“‘5 ka Paagi nga Magpabilin diha sa Dalan,’” Alang sa Kalig-on sa Kabatan-onan, Peb. 2023.
5 ka Paagi nga Magpabilin diha sa Dalan
Si Jesukristo mibutang og timaan sa dalan ug migiya sa agianan padulong sa atong langitnong panimalay.
Si Elder Dale G. Renlund mibisita sa Natal, Brazil, niadtong Nobyembre 2016.
Daghang tuig na ang milabay, ang akong pamilya ug ako nagbagtas sa agianan sa bukid sa Iceland aron makakita sa inila nga busay. Wala pa gyod mi makaanhi niining bukira, dili mi sigurado sa agianan, ug kami dili sinati nga mga tigbagtas.
Mitan-aw mi sa uban nga misugod sa pagsubay sa agianan ug misunod. Sa wala madugay, dili na namo sila makita ug mao usab ang agianan! Gitan-aw namo pag-ayo ug nakamatikod sa tinumpi sa gituyo og butang nga mga bato, nga gitawag og mga cairn, nagtimaan sa dalan padulong sa busay. Nakamatikod usab kami og mga patsi sa yuta duol sa agianan nga adunay puti, humukon nga balili.1 Kon motunob kami niana nga balili magkalapok ug masudlan og tubig ang mga sapatos .
Nahibaloan namo nga ang humukon nga balili motubo sa kalapokan ug nagtimaan sa dalan nga dili namo gustong subayon. Masaligon kami nga ang pagsubay sa tinumpi nga mga bato mogiya namo ngadto sa busay.
Dili sayon ang agianan, apan kami mipadayon, mabinantayong nagsunod sa tinumpi nga mga bato ug naglikay sa humukon nga balili. Sa kataposan, miabot mi sa talagsaong busay ug nalingaw sa talan-awon gikan sa tumoy sa bukid ug sa kapresko sa tubig.
Samtang nagdulhog mi sa bukid, nakita namo nga ang tinumpi nga mga bato nga nakatabang namo nga makalikay sa lawom nga linaw sa tubig ug titip nga mga pangpang nga wala namo makita sukad. Mapasalamaton mi nga kadtong tinumpi nga mga bato migiya namo sa kasiguroan.
Sa atong panaw padulong sa atong langitnong panimalay, ang dalan malisod nga subayon. Salamat, nga si Jesukristo “mibutang og timaan sa dalan ug migiya sa agianan.”2 Samtang magtuon kita sa Iyang kinabuhi ug mga pagtulun-an, kita makakat-on kon giunsa Niya sa pagpakabuhi sa pagka-mortal ug mibutang og kahisusama sa tinumpi nga mga bato aron maoy atong sundon. Kon kita mosunod niadtong tinumpi nga mga bato, magbuhat sa unsay gibuhat ni Jesus, masaligon kita nga makaabot sa atong destinasyon.
Tinumpi nga bato #1. Ilha Kinsa Kamo
Mga paghulagway pinaagi ni Bryan Beach
Nakat-on si Jesukristo samtang Siya nagdako ug nakaila kon kinsa Siya (tan-awa sa Lucas 2:49). Uban sa pagsalig sa Iyang pagkatawo, Siya makapahayag nga Siya mao ang Mesiyas nga gipamulong sa mga propeta (tan-awa sa Hubad ni Joseph Smith, Mateo 4:18; Juan 4:25–26).
Ang pagkaila kon kinsa kamo sama gayod ka importante sa usa ka tinumpi nga bato. Bisan kon unsa pa ang inyong gipili nga mailhan inyong kaugalignon, ang inyong labing importante nga kailhanan mao nga kamo anak sa Dios. Kon kamo mapakyas sa pagpangita niining tinumpi nga bato, kamo maglatagaw sa dalan ug mosangko sa humukon nga balili.
Tinumpi nga bato #2. Tinguhaa ang Pagkahibalo sa Kabubut-on sa Langitnong Amahan
Si Jesukristo nagtinguha nga makahibalo sa kabubut-on sa Iyang Amahan. Human sa Iyang bunyag, Siya “gigiyahan sa Espiritu ngadto sa kamingawan aron makig-uban sa Dios.” Didto, Siya nagpuasa ug “nakigsulti sa Dios” (Hubad ni Joseph Smith, Mateo 4:1–2). Nakahibalo Siya sa kabubut-on sa Amahan mao nga walay pagduhaduha unsa ang gusto sa Dios alang Kaniya. Ang pagkahibalo sa kabubut-on sa Dios mao ang usa ka tinumpi nga bato nga gibilin ni Jesus kanato.
Kamo makakat-on sa kabubut-on sa Dios pinaagi sa mga kasulatan, sa mga pulong sa buhi nga mga propeta, ug sa mga paghunghong sa Espiritu Santo. Apan kinahanglan usab kamo nga makigsulti sa Dios pinaagi sa pag-ampo, sama sa gibuhat ni Jesus. Ang pagkahibalo sa inyong tinuod nga relasyon uban sa Dios—nga Siya mao ang inyong Amahan ug kamo ang Iyang anak—makapahimo sa pag-ampo nga natural (tan-awa sa Mateo 7:7–11). Ang mga kalisod sa pag-ampo moabot tungod sa pagkahikalimot niini nga relasyon.
Tinumpi nga bato #3. Ipahiangay ang Inyong Kabubut-on ngadto sa Kabubut-on sa Amahan
Si Jesukristo mipahiangay sa Iyang kabubut-on ngadto sa kabubut-on sa Iyang Amahan (tan-awa sa Juan 6:38). Ang pagpahiangay sa atong kabubut-on uban sa Dios mao ang usa ka laing tinumpi nga bato nga gibilin ni Jesus aron sa pagtimaan sa dalan.
Kinahanglan ninyong ipahiangay ang inyong kabubut-on ngadto sa kabubut-on sa inyong Amahan sa Langit. Ang pag-ampo mao ang usa ka paagi sa pagbuhat sa ingon. Ang tumong sa pag-ampo dili mao ang pag-usab sa kabubut-on sa Dios apan ang pagtabang kaninyo nga makat-on ug modawat sa Iyang kabubut-on.
Tinumpi nga bato #4. Mohimo ug Motuman sa mga Pakigsaad uban sa Dios
Si Jesukristo miingon ngadto sa Iyang mga disipulo, “Kumuyog kamo kanako” (Mateo 4:19). Buhaton nato kini pinaagi sa pagpakita og hugot nga pagtuo diha Kaniya, paghinulsol, pagpabunyag, ug pagdawat sa Espiritu Santo. Sa bunyag, kita makigsaad, o mosaad, sa pagtuman sa mga sugo ug sa paghimo ug pagtuman og dugang nga mga pakigsaad uban sa Dios. Ang matag pakigsaad mao ang usa ka tinumpi nga bato diha sa dalan sa pakigsaad nga naggiya padulong ngadto ni Kristo.
Sa among pagbagtas, ang akong pamilya ug ako gawasnon nga mopili og lahi nga dalan padulong sa ibabaw sa bukid, apan ang lahi nga dalan dili, ug dili gayod mogiya ngadto sa busay. Tingali kami miungot diha sa kalapokan, mihunong diha sa makuyaw nga mga pangpang, o wala na mopadayon tungod sa kakapoy. Ang pagpabilin diha sa dalan nakahatag sa labing direkta ug sigurado nga rota ngadto sa among destinasyon.
Dili kita mahimong magbuhat og atong kaugalingong dalan ug magpaabot sa gisaad sa Dios nga mga sangpotanan (tan-awa sa Mateo 7:24–27). Gawasnon kita sa pagpili sa atong kaugalingong dalan, apan dili kita makapili sa mga sangpotanan sa dili pagsunod sa gipadayag nga dalan sa Dios. Dili kita mahimong moadto sa usa ka pangpang ug “mohukom” nga dili matagak.
Tinumpi nga bato #5. Lahutay hangtod sa Kataposan
Si Jesukristo, pinaagi sa Iyang Pag-ula, mitapos sa buhat nga gihatag sa Dios nga Iyang buhaton (tan-awa sa Juan 17:4). Ang paglahutay hangtod sa kataposan ug pagtapos sa atong buhat usa ka gikinahanglan nga tinumpi nga bato nga sundon aron moabot sa atong gitinguha nga destinasyon.
Kon kita wala makasabot unsa ang nahimo sa Manluluwas, kita mosangko nga ang mga sapatos basa ug lapokon tungod kay wala gayod kita makaila Kaniya o moapil Kaniya sa Iyang buhat (tan-awa sa Hubad ni Joseph Smith, Mateo 7:23).
Si Jesukristo nakaila kon kinsa Siya. Nakaila Siya ug mipahiangay sa Iyang kabububt-on ngadto sa kabubut-on sa Iyang Amahan. Mihimo ug mituman Siya sa mga pakigsaad uban sa Dios. Milahutay Siya hangtod sa kataposan. Pinaagi sa pagbuhat sa ingon, Siya mibutang og timaan sa dalan ug migiya sa agianan. Ang atong buluhaton mao ang pagsunod Kaniya ug sa tinumpi nga mga bato nga Iyang gibutang, dili lamang samtang kita ania sa yuta, apan usab hangtod sa kahangtoran.3 Dayon kita mahimong manununod sa pagdawat sa tanan nga aduna ang Langitnong Amahan (tan-awa sa Hubad ni Joseph Smith, Juan 3:36).