Mga Tingog sa mga Santos sa Ulahing mga Adlaw

Wala Mahigot nga Liston sa Sapatos ug ang Gugma sa Manluluwas

Ni Jennifer Estes, Nevada, USA

Samtang ako wala nay pasensiya nga nagluhod aron sa paghigot og lain pa nga paresan sa sapatos, ang Ginoo nagtudlo nako og mapainubsanon nga leksiyon kabahin sa Iyang gugma alang kanato.

Sa daghang katuigan, ako nagtrabaho isip usa ka magtutudlo sa special education alang sa mga bata nga adunay mga edad tali sa lima ug otso. Ang akong mga estudyante nanlimbasog sa daghan nga mga kakulangan—gikan sa mga sakit sa utok ug autism ngadto sa mga kalisod sa pagkat-on.

Daghan sa akong mga estudyante kulang sa mga abilidad sa paglihok ug dili makahigot sa ilang kaugalingong mga sapatos. Ako makadayeg sa mga ginikanan nga mopalit og sapatos sa ilang anak nga dunay Velcro nga mga strap, apan magbagutbot ko kabahin sa mga ginikanan nga mopalit og sapatos nga adunay liston alang sa ilang mga anak.

Paghulagway pinaagi ni Enya Todd; litrato sa maayong kabubut-on sa tagsulat

Ang pagkaadunay maayong pagkahigot nga sapatos usa ka isyu sa kahilwasan alang sa mga bata. Mao nga, daghang higayon matag adlaw, makit-an ko nga nagluhod ug naghigot sa sapatos sa akong mga estudyante. Atol sa adlaw nga ting-eskwela, kini makahurot sa oras ug kahasol.

Bag-ohay lang, samtang ako walay pasensiya nga nagluhod diha sa playground aron sa paghigot og lain na usab nga paresan sa sapatos, usa ka nindot nga hunahuna ang misantop sa akong utok. Akong nahulagway ang Manluluwas nga nagluhod atubangan sa Iyang mga disipulo aron sa pagtanyag og maaghop nga pagserbisyo pinaagi sa pag-amuma sa ilang tiil. Dayon ang mga pulong sa Manluluwas misulod sa akong hunahuna: “Sa pagkatinuod, magaingon ako kaninyo, nga maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako” (Mateo 25:37–40).

Akong gibati ang gugma sa Manluluwas alang sa gamayng bata nga akong giludhan aron serbisyohan. Ako usab nga gibati ang gugma sa Ginoo alang kanako. Akong gibati nga nakita ug gidayeg Niya alang sa walay kakapoy nga mga oras nga akong gigugol matag semana sa pagpaningkamot nga moserbisyo sa Iyang gagmay, labing daling mabuntog nga mga bata.

Kining tam-is nga kasinatian naghatag kanako sa gikinahanglan kaayo nga kalinaw, kalig-on, ug kasiguradohan nga ako anaa kon asa ako dapat nga naa, nagbuhat sa unsay akong dapat nga gibuhat. Ako mapasalamaton sa Ginoo ug sa Iyang malumo nga kalooy diha sa akong kinabuhi. Ug karon ako mapasalamaton kaayo alang sa inadlaw-adlaw nga mga oportunidad sa pagluhod ug paghigot sa sapatos.