kaugalingon nga agianan ug molaom sa gisaad nga mga resulta sa Dios (tan-awa sa Mateo 7:24–27). Gawasnon kita sa pagpili, apan kita dili makapili sa mga sangpotanan sa dili pagsunod sa gipadayag nga dalan. Kita dili madagma ngadto sa pangpang ug “makadesisyon” nga dili matagak.
Timailhan 5: Lahutay sa Kataposan
Si Jesukristo gusto nga “motuman sa buluhaton Niya [Amahan]” (Juan 4:34). Diha sa krus sa kataposan, human si Jesus nakahuman sa “buluhaton nga” gihatag sa Dios Niya (Juan 17:4), Siya miingon, “Nahuman na” (Juan 19:30). Ang paghuman sa atong buluhaton usa ka timailhan nga mahinungdanon aron makaabot sa atong gusto nga destinasyon. Si Jesukristo nag-ingon, “Dili ang tanang motawag kanakog, Ginoo, Ginoo, makasulod sa gingharian sa langit kondili kadto lamang nagtuman sa kabubut-on sa akong Amahan nga atua sa langit” (Mateo 7:21).
Alang niadto nga napakyas sa paghimo, ang Manluluwas moingon, “Wala ako makaila kaninyo” (sa Mateo 7:23). Kon kita wala makasabot unsa ang gihuman sa Manluluwas, kita moresulta nga anaay nag-umog, lapokon nga sapatos tungod kay wala man gayod kita makaila Kaniya ug wala gayod makaapil Niya sa Iyang buluhaton.
Pinaagi sa pagkaila kon si kinsa Siya, ang pagkahibalo ug pagpahiangay sa Iyang kabubut-on uban sa Iyang Amahan, paghimo ug pagtuman sa mga pakigsaad uban sa Dios, ug paglahutay hangtod sa kahangtoran, si Jesukristo “mimarka sa agianan ug migiya sa dalan”4 kon unsaon nato pagbalik ngadto sa atong langitnong panimalay. Ang atong tahas mao ang pagsunod niadto nga mga timailhan. Mao nga, “Igo bang mosunod lang ta Niya” ning kinabuhia, apan himoon nato kini kon kita mahimo nga “manununod”5 aron sa pagdawat sa tanan nga anaa sa Langitnong Amahan.