“Gusto Ka ba nga Moambit sa Sakramento?,” Liahona, Peb. 2023.
Mga Tingog sa mga Santos sa Ulahing mga Adlaw
Gusto Ka ba nga Moambit sa Sakramento?
Samtang ang sakramento gipasa ngadto niya, ang batang lalaki mikab-ot, mihunong og pipila ka segundo, ug wala modayon og kuha.
Paghulagway pinaagi ni Dilleen Marsh
Usa sa akong mga higala midapit nako nga motambong sa iyang ward atol sa Dominggo sa puasa aron moapil sa paghatag og ngalan ug pagpanalangin sa iyang anak nga lalaki. Human sa pagpanalangin, oras na alang sa sakramento.
Samtang gipasa ang sakramento ngadto sa kongregasyon, akong namatikdan ang sayis anyos nga pag-umangkon nga lalaki sa akong higala, nga adunay sakit nga attention deficit hyperactivity disorder (ADHD). Naglakaw-lakaw siya sa luyo sa chapel apan hilom nga misugod og pakigsulti sa lalaki nga nagpasa sa sakramento.
Dili sigurado kon ang batang lalaki nakadawat na ba sa sakramento, ang lalaki hinay nga mitunol sa tray sa sakramento ngadto niya. Ang batang lalaki mikab-ot, mihunong og kadali, ug wala modayon og kuha. Morag sige og balik-balik nga ingon niadto sa pipila ka segundo kay ang batang lalaki mokab-ot ug dili modayon og kuha. Morag wala siya mahibalo unsay buhaton. Ang mas magulang nga buotang lalaki mapailobon nga naghulat.
Sa kataposan, ang batang lalaki nangutana, “Mosugot ka nga moambit ko sa sakramento?”
Sa malumo nga tingog, ang mas magulang nga buotang lalaki mitubag, “ Gusto ka ba nga moambit sa sakramento?”
Ang batang lalaki miingon og oo ug dayon, sa walay pagduhaduha, mikab-ot ug mikuha sa pan. Samtang ang lalaki nga nagpasa sa sakramento mipasa sa pan ngadto sa uban, ang batang lalaki mibalik sa iyang pamilya ug milingkod.
Ang paghunahuna nianang panagsultihanay sa usa ka lalaki ug sa batang lalaki nakatudlo nako og daghan kon sa unsang paagi nga ang Langitnong Amahan makigsulti nato, Iyang mga anak.
Ang atong Langitnong Amahan dili mopugos sa bisan unsa nga butang ngari nato, apan Siya mahigugmaon ug mapailobon nga modapit nato sa pag-ambit. Dayon Siya mobarog nga andam sa pagpanalangin nato, ang Iyang mahigugmaon nga mga bukton kanunayng nagtuyhad ngari kanato. Kon kita modesisyon nga moduol Kaniya, Siya anaa ra, andam nga mohatag sa Iyang milagroso nga gugma ug mga panalangin ngari kanato.