Mga Tingog sa mga Santos sa Ulahing mga Adlaw

Bahin sa Yellow nga Trak-trak ug mga Diyot sa Biyuda

Ni Nathan Garlick, Texas, USA

Ang pagdonar sa akong anak nga lalaki sa iyang bililhon nga kabtangan nakatudlo nako bahin sa bili sa akong kaugalingong kontribusyon ngadto sa Manluluwas.

Litrato sa anak sa tagsulat didto sa monumento sa Okinawa sa maayong kabubut-on sa tagsulat

Nagtutok ko sa daghang linya sa itom nga marmol nga mga bato nga nagbarog diha sa makapanglimbawot nga kahilom taliwala sa matahom nga mga tanaman sa Okinawa Peace Memorial Park sa Itoman, Okinawa, Japan. Nakulit ang sobra sa 200,000 ka ngalan, kini nga mga bato ang handomanan niadtong nawad-an sa ilang kinabuhi atol sa Gubat sa Okinawa panahon sa Ikaduhang Gubat sa Kalibotan.

Naglakaw paingon sa parkinganan human sa among pagbisita, ang akong asawa ug ako nakamatikod nga ang among gamayng anak wala na maggunit sa iyang paboritong yellow nga trak-trak. Sa dihang gipangutana namo siya kon asa kini, gidala niya kami ngadto sa dakong monumento. Iyang gitarong og butang ang iyang trak-trak dapit sa hugpong sa mga bulak nga gidonar sa ubang mga bisita. Uban sa malipayong mga mata ug dakong pahiyom, ang among anak nga lalaki mipakita namo sa iyang kontribusyon ngadto sa memorial.

Sa pagdrayb pauli sa balay, namalandong kami sa iyang dili hinakog nga serbisyo. Nakahibalo ba siya sa espesyal nga diwa niana nga lugar ug mibati nga napugos sa paghatag sa iyang labing bililhon nga kabtangan? Unsay bili sa usa ka plastik nga trak-trak nga madugang ngadto sa pasidungog ug paghandom niadtong nawad-an sa ilang kinabuhi didto?

Ang akong hunahuna nabalhin ngadto sa sakripisyo sa pag-ula sa Manluluwas. Diha sa susamang matahom nga tanaman, Siya misakripisyo sa Iyang kinabuhi aron kita makalingkawas gikan sa sala ug kamatayon ug makabalik ngadto sa atong Langitnong Amahan. Unsay pwede nakong ihatag sa Manluluwas o sa akong mga kaigsoonan nga igong makapakita sa akong pagpasalamat? Unsay bili sa akong mga kontribusyon kon itandi sa Iyang sakripisyo?

Nianang gabhiona, nagbasa ko sa Ebanghelyo ni Marcos mahitungod sa usa ka babaye nga mihatag sa iyang duha ka diyot samtang ang mga adunahan nga naglibot niya mihatag og daghan. Ang pulong sa Manluluwas midulot sa akong kasingkasing:

“Kining kabos nga babayeng biyuda nakahulog og labaw pa kay sa tanan kanila nga nanagpanghulog ngadto sa panudlanan:

“… Kini siya gikan sa iyang kapit-os mihatag sa tanan nga diha kaniya” (Marcos 12:43–44).

Ako nagtuo nga ang Ginoo dili mohatag og pagtagad mahitungod sa unsay atong ihatag ug mas mohatag og pagtagad mahitungod sa atong mga tinguha ug sinseridad. Daghan sa akong pwedeng ihatag daw dili kaayo mahinungdanon kon itandi ngadto sa sama katahom sa monumento nga mga kontribusyon sa uban. Apan “ang tan-awon sa Ginoo mao ang kasingkasing” (1 Samuel 16:7), busa ang usa ka yano, kinasingkasing nga pagpahayag sa gugma, pasalamat, o pagserbisyo dako og kahulogan kon kini naghimaya ni Jesukristo ug sa Iyang matubsanong sakripisyo.

Sama sa yellow nga trak-trak ug sa mga diyot sa biyuda.