Alang sa mga Ginikanan

Pagtukod diha sa mga Pagtulon-an ni Jesukristo

Minahal nga mga Ginikanan,

Ang kinabuhi mahagiton, bisan ngadto sa mga matinud-anon. Apan kamo makagamit sa mga artikulo niini nga isyu aron sa pagtudlo sa inyong kabataan nga ang mahangtoron nga kalipay mahimong maangkon nato kon kita motukod diha sa mga pagtulon-an ni Jesukristo.

Mga Panaghisgotan sa Ebanghelyo

Pagsunod sa Espirituhanong “Mga Timailhan”

Diha sa artikulo ni Elder Renlund diha sa pahina 4, unsa ang pipila sa mga pangmarka sa agianan nga gihatag sa Ginoo aron matabangan kita nga makaabot sa atong walay kataposang destinasyon? Hisgoti kauban sa inyong pamilya ang mga paagi nga kamo nagsunod niini nga mga pangmarka sa agianan.

Usa ka Maabi-abihong Komunidad sa mga Santos

Kita adunay balaang tawag sa pagpundok sa Israel ug motabang sa tanang anak sa Dios nga mobati sa Iyang gugma alang kanila. I-summarize ang istorya diha sa pahina 8 kabahin sa usa ka ward nga mitabang sa daghang mga mikagiw. Kinsa kaha ang matabangan sa imong pamilya?

Tabang diha sa Wala Dahoma nga mga Paagi

Ang Manluluwas dili kanunay nga motabang nato sa paagi nga atong gilaoman. Basaha ang artikulo diha sa pahina 14 kabahin sa lain-laing paagi nga Iyang giluwas ang Iyang mga disipulo gikan sa mga unos. Unsa ang pipila sa milagro nga gihimo sa Manluluwas alang sa imong pamilya, ug aduna bay bisan unsa niini nga miabot sa wala dahoma nga mga paagi?

Mahangtoron nga Kalinaw ug Pagsalig

Basaha ang artikulo ni Elder Kyungu diha sa pahina 40 kabahin sa kamahinungdanon sa pagkat-on sa kabubut-on sa Ginoo ug masaligon nga modawat niini. Isip usa ka pamilya, hisgoti unsa ang buot ipasabot sa paghatag sa imong kabubut-on ngadto sa Dios. Unsa ang mabuhat sa Dios sa atong kinabuhi kon kita mobuhat sa unsay Iyang gipangayo kanato?

Kalingawan sa Pamilya sa Dali, Sunod Kanako

Napanalanginan pinaagi sa Kabulahanan

Diha sa Mateo 5, ang Manluluwas nagtudlo sa Iyang mga disipulo og usa ka mas taas nga balaod nga puy-an aron sila mahimong sama Kaniya.

1. Basaha ang mga kabulahanan diha sa Mateo 5:1–12. Hisgoti ang kabahin sa matag kinaiya ug ang saad nga kauban niini.

2. Isulat ang matag ngalan sa tawo diha sa usa ka gilain nga piraso sa papel.

3. Hatagi ang matag tawo og papel, siguroa nga wala nila makuha ang papel nga naa nakasulat ang ilang kaugalingong ngalan.

4. Padrowinga og larawan ang tanan sa usa ka higayon nga ang tawo nga naa sa ilang papel nag-ehemplo sa usa sa mga kabulahanan. Pagsulat og kapahayag [sentence] kabahin niini. Pananglitan, “Si Hannah usa ka tigpasiugda sa kalinaw tungod kay siya nakigbahin sa iyang igsoong babaye.”

5. Pangitaa ang panalangin nga may kalabotan niana nga kabulahanan ug isulat kini sa ubos sa pahina.

6. Pagpuli-puli og paambit sa unsay gisulat.

Diskusyon: Sa unsang paagi nga ang pagpuyo sa paagi nga gitudlo ni Jesukristo maghatag kanato ug mahangtorong kalipay? Sa unsang paagi nga ang Langitnong Amahan ug ang Manluluwas motabang nato nga mapalambo kini nga mga kinaiya?

Gisumiter ni Mitzi Schoneman

Gikan sa Alang sa Kalig-on sa mga Kabatan-onan nga Magasin

Pagsunod sa Dalan ni Kristo

Si Elder Dale G. Renlund nagtudlo sa kabatan-onan kon giunsa ni Jesukristo paghatag kanato og mga pangmarka sa agianan diha sa atong panaw ngadto sa atong Langitnong panimalay.

Kita Ba Dapat nga Mahimong Hingpit?

Si Elder Jeffrey R. Holland mitubag sa pangutana nga “Ang Dios ba naglaom gayod nga kita mahimong hingpit?”

Pagbati sa Espiritu Kon Ikaw Nabalaka

Ang kabatan-onan nag-istorya kon unsaon nga mas mabati og maayo ang Espiritu kon ikaw nakasinati og kabalaka o kanerbiyos.

Ang Anatomiya sa usa ka Tigpasiugda og Kalinaw

Pagkat-on kabahin sa internal nga mga gibuhat sa usa ka tigpasiugda og kalinaw.

Gikan sa Higala nga Magasin

Pagbarog alang sa Uban

Gamita kini nga pahina aron sa pagtabang sa pagtudlo sa inyong mga anak nga mobarog alang sa uban, sama sa gibuhat ni Jesus.

Dali, Sunod Kanako nga mga Kalihokan

Pangita og sinemana nga mga kalihokan aron makatabang nga mahimong makalingaw ang inyong pamilya nga pagtuon sa kasulatan.

12 ka Smiley Sticker

Basaha kini nga istorya aron makat-on giunsa ni Antonio pagpaambit og kalipay ngadto sa uban pinaagi sa pagserbisyo.