Pagserbisyo sa mga Calling Kon Kanus-a ug Diin Nanginahanglan ang Ginoo Kanato

Ni Alison Wood

Mga Magasin sa Simbahan

Bisan tuod nga ma-release kita gikan sa atong mga calling, dili gayod kita ma-release gikan sa paghimo og maayo.

Niadtong batan-on pa ko, ang akong pamilya mibalhin ug miapil sa usa ka bag-o nga ward. Ang akong papa gitawag sa pagka-bishop sa wala madugay. Medyo makalibog kadto sa among limitado nga panglantaw—dihay ubang takos nga mga lalaki sa ward, ug ang akong papa wala mobati nga nakaila siya sa mga miyembro o sa ilang indibidwal nga mga panginahanglan nga mao unta ang iyang ganahan.

Apan gibuhat niya ang labing maayo ug matinud-anong miserbisyo, naningkamot pag-ayo nga makaila niadtong iyang gialagaran. Sa panahon nga natapos na ang iyang serbisyo, mibati siya og dakong gugma alang sa mga miyembro sa among ward.

Ug human dayon sa iyang pagka-release, gitawag siya sa nursery.

Talagsaon kaayong tan-awon ang bag-ong transisyon. Gihigugma niya ang mga bata sa nursery ug mahunahunaon sa pagplano og mga leksiyon ug mga kalihokan nga makatabang nila sa pag-ugmad og lig-on nga pundasyon diha sa ebanghelyo. Bisan tuod nga nausab ang iyang calling sa ward, nagpabilin siya nga suod sa mga miyembro sa ward nga iyang nakaila ug gihigugma ug mipadayon sa pagkat-on og bag-ong mga paagi sa pagserbisyo sa iyang mga kaigsoonan.

Nakabaton usab siya og dugang panahon nga igahin sa among pamilya; sa wala madugay human sa iyang pagka-release, si mama misunod sa pag-aghat nga mobalik sa pag-eskwela ug mokab-ot og mas taas nga kurso, mao nga ang iyang mga responsibilidad sa among panimalay nadugangan samtang si mama migahin og mas daghang panahon sa pagtuon. Tinuoray kadto nga usa ka panalangin sa among pamilya nga matabangan niya niadto nga panahon.

Ang mga responsibilidad sa akong papa nausab, apan ang kamahinungdanon ug ang epekto sa iyang mga responsibilidad wala mausab. Ang Ginoo nasayod kon unsa ang labing maayo alang sa ward ug sa akong pamilya. Sama sa gipasabot ni Presidente Dallin H. Oaks, Unang Magtatambag sa Unang Kapangulohan: “Wala kita ‘gipaubos’ kon kita ma-release, ug wala kita ‘gipataas’ kon kita tawagon. Walay ‘pataas o paubos’ sa pagserbisyo sa Ginoo. Dunay ‘abante o atras’ lamang, ug kana nga kalainan magdepende kon giunsa nato pagdawat ug paghimo ang atong pagka-release ug pagkatawag.”¹

Gitawag sa Pagserbisyo, Gitudlo sa Pag-alagad

Sa paghisgot mahitungod sa misyonaryo nga buhat, si Elder David A. Bednar sa Korum sa Napulog Duha ka Apostoles mipakita sa kalainan tali sa pagkadestino ngadto sa usa ka lokasyon ug sa pagkatawag sa pagserbisyo:

“Palihog timan-i nga ang unang [tudling] [sa usa ka tawag sa pagmisyon] mao ang tawag sa pagserbisyo isip full-time nga misyonaryo sa gipahiuli nga Simbahan sa Ginoo. Ang ikaduhang [tudling] nagpasabot og assignment nga moalagad sa usa ka piho nga dapit ug misyon. Ang importanting kalainan nga gipahayag tali niining duha ka mga [tudling] importante nga masabtan natong tanan.

“Sa kultura sa Simbahan, kita kanunay maghisgot nga gitawag sa pagserbisyo sa usa ka nasod sama sa Argentina, Poland, Korea, o sa Estados Unidos. Apan ang usa ka misyonaryo wala gitawag ngadto sa usa ka dapit; hinuon, siya gitawag sa pagserbisyo.”²

Mahimong makatabang ang paghunahuna sa mga calling sa samang paagi. Kita gisultihan diha sa Doktrina ug mga Pakigsaad 4:3 nga “kon [kita] adunay tinguha sa pag-alagad sa Ginoo, [kita] gitawag ngadto sa buhat.” Bisan kon asa kita “madestino” ug kon unsa man ang atong piho nga mga responsibilidad, sa kanunay gitawag kita sa pagserbisyo sa Ginoo ug sa pagpanalangin sa Iyang mga anak isip kabahin sa atong mga responsibilidad sa pakigsaad. Kita mahimong magkahiusa sa atong katuyoan nga “mobati sa hingpit nga kalipay sa pagserbisyo sa Dios pinaagi sa pagserbisyo sa Iyang mga anak [tan-awa sa Mosiah 2:17],” nasayod nga ang “mga calling makatabang usab [kanato] nga motubo ang [atong] hugot nga pagtuo ug mas mapaduol ngadto sa Ginoo.”³ Bisan unsa pa nga organisasyon o calling ang atong gialaragan, kitang tanan kabahin sa sama ra nga buhat—ang buhat sa kaluwasan ug kahimayaan.

Ang Pagkahimong Kabahin “sa Lawas ni Kristo”

Si Presidente Henry B. Eyring, Ikaduhang Magtatambag sa Unang Kapangulohan, mipasabot nga ang tanang mga calling gihatag aron makatabang kanato nga mas mahisama ni Kristo ug mopanalangin sa mga kinabuhi sa uban: “Bisan ang pinakabag-o nga miyembro sa Simbahan makabatyag nga ang tawag sa pagserbisyo kinahanglan nga mag-agad sa atong kinasingkasing nga pagtagad. Pinaagi sa paghalad sa bug-os natong mga kasingkasing ngadto sa Magtutudlo ug sa pagsunod sa Iyang mga sugo nga kita makaila Kaniya. …

“Kamo gitawag sa pagrepresentar sa Manluluwas. Ang inyong tingog sa pagpamatuod mahimong sama sa Iyang tingog, ang inyong mga kamot sa pag-agak mahimong sama sa Iyang mga kamot.”⁴

Sa dihang gibunyagan kita ug mihimo og mga pakigsaad sa paglihok sa ngalan ni Kristo, kita nahimong kabahin “sa lawas ni Kristo” (1 Mga Taga-Corinto 12:27). Ang lain-lain nga bahin sa atong lawas mobuhat sa lain-laing mga buluhaton, apan silang tanan parehas ra nga importante; ang pinakamahinungdanon nga butang mao nga ang lawas magkahiusa sa paglihok aron sa pagtuman sa hiniusa nga katuyoan. Sumala sa Dali, Sunod Kanako nga manwal, “Niini nga matang sa panaghiusa, ang mga kalainan wala lamang giila apan gikahinangop, tungod kay kon wala ang mga miyembro nga nagkalainlain og mga gasa ug mga abilidad, ang lawas mahimong limitado.”⁵

Ang Ginoo nasayod sa atong nagkalain-lain nga mga kahanas ug mga abilidad, ug Siya usab nasayod kon unsaon sa paggamit niini aron sa pagpanalangin kanato ug sa mga tawo sa atong palibot, nga naglakip sa pagdapit kanato sa pagserbisyo diha sa nagkalain-lain nga mga calling ug mga tahas sa lain-lain nga mga panahon. Ang calling dili mahitungod sa posisyon, rango, o kwalipikasyon; mahitungod kini sa kaandam sa pagsunod sa kabubut-on sa Dios ug pagdawat nga Siya motawag kanato kon Siya mas nanginahanglan kanato sa piho nga panahon og dapit.

Ang Buhat sa Agalon

Si Presidente Gordon B. Hinckley (1910–2008), sa iyang unang pakigpulong human matawag isip Presidente sa Ang Simbahan ni Jesukristo sa mga Santos sa Ulahing mga Adlaw, mipasabot og maayo sa kaimportante sa matag calling diha sa Simbahan:

“Walay calling sa simbahan nga gamay o may gamay ra nga sangpotanan. Tanan kita nga anaa sa pagpursige sa atong katungdanan makatandog sa mga kinabuhi sa uban. Sa matag usa kanato diha sa atong tagsa-tagsa ka responsibilidad ang Ginoo nag-ingon: ‘Busa, pagmatinud-anon; barog diha sa buhatan nga Ako mitudlo nganha kanimo; tabang sa maluyahon, ipataas ang mga kamot sa nawad-an og paglaum, ug lig-ona ang mga tuhod nga mahuyang’ [Doktrina ug mga Pakigsaad 81:5]. …

“Kamo adunay dakong oportunidad alang sa pagtagbaw sa pagbuhat sa inyong katungdanan ingon nga ako aduna diha sa akong katungdanan. Ang kalamboan niini nga buhat madeterminar sa atong hiniusang paningkamot. Bisan unsa pa ang inyong calling, puno kini sa samang oportunidad sa pagbuhat og maayo sama sa akoa. Unsa ang pinakaimportante mao nga kini ang buhat sa Agalon. Ang atong buhat mao ang pagbuhat og maayo ingon nga Siya mibuhat usab.”⁶

Ang mga pulong ni Presidente Hinckley hingpit nga naghulagway sa unsay nakat-onan sa akong papa isip usa ka bishop, lider sa nursery, kapikas, ug ginikanan: ang Ginoo naghangyo kanato nga moserbisyo sa nagkalainlain nga mga calling sa tibuok nato nga kinabuhi, apan wala gyod Siya mohunong sa pagdapit kanato nga mas mahisama Kaniya samtang kita molihok aron sa pagpanalangin sa mga kinabuhi niadtong anaa sa atong palibot.