Giya sa Pagpatunhay sa Klase ug Korum

Ni Jessica Z. Strong

Mga Magasin sa Simbahan

I-download ang PDF

1. Pagkahimong Hanas sa Pagpakig-ila-ila sa Uban

Sulayi kini nga mga sugyot aron makaila sa mga tawo sa imong korum o klase!

• Pagmaisogon. Kon dunay manuktok sa imong pultahan aron makig-ila-ila nimo, samokan ka ba? Tingali dili. Busa pagmaisogon. Sulayi ang pag-text, pagtawag, o pagtuktok.

• Ibutang sa imong utok ang ilang ngalan. Sa sunod higayon nga dunay mosulti nimo sa ilang ngalan paningkamoti sa paghinumdom niini. Migaray ba kini sa usa ka butang? Pareha ba silag ngalan sa imong ig-agaw? Karon ayaw kana kalimti!

• Pagpili sa imong lingkoranan sa malaamong paagi. Atol sa klase o sa usa ka kalihokan, sulayi ang paglingkod tupad sa usa ka tawo nga wala kaayo nimo mailhi. Pakigkumusta ug ipaila ang imong kaugalingon. Dayon paminaw ug pagkat-on mahitungod kanila! Unsay ganahan nilang buhaton? Kumusta na man sila?

• Paghimo og butang nga nindot! Unsa ang imong pasalamatan? Libreng pagpakaon, usa ka pahiyom, usa ka komplimento? Sunda kini ug buhata ngadto sa laing tawo.

2. Pagtabang sa Uban nga Mobati nga Giabi-abi

Kon ikaw motan-aw pag-ayo, tingali makamatikod ka og tawo sa imong korum sa klase nga naglisod sa pagpakigsuod. Tingali dili sila kaayo kanunay nga moanha sa mga kalihokan o sa simbahan, o tingali wala silay daghang mga higala diha sa grupo. Kamo makahimo og kausaban. Ikaw mahimo nga:

• Modapit kanila ngadto sa simbahan ug sa sinemana nga mga kalihokan.

• Modapit kanila sa paglingkod tupad nimo sa mga klase sa Dominggo o sa usa ka kalihokan.

• Makigkusmuta nila didto sa gawas sa simbahan.

• Mohatag sa imong pagtagad sa paghigugma nila bisan kinsa sila. Mosiguro nga sila nakahibalo nga ikaw anaa sa pagsuporta kanila.

3. Pagpakigsuod sa Uban

Naglisod ka ba sa pagpakigsuod sa ubang tawo diha sa imong korum o klase? Normal lang na. Apan wala kana magpasabot nga kana maayo. Si Jesukristo mitudlo nato sa paghigugma sa uban, sama sa Iyang paghigugma kanato. Dili kinahanglang ikaw mahimong labing suod nga higala sa tanan. Apan ikaw mahimong usa ka tawo sa inyong grupo nga masaligan sa pagkamabination, pagtahod, ug pakighigala.

Kon ang uban dili ganahan nimo: si Jesus mitudlo kanato nga “higugmaa ang inyong mga kaaway ug pag-ampo kamo alang sa mga tawo nga nagpasipala kaninyo” (Mateo 5:44). Dili kini kanunay nga sayon, apan ang Langitnong Amahan motabang nimo kon imong buhaton ang imong labing maayo aron magmabination.

Kon ang uban lahi kaysa nimo: OK ra kon ikaw adunay lahi nga mga tinguha o mga personalidad. Gani, kana mahimong usa ka maayong butang (tan-awa sa Bahin 4). Dili kinahanglan magkapareho gayod kamo aron makasuporta sa usag usa. Mahimong mosulay ka sa pagtambong sa dula, konsiyerto, o kalihokan sa uban sa pagpakita nga ikaw nagpakabana.

4. Ang Lawas ni Kristo

Si Apostol Pablo mitudlo nga kitang tanan mao ang lawas ni Kristo. Kana ingon og makalibog, apan wala Siya magpasabot sa literal nga lawas. Siya mipasabot nga kita sama sa mga bahin sa usa ka lawas tungod kay kitang tanan managlahi apan ang tanan importante ngadto sa kinatibuk-an (tan-awa sa 1 Mga Taga-Corinto 12:16–18). Miingon siya, “Aron dili magkabahinbahin [magkasungi] ang lawas kondili ang tanang bahin niini may samang pagtagad alang sa usag-usa. Kon ang usa ka bahin sa lawas mag-antos, ang ubang bahin mag-antos usab. Kon daygon ang usa ka bahin, ang tanang bahin makaambit sa kalipay” (1 Mga Taga-Corinto 12:25–26).

Isip usa ka sakop sa klase o korum, ikaw adunay responsibilidad sa pag-atiman sa uban diha sa imong grupo. Kinsa ang naglisod? Kinsa ang mahimo nimong “ubanan sa pag-antos” o “ubanan sa kalipay”? Kinsa ang nagkinahanglan nga mobati nga gisuportahan, gilakip, ug gimahal? (Sugyot: tingali ang tanan!)

Karon, paggahin og kadiyot sa paghukom og usa ka butang nga imong mahimo alang sa usa ka tawo ug paghimo og plano sa pagbuhat niini. Kadto nga mga ideya sa kasagaran magagikan sa Espiritu Santo.

5. Alang sa mga Kapangulohan sa Korum ug Klase

Bisan og ang tanan adunay responsibilidad sa pag-atiman sa ubang mga sakop sa korum o klase, ikaw gitawag ug gi-set apart sa pagbuhat sa ingon. Ang personal nga pagpadayag makatabang. Pag-ampo aron makahibalo kinsa ang nanginahanglan ug unsay imong mabuhat. Dayon sunda ang mga pag-aghat nga imong madawat.