“Bitcoin, Pizza, ug Pagpangita og Malungtarong Kalipay,” Alang sa Kalig-on sa Kabatan-onan, Peb. 2023.
Bitcoin, Pizza, ug Pagpangita og Malungtarong Kalipay
Walay ikatandi sa unsay giandam sa Langitnong Amahan alang kanato.
Mga paghulagway pinaagi ni Amber Day
Alang sa kadaghanan, adunay pipila ka butang nga mas lami pa kay sa pizza. Depende sa toppings nga inyong mapilian, ang pizza mahimong bisan unsa sumala sa gusto ninyo niini!
Ang inyong pizza mahimong halang (dugangi lang og jalapeños o pula nga dinugmok nga sili). Makatabang usab kini nga inyong makaon ang inyong utanon kon inyong butangan og spinach, mga sibuyas, mga uhong, o itom nga mga oliba. Sa daghan kaayong lamian nga mga opsiyon—gikan sa pepperoni ngadto sa pinya—ang pizza mahimong lamian hapit ngadto sa tanan.
Apan ania ang makapaikag nga pangutana: mobayad ba kamo og $400 ka milyon (USD) alang sa pizza?
Ang Tinuod Gayod nga Mahal nga Pizza
Mga tuig na ang milabay, usa ka tawo sa Florida, USA, mibaylo og 10,000 ka mga bitcoin, usa ka virtual nga kwarta, alang sa duha sa pizza. Nianang higayona, ang bitcoin dili kaayo dakog kantidad. Ang pagbayloay katumbas og mga $40. Paglabay sa daghang mga tuig, ang bili sa bitcoin mitaas. Karon, kadtong 10,000 nga mga bitcoin adunay bili nga hapit $400 milyon! Mao nga, kon siya migamit og 10,000 nga mga bitcoin aron ipalit og duha ka pizza karon, mobayad siya og $400 milyon—alang sa pizza!
Kon tan-awon nimo nianang paagiha, kadtong duha ka pizza mao ang labing mahal nga pizza sa tanang panahon. Manghinaot lang ko nga lamian kini!
Pagtan-aw dili lang Dinhi ug sa Karon
Kon kana nga tawo nakahibalo pa unsa ang mahimong bili sa bitcoin, sa inyong hunahuna pabayloan pa ba kaha niya kini og mga pizza? Ang leksiyon alang nato mao nga dili nato isalikway ang mga butang nga importante alang sa butang nga gusto nato karon dayon.
Ang plano sa Langitnong Amahan alang nato mao ang kinabuhing dayon. Walay kantidad sa bitcoin, pizza (bisan unsa kini ka lamian), o bisan unsang butang ang matandi sa unsay Iyang giandam alang kanato. Misaad Siya nga ang tanan nga anaa Kaniya ihatag kanato kon kita magmatinud-anon.
Imbitasyon ngadto sa Malungtarong Kalipay
Niadtong Abril 2020, si Presidente Russell M. Nelson mipaila og bag-ong simbolo alang sa Ang Simbahan ni Jesukristo sa mga Santos sa Ulahing mga Adlaw “nga mopakita sa mahinungdanong dapit ni Jesukristo diha sa Iyang Simbahan.” Sa sentro mao ang “nabanhaw, buhi nga Ginoo nga mituyhad sa Iyang mga bukton aron hangupon ang tanan nga moduol Kaniya.”1
Kini gibase sa marmol nga estatuwa sa Christus. Ang orihinal, gihimo sa Danish nga magkukulit nga si Bertil Thorvaldsen, anaa sa usa ka katedral sa Copenhagen, Denmark. Sa ibabaw sa orihinal nga Christus mao kini nga mga pulong: “Kini siya mao ang pinangga kong Anak: Pamati kamo kaniya” (Marcos 9:7). Ug sa ubos, mabasa kini: “Duol kamo kanako” (Mateo 11:28).2
Ang imbitasyon sa Langitnong Amahan sa pagpaminaw sa Iyang Anak ug ang imbitasyon ni Jesukristo nga moduol ngadto Kaniya mao ang Ilang mga imbitasyon kanato sa pagpangita og malungtarong kalipay.
Paminaw Kaniya
Si Presidente Nelson mitudlo, “Matag higayon nga ang [Dios] mopaila sa Iyang Bugtong Anak, … Siya mihimo pinaagi sa pipila lamang ka pulong.… Paminaw Kaniya! …
“Ang atong Amahan nakahibalo nga … ang labing makatabang nato mao ang pagpaminaw sa Iyang Anak.”
Kamo makapaminaw Kaniya pinaagi sa pagtuon sa mga kasulatan ug sa pagtambong sa templo. Kamo makakat-on sa unsang paagi ang Espiritu Santo mamulong nganha kaninyo ug mopatalinghog sa mga pulong sa mga propeta, mga manalagna, ug mga tigpadayag.
Si Presidente Nelson miingon nga “niining duha ka pulong—‘Paminaw Kaniya’—Ang Dios mihatag nato og sundanan alang sa kalamposan, ug hingpit nga kalipay niini nga kinabuhi.”3
Duol ngadto Kaniya
Bisan unsay inyong gusto sa kinabuhi—lakip sa kalipay—ang imbitasyon sa Manluluwas pareha ra kanunay: “Duol kamo kanako.”
Kita moduol ngadto Kaniya kon kita mopakita og hugot nga pagtuo Kaniya, moadto sa simbahan, moambit sa sakramento, ug mohigugma sa Dios ug sa atong mga silingan (tan-awa sa Mateo 22:37–39). Si Jesus mitudlo usab pinaagi sa ehemplo nga kinahanglan nga kita mag-ampo ug mopasaylo sa uban.
Ang pagtukod sa inyong kinabuhi diha sa mga pagtulun-an ni Jesukristo magkinahanglan og buhat ug panahon, apan dili kamo mobuhat niini nga mag-inusara. Si Jesus mao “ang dalan, ang kamatuoran, ug ang kinabuhi” (Juan 14:6). Motabang Siya kaninyo.
Dayon, moabot ang adlaw, kamo makahinumdom sa kinabuhi nga kamo ug ang Manluluwas mapagarbohon. Ug kana makapahimo ninyo nga mas malipayon kaysa bisan unsa pa—bisan pa sa pizza!