Pagpangandam alang sa Imong Interbiyo uban sa Ginoo

Ni John C. Neubauer

Ang mga interbiyo sa pagkapari nga anaa nato karon makatabang nato sa pagpangandam alang sa atong interbiyo sa umaabot uban sa Ginoo.

Wala madugay human sa akong bunyag isip usa ka kinabig, gitawag ko nga mahimong magtatambag sa kapangulohan sa korum sa mga elder. Sa una nakong miting uban sa presidente sa korum, miingon siya nga sa umaabot nga semana mag-eskedyul kami og mga pag-interbiyo.

Sa dihang nangutana ko kon kinsa ang among interbiyohon ug unsay katuyoan sa mga interbiyo, siya miingon, “Ang atong mga interbiyo maglakip sa naandan na nga mga pangutana, ug maghisgot kita bahin sa mga panginahanglan sa korum ug mga panginahanglan sa pamilya. Apan gusto ko nga maghunahuna nga ang katuyoan sa atong mga interbiyo mao ang pagtabang sa mga sakop sa atong korum aron maandam alang sa ilang interbiyo sa umaabot uban sa Ginoo.”

Usa kadto ka espirituhanon nga panglantaw nga nahinumdoman pa gihapon nako, bisan kon nadungog ko kini 23 ka tuig na ang milabay.

Kon sa Unsang Paagi Kita Moserbisyo Mao ang Mahinungdanon

Sulod sa unom ka bulan, ang mga utlanan sa among stake ug ward giusab. Gitawag ko isip presidente sa korum sa mga elder alang sa among bag-ong ward, bisan kon nakaeskedyul na nga mobalhin ko sa laing estado sulod sa tulo ka bulan. Sa dihang ang presidente sa stake mi-set apart nako, siya miingon, “Brother Neubauer, dili mahinungdanon sa Ginoo kon unsa kadugay kita moserbisyo; mahinungdanon Kaniya kon sa unsang paagi kita moserbisyo.” Busa sa akong panahon, ako miinterbiyo sa daghang sakop sa korum kutob sa mahimo.

Sa kaulahian, sa dihang nag-edad ko og 70, gitawag ko pag-usab nga mahimong presidente sa korum sa mga elder. Nahitabo kini human gayod nga ang Unang Kapangulohan ug ang Korum sa Napulog Duha ka Apostoles mipahibalo nga sa matag ward o branch, ang mga high priest ug mga elder ihiusa ngadto sa usa ka korum. Nahunahunaan nako og balik kana nga panglantaw nga gipaambit kanako sa akong unang presidente sa korum sa mga elder daghang katuigan na ang milabay: “Ang katuyoan sa atong mga interbiyo mao ang pagtabang sa mga sakop sa atong korum aron maandam alang sa ilang interbiyo sa umaabot uban sa Ginoo.”

Busa unsaon man nga ang usa ka lider makatabang sa usa ka sakop sa korum sa pagpangandam alang sa interbiyo uban sa Ginoo? Diha sa mga interbiyo sa pagpangalagad ug diha sa mga panaghisgotan sa korum, nangutana ko sa mga sakop sa korum: “Kon mahibalo ka nga sulod sa unom ka bulan ikaw mobarog sa atubangan sa Ginoo, unsay imong usbon sa imong kinabuhi agi og pagpangandam alang nianang higayona?” Kasagaran tugotan nako ang mga tawo sa paghunahuna lamang sa tubag. Apan usahay adunay mipaambit og personal nga mga panglantaw mahitungod sa mahimo nilang bation nianang higayona uban sa Ginoo.

Unsa nga mga Bukid ang Kinahanglang Ibalhin?

Gipaambit usab nako sa mga sakop sa korum kini nga mga pamahayag gikan ni Presidente Russell M. Nelson: “Ang Ginoo naghimong posible sa butang nga imposible.”¹ “Uban sa hugot nga pagtuo diha Kaniya, kita makabalhin sa mga bukid sa atong kinabuhi.”² Ug dayon nangutana ko og laing pangutana: “Unsay gusto gayod nimong buhaton kon ang Ginoo mobalik pag-usab?” Gihangyo nako sila sa pagpamalandong kon unsa nga mga bukid sa ilang kinabuhi ang kinahanglang ibalhin aron makahimo sila sa unsay gusto nilang buhaton kon ang Ginoo mobalik pag-usab, unsay ilang kinahanglang buhaton aron mahimong andam sa pagpakig-atubang Kaniya.

Ang mga kasulatan nagsulti kanato nga sa umaabot kita mobarog sa atubangan sa Ginoo aron pagahukman: “Ug mahinabo nga kon ang tanan nga mga tawo molabay na gikan niining unang kamatayon ngadto sa mahimayaon nga kinabuhi, ingon nga sila nahimo nga imortal, sila kinahanglan gayod moatubang sa hukmanan sa Usa nga Balaan sa Israel; ug unya moabot ang paghukom, ug unya kinahanglan gayod sila nga pagahukman sumala sa balaan nga paghukom sa Dios” (2 Nephi 9:15).

Ako nag-ampo nga pinaagi sa paghunahuna nang daan kon unsay gusto natong isulti ug gusto nga kita mamahimo nianang maanindot nga adlaw, ang matag usa nato kinahanglang mobalhin sa mga bukid nga angayng balhinon aron kita makaandam alang sa atong interbiyo uban sa Ginoo.

Ang tagsulat nagpuyo sa Utah, USA.