“Pag-atubang sa Depresyon,” Alang sa Kalig-on sa Kabatan-onan, Peb. 2023.
Makahimo Ko sa Tanang Butang pinaagi kang Kristo
Ang kabatan-onan nagpaambit kon sa unsang paagi si Kristo milig-on kanila sa pagbuhat sa lisod nga mga butang (tan-awa sa Mga Taga-Filipos 4:13).
Pag-atubang sa Depresyon
Nagsugod pipila ka tuig ang milabay, akong namatikdan nga nagkaanam ko og kaluya, dili ganahang mokaon, ug nawad-an og gana sa mga butang nga kaniadto akong ganahan. Sa yanong pagkasulti, nagmagul-anon ko. Sa tanang panahon. Labing ngil-ad sa tanan, mibati ko nga nabulag sa Langitnong Amahan.
Sayop ako sa paghunahuna nga ang kaugalingon nakong pagkadili takos maoy hinungdan ug nga kon mas magmatarong lang ako, magmalipayon ko pag-usab. Apan human sa usa ka tuig nga paningkamot sa pag-ayo sa tanan nga ako ra, mibati ko nga gitalikdan. Asa man ang gisaad nga kalinaw nga akong gitinguha? Dunay mga panahon nga dili ko ganahang mabuhi. Sa kataposan, nakamatikod ang akong mga ginikanan nga adunay problema. Nakigkita ko og usa ka propesyonal ug misugod sa pagtumar og tambal, apan walay nausab.
Sa Alma 36:18–20, misugilon si Alma nga nagpakitabang siya sa Manluluwas sa iyang kasubo. Miingon siya, “O unsa nga hingpit nga kalipay, ug unsa ka kahibulongan nga kahayag ang akong nakita; oo, ang akong kalag napuno sa hingpit nga kalipay labaw sa akong kasakit!” Samtang nagbasa ko niining mga pulong usa ka gabii, wala ko kapugong kondili mobati og kasina. Nangamuyo ako alang sa kahupayan pinaagi sa pag-ampo sa dili maihap nga higayon. Nagluha akong nangutana sa akong kaugalingon, “Nganong wala man ko makadawat sa kalipay nga nadawat ni Alma nga batan-on?”
Ang tubag miabot sa tinagsa-tagsa, usa ka pagtulun-an sa matag higayon. Ang usa mao ang usa ka hulagway: usa ka painting sa Manluluwas didto Getsemani, nga naghapa sa yuta sa labihan nga kasubo ug ingon og hingpit nga gidat-ogan sa kangitngit. Akong naamgohan uban sa mas hingpit nga katin-awan nga Siya nasayod sa eksakto gayod sa palas-anon nga akong gipas-an, ug dili Siya motugot nga kini akong pas-anon nga mag-inusara.
Walay panahon nga ang tanan naayo ra sa iyang kaugalingon, apan pinaagi sa propesyonal nga tabang ug grasya gikan sa Ginoo, nakahimo ko og dako nga kalamboan. Ang depresyon dili sa kanunay mobiya. Hinoon, akong nasabtan karon nga ang akong kasub-anan mapulihan og kalipay, niining kinabuhia ug sa sunod.
Anna B., California, USA