“Ang Akong Talagsaon nga Bishop,” Alang sa Kalig-on sa Kabatan-onan, Peb. 2023.
Ang Akong Talagsaon nga Bishop
Mga paghulagway pinaagi ni Kevin Fales
Ang akong bishop nakatabang nako pinaagi sa pag-awhag nako ug paghatag nako og mga oportunidad nga mapalambo ang akong mga talento.
Nasayod nga kahibalo ko nga mo-piano, gipangutana ko niya kon gusto ba kong magkat-on unsaon sa pagpatukar sa organ. Kanunay nakong gihunahuna nga makalingaw ang pagkat-on, apan ang akong bishop mao gyod ang nakaawhag nako nga makasugod. Gitabangan ko niya nga makontak ang organista sa ward aron iya kong matabangan sa pagsugod, ug maayo kaayo ang dagan niini! Matag higayon nga makit-an ko ni bishop nga nagpraktis, iya kong dayegon ug mangutana nako bahin sa sunod nga higayon nga mag-organ ko sa panagtigom alang sa sakramento.
Nasayod ko nga ang akong bishop nakakita sa akong potensiyal, ug nagpasalamat ko sa iyang padayon nga pag-awhag. Gitabangan ko niya nga makakat-on ug motubo sa mga paagi nga dili nako mahimo nga ako lang.
Aubrey B., California, USA
Nakig-ilaila ko sa akong bag-o nga bishop dihang miingon siya, “Miingon ka nga maayo ra ang tanan, apan morag dunay problema.”
Mipasabot ko nga sige lang ko og kaulahi sa buluhaton nako sa akong kurso. Naluya ko, nasubo, ug nagsagubang sa kabalaka sa pagpakigsandurot sa uban.
“Imong gisaway ang imong kaugalingon,” miingon siya. Gitudloan ko niya bahin sa Pag-ula ni Jesukristo ug sa pailob ug kamanggiloy-on sa Manluluwas. Misugyot sab siya nga makig-istorya ko sa akong mga ginikanan ug ikonsiderar ang posibilidad nga magpa-therapy.
Nagsugod ko sa pagpakigkita og usa ka therapist. Wala kini makasulbad dihadiha dayon. Apan tungod sa akong mapinanggaong bishop, nakuha nako ang tabang nga akong gikinahanglan.
Brenna H., Utah, USA