Digital-Lamang: Mga Young Adult
Mga Leksiyon bahin sa Kalipay gikan sa mga Santos diha sa mga Kasulatan
Kitang tanan nangita og kalipay, ug ang mga ehemplo sa mga Santos diha sa mga kasulatan makatudlo nato diha sa saktong direksyon.
Litrato gikan sa Pexels
Ang kalibotan usa ka masulub-on nga dapit usahay. Sa personal ug sa tibuok kalibotan nga lebel, adunay kalisod, walay kaangayan, ug pag-antos. Sa usa ka punto o sa lain, kitang tanan makadiskobre nga kita “naas [usa ka] kalisdanan.”1
Apan kita gitudloan usab nga “ang mga tawo naingon, nga unta sila makabaton og hingpit nga kalipay” (2 Nephi 2:25).
Unsaon pagkabaton og kalipay kon dunay mga problema?
Diha sa mga kasulatan, ang mga tawo gikan sa tanang dispensasyon nagtinguha sa pagtukod sa Zion ug makaangkon og kalipay nga nagpatigbabaw didto. Ug pipila kanila madasigon nga nagmalamposon! Sa atong pagbasa mahitungod sa mga Santos, makat-onan nato asa mangita og tumang kamaya bisan taliwala sa daghang mga pagsulay.
Ang Katawhan ni Alma: Nagtuman sa mga Pakigsaad
Sa ilang sekreto nga pundokanan duol sa katubigan sa Mormon, ang katawhan ni Alma “namakpak sa ilang mga kamot tungod sa hingpit nga kalipay” (Mosiah 18:11) sa dihang nakahibalo sila nga sila makasulod ngadto “sa panon sa Dios” (Mosiah 18:8) pinaagi sa pakigsaad sa bunyag. Sila usab nakadawat sa Espiritu Santo (Mosiah 18:13), nga, sumala ni Presidente James E. Faust (1920–2007), mao “ang labing dakong garantor sa kalinaw sa kaugalingon diha sa walay kasiguroan nga kalibotan.”2
Ang katawhan ni Alma naningkamot pag-ayo nga magpadayon ang Espiritu uban kanila samtang sila “[nag]lakaw nga matarong sa atubangan sa Dios” (Mosiah 18:29). Ug ang pagtuman sa ilang pakigsaad namatud-an nga importante sa ilang kalipay—sa dihang ilang nakita ang ilang mga kaugalingon diha sa pagkaulipon, ang Ginoo miluwas kanila tungod kay sila mituman sa ilang pakigsaad: “Ihangad ang inyong mga ulo… kay Ako nasayod sa pakigsaad diin kamo mihimo ngari kanako; ug Ako makigsaad uban sa akong mga katawhan ug moluwas kanila gikan sa pagkaulipon” (Mosiah 24:13).
Ang katawhan ni Alma klarong nakasabot unsa ang bag-ong gitudlo ni Sister Jean B. Bingham, kanhi Kinatibuk-ang Presidente sa Relief Society: “Ang kalipay mabaw ra kon atong ibaylo ang mga panalangin sa mahangtorong hingpit nga kalipay ngadto sa daklit nga kasayon. … Ang yawe sa malungtaron nga kalipay mao ang pagpuyo sa ebanghelyo ni Jesukristo ug ang pagtuman sa mga pakigsaad.”3
Ang mga Nephite sa 4 Nephi: Pagwagtang sa mga Timaan
Human sa pagbisita gikan sa nabanhaw nga Manluluwas, ang mga Nephite migahin og dul-an sa duha ka gatos ka tuig nga nagpuyo diha sa panag-uyon. “Sa pagkamatuod wala nay mga katawhan nga labaw pa ka malipayon sa tanan nga mga katawhan nga gilalang sa kamot sa Dios” (4 Nephi 1:16).
Usa sa ilang mga estratehiya alang sa kalipay mao ang pag-establisar og kaangayan:
“Busa walay adunahan ug kabos, ulipon ug gawasnon …
“Ni adunay mga Lamanite, ni bisan unsa nga matang sa pundok sa mga katawhan” (4 Nephi 1:3, 17).
Kon pamation yano ra, apan ang pag-establisar niini nga walay gidapigan nagkinahanglan gyod og trabaho, tungod kay sa wala pa ang pagbisita sa Manluluwas, “ang katawhan nagkabahin batok sa usag usa” (3 Nephi 7:2).
Ang kalibotan sa kasagaran mopahamtang og nagbahin nga mga timaan. Sama sa bag-ong gisulti ni Presidente Russell M. Nelson sa mga young adult, “Ang kaaway nagmaya sa mga timaan tungod kay kini nagbahin kanato ug nagpugong sa paagi nga kita maghunahuna mahitungod sa atong kaugalingon ug sa usag usa.”4 Ang herarkiya nga atong gihimo pinaagi sa mga timaan dili sa Dios—“Siya nagdapit … sa tanan sa pagduol ngadto kaniya ug sa pag-ambit sa iyang kaayo” (2 Nephi 26:33).
Samtang ang mga Nephite nag-ugmad og kaangayan taliwala kanila, “ang Ginoo mipauswag kanila sa hilabihan diha sa yuta” (4 Nephi 1:7).
Ang Dakbayan sa Enoch: Paghiusa diha sa Gugma
Ang dakbayan ni Enoch mao ang bugtong ehemplo sa kasulatan sa usa ka tibuok komunidad nga “gidala ngadto sa langit” (Moises 7:23). Kon ang langit mao ang “mopuyo uban sa Dios diha sa usa ka kahimtang nga walay kataposan ang kalipay” (Mosiah 2:41), ang dakbayan ni Enoch mao ang kataposang ehemplo nga atong sundon!
Busa, giunsa nila kini paghimo?
Sila “usa sa kasingkasing ug usa sa hunahuna” (Moises 7:18)—nagkahugpong sa pagpangita og mahangtorong himaya. Ang pagtambayayong sama niana magkinahanglan og putli nga gugma ni Kristo tungod kay kini naglakip og paglaom ug pagpaningkamot alang sa kahimayaan sa ubang mga tawo—hingpit nga walay pagkahakog!
Ang dakbayan ni Enoch nakakat-on gayod gikan ni Enoch unsaon sa paghigugma sa mga anak sa Dios niining paagiha. Sa dihang gipakita sa “tanan nga mga binuhatan sa katawhan,” si Enoch “mitan-aw diha sa ilang pagkadaotan … ug mibakho … ug ang iyang kasingkasing milugway ngadto sa kahangtoran” (Moises 7:41).
Kon kita mobati og Kristohanon nga gugma alang sa uban, kita nag-awhag nila sa pag-apil nato diha sa dalan sa kahimayaan pinaagi sa pagsunod ni Jesukristo. Sama sa gisulti ni Presidente Bonnie H. Cordon, Kinatibuk-ang Presidente sa Young Women: “Duol ngadto ni Kristo. Duol na karon, apan ayaw pag-inusara!”5
Pagpuyo sa Plano sa Kalipay
Gani ang nagdagtom nga mga kolor makaguba sa inyong kalipay, ang usa ka kamatuoran makadan-ag niini: ang atong Tiglalang nagtinguha sa atong mahangtorong kalipay—ang Iyang plano mao ang plano sa kalipay! Kita nabuhi aron mahimong malipayon sa walay kinutoban, sama nga Siya malipayon.
Apan ang importante nga pulong mao ang pagkamahimo. Kita wala lang maningkamot nga mobati og kalipay. Kita naningkamot aron mahimo nga malipayong katawhan.
Gikan sa mga Santos diha sa mga kasulatan, nakat-onan nato nga ang pagkahimong malipayon usa ka tumong nga nagkinahanglan og lihok ug nga ang labing importante nga lihok mao ang pagpakita og hugot nga pagtuo sa Dios ug ni Jesukristo. Sama sa atong mabasa diha sa mga kasulatan, ang hugot nga pagtuo ang naggiya ngadto sa pagkamasulundon sa mga sugo sa Dios. Ang hugot nga pagtuo usab ang naggiya ngadto sa paghinulsol ug pagpasaylo sa atong mga sala pinaagi sa Pag-ula ni Jesukristo, nga nakatabang niini nga mga Santos sa pagsinati og matang sa kalipay nga natagamtaman sa Langitnong Amahan ug ni Jesukristo—ang kalipay nga mahimong maangkon natong tanan.