Dali, Sunod Kanako

Mateo 5; Lucas 6

Nagpaabot Ba Gayod ang Langitnong Amahan nga Kita Mahingpit?

Atol sa Iyang Wali sa Bukid, ang Manluluwas nagtudlo, “Busa kamo kinahanglan nga magmahingpit, ingon nga hingpit ang inyong Amahan nga langitnon” (Mateo 5:48). Apan sa unsang paagi kini posible? Kini nga sugo mora og bug-at ra, ug kita mahimong moatras kon kita dili mohunong aron sa paghinumdom kon unsaon ug kanus-a kita makakab-ot og kahingpitan.

Kalihokan: Puzzle sa Kahingpitan

Bahin 1

Si Elder Jeffrey R. Holland sa Korum sa Napulog Duha ka Apostoles mitudlo, “Ang atong bugtong paglaom alang sa tinuod nga kahingpitan mao ang pagdawat niini isip gasa gikan sa langit—dili nato kini ‘mapaningkamotan’.”¹

Isip usa ka pamilya, o mag-inusara, pangitaa ang depinisyon sa hingpit diha sa Giya ngadto sa mga Kasulatan diha sa Gospel Library nga app o sa ChurchofJesusChrist.org. Basaha ang mga pakisayran sa kasulatan nga kauban sa depinisyon. Mahimo usab nga inyong ikonsiderar ang pagbasa sa pakigpulong ni Presidente Russell M. Nelson nga “Perfection Pending” gikan sa Oktubre 1995 nga kinatibuk-ang komperensiya.²

Unsa na karon ang inyong pagsabot sa kahingpitan? Hisgoti kauban sa inyong pamilya o isulat diha sa inyong journal kon sa unsang paagi nga ang inyong pagsabot niini nga mga bersikulo nausab tungod sa depinisyon sa ebanghelyo sa hingpit.

Bahin 2

Isip usa ka pamilya, pagmugna og yano nga puzzle pinaagi sa paggunting sa usa ka piraso nga papel ngadto sa pipila ka piraso sa puzzle. Sa dili pa sumpayon ang puzzle, tangtanga ang usa ka piraso aron nga ang puzzle dili kompleto inig sumpay. Hatagi ang matag sakop sa pamilya sa nahabilin nga mga piraso sa puzzle ug pasulati nila ang mga piraso sa mga butang nga ilang mahimo padulong sa kahingpitan.

Kon nasulatan na ang mga piraso, sumpaya ang puzzle nga wala ang piraso nga inyong gitangtang sa sinugdanan. Kon nasumpay na ang puzzle, ipakita ang kataposan nga piraso. Sa dili pa kini ibutang, hisgoti ang mga paagi nga ang mga sakop sa Dios nga Kapangulohan makatabang nato nga molambo ug isulat ang pipila niini diha sa kataposan nga piraso.

Pinaagi sa matubsanong gahom ni Jesukristo ug sa Iyang Pag-ula, kita mahimong hingpit sa kataposan.³

Mubo nga mga Sulat

1. Jeffrey R. Holland, “Busa Kamo Kinahanglan Magmahingpit—sa Kataposan,” Liahona,, Nob. 2017, 41.

2. Russell M. Nelson, “Perfection Pending,” Ensign, Nob. 1995, 86–88.

3. Jeffrey R. Holland, “Busa, Kamo Kinahanglan Magmahingpit—sa Kataposan,” 41–42.