“Unsaon nako nga mas mobati sa Espiritu kon makasinati ko og kabalaka o pagkanerbiyos?,” Alang sa Kalig-on sa Kabatan-onan, Peb. 2023.
Mga Pangutana ug mga Tubag
“Unsaon nako nga mas mobati sa Espiritu kon makasinati ko og kabalaka o pagkanerbiyos?”
Gusto sa Dios nga Kamo Magmalipayon
“Usahay ang akong pagkabalaka sayon ra nga imaniobra ug sa laing higayon makapahimo kini kanako nga dili molihok. Importante ang pagpangita og paagi sa pagpakalma. Ang makahasol, mabalak-ong mga hunahuna molabaw sa maayo, positibong mga hunahuna. Apan hinumdomi nga gusto sa Dios nga kamo magmalipayon, busa paminawa ang maayong mga hunahuna nga gikan Kaniya. Siya makatabang nimo kon mag-ampo ka Kaniya og kalig-on.”
Madi T., 19, Arkansas, USA
Pangita og Suporta gikan sa Dios ug sa Pamilya
“Ginhawa og lawom ug hinumdomi nga ikaw wala mag-inusara sa pagbati og kabalaka. Mag-ampo nga mohangyo sa Langitnong Amahan nga tabangan ka. Ang pagpakigsulti sa uban, sama sa imong mga ginikanan, makatabang usab. Pangita og pamaagi nga masuportahan sa mga higala ug pamilya nga kanunayng anaa.”
Jasmine D., 15, Washington, USA
Ang Langitnong Amahan Magpadala og Tabang
“Kon mabalaka ko, nasayod ko nga ang Langitnong Amahan makasabot sa akong gibati. Tabangan Niya ang akong mga higala nga makamatikod kon nakigbisog ko sa pagkabalaka, ug nakakat-on sila unsaon sa pagbatang nako. Kanunay ko nga mag-ampo sulod sa akong hunahuna ug ang Langitnong Amahan mopadala sa Espiritu Santo sa pagtabang nako nga mahupay ug mas masaligon.”
Elsie J., 14, Idaho, USA
Hawani ang Imong Hunahuna
“Matag higayon nga mobati ko og kabalaka o pagkanerbiyos, mag-ampo ko aron mobati og kakalma ug aron ipakita sa Ginoo nga nagkinahanglan ko sa Iyang suporta. Dayon maningkamot ko nga mawagtang sa akong hunahuna kadtong mga butang nga nakapabalaka nako pinaagi sa pagkanta og mga himno o pagpaminaw sa maayong musika. Nakatabang kini nga mahawan ang akong hunahuna, mas malipayon, ug mas andam nga mosunod sa mga pag-aghat nga akong nadawat gikan sa Espiritu.”
Nathan M., 18, Utah, USA
Ikaw Wala Gayod Mag-inusara
“Nagkigbisog ko sa kabalaka, ug usahay lisod gyod kaayo ang pagbati sa Espiritu, pagpakigsulti sa akong Langitnong Amahan, ug mobati sa Iyang gugma ug giya. Bisan og gilisdan ko bahin sa pagkabalaka ug mobati ko nga nag-inusara usahay, nasayod ko nga wala gayod ako mag-inusara. Ang pag-ampo ug pagbasa sa Basahon ni Mormon nakatabang kanako. Nasayod ko nga ang Dios kanunay nga naggiya kanato pinaagi sa Iyang kahayag ug gugma.”
Cameron K., 12, Nevada, USA