“Ang Akong Milagro nga Panalangin,” Liahona, Peb. 2023.
Mga Tingog sa mga Santos sa Ulahing mga Adlaw
Ang Akong Milagro nga Panalangin
Ako mapasalamaton sa pagkahibalo nga ang gahom sa pagkapari managsama lang sa matag yuta.
Litrato sa maayong kabubut-on sa tagsulat
Padulong sa pagtapos sa akong pag-eskwela sa Japan, ako mibiyahe ngadto sa Thailand aron sa paghimo og field research alang sa akong degree sa masteral. Mahinamon ko apan gikulbaan kabahin sa biyahe.
Sa wala pa ko mobiya, nangayo ko og panalangin sa pagkapari. Atol sa panalangin, ako gitambagan nga mangita og mga panalangin sa pagkapari sa lisod nga mga panahon. Ako giingnan: “Hinumdomi nga niining kalibotan, walay dapit nga wala gilalang pinaagi sa gahom sa pagkapari. Mao nga, bisan asa ka pa moadto, pangita og tighupot sa pagkapari ug pangayo og tabang, ug ikaw mapanalanginan.”
Ako walay ideya unsaon sa pagpangita sa Simbahan sa Thailand inig abot nako. Wala pa mapalambo ang internet, mao nga dili nako mapangita ang nahimutangan sa mga gambalay. Kami naabot sa airport sa Bangkok sa Sabado sa hapon. Diha sa bus, kinasingkasing ko nga nag-ampo, “Langitnong Amahan, Dominggo na ugma. Palihog tabangi ko nga makaplagan ang Simbahan.”
Gihuman nako ang akong pag-ampo ug mitan-aw sa gawas. Sa akong kahingangha, nakakita ko og karatula alang sa Ang Simbahan ni Jesukristo sa mga Santos sa Ulahing mga Adlaw sa Thai ug sa Iningles.
Pagkasunod buntag, misakay ko og auto rickshaw padulong ana nga gambalay. Pagkahuman, ang mga miyembro mihatag nako sa address sa usa ka panimalay nga mas duol sa akong gitrabahoan diin buhaton ang mga miting sa branch. Gihatagan usab ko nila sa numero sa telepono sa full-time nga mga misyonaryo. Pagkasunod Dominggo, ako mitambong niana nga branch.
Human sa pipila ka adlaw nga pagtrabaho og taas nga mga oras ubos sa init nga adlaw, naluya ko. Sa kataposan, nasakit ko.
Akong gitawagan ang full-time nga mga misyonaryo, ug nag-schedule mi og oras nga mag-abot sa nahimutangan sa branch. Sa dihang miabot ko pagkasunod adlaw, walay tawo didto. Samtang naghulat ko sa gawas, nag-ampo ko, “Langitnong Amahan, ako nakahibalo nga Ikaw makaayo nako, kon kana Imong kabubut-on. Palihog tabangi ko.”
Ang mga misyonaryo naabot dayon kauban ang presidente sa branch. Sa dihang kining tulo ka tighupot sa pagkapari mipandong sa ilang mga kamot sa akong ulo, ako mibati sa gahom sa Espiritu Santo nga midagayday gikan sa tumoy sa akong ulo paingon sa akong mga tudlo sa tiil. Dihadiha dayon naayo ko.
Sa usa ka gamay nga lungsod nga layo sa akong nasod nga gigikanan, ako nangayo og tabang gikan sa mga tighupot sa pagkapari. Ang Ginoo mipanalangin nako pinaagi sa Iyang pagkapari ug sa akong hugot nga pagtuo. Sa akong mga pagbiyahe sukad niadto, ako nakapangayo og daghang panalangin gikan sa mga tighupot sa pagkapari sa tibuok kalibotan. Ako mapasalamaton nga nakahibalo nga ang gahom sa pagkapari nga gihuptan sa takos nga mga tighupot sa pagkapari managsama ra sa matag yuta.