“Tan-aw ngadto sa Propeta,” Alang sa Kalig-on sa Kabatan-onan, Peb. 2023.
Tan-aw ngadto sa Propeta
Adunay kahupayan ug kasiguroan pinaagi sa pagsalig, pagtuo, ug pagsunod sa propeta.
Litrato gikan sa Getty Images
Mibati ko og sama ra sa regular nga kabuntagon samtang naglakaw ko padulong sa eskwelahan. Apan kining ingon og normal nga adlaw sa 13 ka tuig na nako nga kinabuhi nahimo nga daw lahi dihang miabot ko didto.
“Nakadungog ka ba sa balita?” nangutana ang akong higala.
“Wala,” mitubag ko. “Unsa diay?”
Dihang misulod mi sa una namong klase, ang titser nagpasalida sa TV. Didto akong nakita ang balita bahin sa makalilisang nga mga hitabo sa kabuntagon sa Septyembre 11, 2001, sa Estados Unidos. Ang gi-hijack nga eroplano gipalupad bangga ngadto sa World Trade Center sa New York City ug sa Pentagon duol sa Washington, D.C. Laing eroplano ang gipahagsa didto sa luna sa Pennsylvania. Liboan ang namatay o nangaangol. Usa kadto ka makalilisang ug adlaw sa trahedya.
Niining panahona ang akong papa usa ka fighter nga piloto sakay sa kargahanang eroplano sa unom ka bulan nga naandang pag-deploy sa Navy sa Estados Unidos. Sa mga adlaw nga misunod padayon ko nga nagtan-aw sa mga balita mahitungod sa mga pag-atake. Nakadungog sab ko sa mga klasmet nga nagpahayag og kahadlok ug kapungot. Kining tanan maoy nakapabalaka nako mahitungod sa umaabot ug kon unsay mahitabo sa akong papa.
Hal Murdock, Captain, United States Navy, sa lawak sa usa ka F/A-18F Super Hornet sa Naval Air Station niadtong 2008.
Kahupayan tungod sa Pag-ampo sa Propeta
Ang Kinatibuk-ang komperensiya gipahigayon paglabay sa tulo ka semana. Samtang naminaw ko sa propeta, kang Presidente Gordon B. Hinckley (1910–2008), nga nag-ingon nga nagpuyo kita sa lisod nga mga panahon, apan “ang Dios nga akong gituohan … usa ka Dios sa kalooy. Siya Dios sa gugma. Siya Dios sa kalinaw ug sa kasiguradoan, ug ako motan-aw Kaniya sa mga panahon nga sama niini isip kahupayan ug tinubdan sa kalig-on.”1
Sa kataposang sesyon, si Presidente Hinckley mitapos sa iyang pakigpulong uban sa pag-ampo. Nag-ampo siya alang sa mga panalangin sa hugot nga pagtuo gugmang putli, ug “diwa sa pagkamapadayonon nga motangtang sa grabeng kadaotan nga ania sa kalibotan.” Nag-ampo siya nga ang Dios mohatag og “proteksiyon ug giya niadtong mga aktibong miapil sa pagpanglimbasog sa mga butang sa gubat. Panalangini sila; panalipdi ang ilang kinabuhi; luwasa sila gikan sa peligro ug kadaotan. Dungga ang mga pang-ampo sa ilang mga minahal alang sa ilang kasiguroan.” Giampo usab niya nga ang Dios “moluwas kanato ug motabang kanato sa paglakaw inubanan sa hugot nga pagtuo nga diha gayod Kaniya ug diha gayod sa Iyang Hinigugma nga Anak.”2
Si Presidente Gordon B. Hinckley nga naghalad og pag-ampo atol sa Oktubre 2001 nga kinatibuk-ang komperensiya.
Kanunay akong makadungog sa propeta nga moingon nga siya nag-ampo alang sa daghan nga butang, apan lahi kini nga kasinatian. Wala pa gyod ko makadungog sa propeta nga mamulong og aktwal nga pag-ampo sa kinatibuk-ang komperensiya. Ang pagkadungog sa propeta nga nag-ampo naghatag kanako og kahupayan nga wala nako mabatyagi sulod sa mga semana. Nag-ampo siya mahitungod sa akong mga kabalaka. Akong gibati nga nag-ampo siya alang sa akong pamilya. Samtang nag-ampo siya alang sa kalibotan, nahingangha ko nga ang pag-ampo sa usa ka propeta alang usab diay kanako.
Usa ka espesyal nga Sulat
Pipila ka bulan ang milabay, ang among pamilya nakadawat og sulat gikan sa akong papa. Misulat siya nga sa adlaw nga nag-ampo si Presidente Hinckley, siya ug ang tanan nga nagsakay sa kargahanang eroplano nagsugod sa misyon aron hunongon ang padayong pag-atake nga naggikan niadtong mga miatake sa Amerika.
“Samtang gipamalandongan nako ang pag-ampo nga gihalad sa propeta,” ang akong papa misulat, “Nakaamgo ko og daghang talagsaon nga mga butang. Walay naangol kanamo o namatay sa tibuok nga operasyon. Usahay, ang kauban nakong mga piloto ug ako makamatikod nga kami layo kaayo gikan sa kargahanan nga eroplano, nga naglupad ibabaw sa dili mahigalaong teritoryo sa 12 ka oras nga misyon. Dihang namalik mi sa kargahanang eroplano aron patugpahon ang among mga fighter jet inig kagabii, ang kadagatan ug ang panahon malinawon kaayo nga sa kasagaran dili man unta maayo og panahon diha niana nga bahin sa kalibotan. Nga makapauli og balik ang tanan sa panimalay usa ka milagroso nga panalangin. Akong nahibaloan gikan sa personal nga kasinatian nga ang pag-ampo nga gihalad sa propeta alang kanamo natubag.”
Dihang nabasa nako ang pagsaksi sa akong papa bahin sa tubag sa pag-ampo sa propeta, ang Espiritu mipuno sa akong kasingkasing ug kini nga mga pulong misulod sa akong hunahuna: Tan-aw ngadto sa propeta, ug ikaw ma-OK ra.”
Si Commander Murdock ug ang iyang pamilya sa adlaw nga siya luwas nga nakabalik sa panimalay gikan sa pag-deploy.
Giya alang sa mga Panahon nga Mahagiton
Karon, dunay daghan nga makalibog ug negatibong mga tingog nga nagsulay sa pagpatipas kanato ug paghimo sa mga butang nga daw lahi kay sa kon unsa gayod kini pinaagi sa pagsukwahi ug pagtuis sa kamatuoran.
Gipanagna usab nga sa atong panahon si Satanas mohimo og “kayugot sa mga kasingkasing sa mga katawhan, ug mokutaw kanila ngadto sa kasuko batok niana nga maayo” (2 Nephi 28:20). Adunay “mga balita mahitungod sa mga gubat” (Mateo 24:6) ug mawad-an sa paglaom ug malisang ang mga nasod (tan-awa sa Lucas 21:25), ug ang “tanan nga mga butang magkaguliyang” (Doktrina ug mga Pakigsaad 88:91). Isip sangpotanan, daghang mga tawo makuyapan tungod sa kalisang (tan-awa sa Lucas 21:26).
Apan salamat, ang Ginoo nahibalo “nasayod sa kataposan gikan sa sinugdanan” (Abraham 2:8) ug kita wala pasagdi nga walay tabang. Isip usa ka timaan alang sa Iyang gugma alang kanato, Siya mitawag og mga propeta sa pagpanalangin ug paggiya kanato.3
Ang propeta karon, si Presidente Russel M. Nelson, nagtudlo sa mga sugo sa Dios ug nagdawat og pagpadayag alang sa paggiya sa Simbahan. Makakita siya sa mga butang nga dili nato makita ug mohatag og giya nga makapanalipod ug makatabang kanato. Sama pananglit, misaad siya nga kon kamo adunay hugot nga pagtuo kang Jesukristo, “kamo dili [angay] nga mahadlok.”4
Adunay kahupayan ug kasiguroan diha sa pagsalig, pagtuo, ug pagsunod sa propeta, sa iyang mga magtatambag sa Unang Kapangulohan, ug sa mga sakop sa Korum sa Napulog Duha ka Apostoles. Kon kita magpokus kanila ug sa ilang mga pulong, sila dili ug dili mosaag kanato.5 Ang Manluluwas mipahayag, “Bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (Doktrina ug mga Pakigsaad 1:38).
Si Commander Murdock sa lawak sa F/A-18C Hornet sa taas nga misyon niadtong mga Oktubre–Disyembre 2001. Nag-selfie siya nga naggunit og mensahe alang sa iyang pamilya. Miiingon siya, “gitangtang nako ang oxygen mask sa pagpalitrato aron mahibalo sila nga ako gayod kini.”
Usa ka F/A-18C Hornet nga mihimo sa paglanding sa kargahanan nga eroplano sa USS Carl Vinson. Ang pinasiwil nga porma sa luyo sa eroplano maoy gamiton sa pagbitik aron luwas nga mohunong ang eroplano.
Kamo Mahibalo sa Kamatuoran
Dili kanunayng sayon ang pagsunod sa propeta ug apostoles. Kon ang ilang mga pagtulun-an wala mailhi o dili madawat sa katilingban, tingali makatintal ang pagpili kon asa nga mga pagtulun-an ang dawaton. Apan ang ilang mga pulong gibase sa walay pagkausab nga doktrina ug mahangtoron nga mga kamatuoran nga angay natong mahibaloan. “Tingali dili kita makasulti kanunay sa mga tawo unsay ilang gustong madungog,” mitudlo si Presidente Nelson. “Ang mga propeta panagsa ra kaayong mailado. Apan kami sa kanunay motudlo sa kamatuoran!”6
Si Presidente Russell M. Nelson mitimbaya sa katawhan diha sa debosyonal sa Singapore niadtong Nobyembre 20, 2019.
Masayod kita niiini alang sa atong kaugalingon. Si Presidente Nelson mitudlo usab: “Pangutan-a ang inyong Langitnong Amahan kon tinuod ba gayod kaming mga apostoles ug mga propeta sa Ginoo. Pangutan-a kon kami nakadawat ba og pagpadayag [sa paggiya sa Simbahan].”7 Ang Espiritu Santo momatuod kaninyo sa mga kamatuoran nga ilang gitudlo. Usa ka laing paagi aron mahibaloan kon ang ilang mga pulong tinuod ba mao ang paggamit niini sa inyong kinabuhi “sa tanan nga pagpailob ug hugot nga pagtuo” (Doktrina ug mga Pakigsaad 21:5). Buhata lamang kini! Lihokon kon unsay ilang gitudlo, ug tan-awa unsay mahitabo.
Mapasalamaton ko sa pagsaksi gikan sa Espiritu Santo nga akong nadawat niadtong nag-13 anyos ko bahin sa balaang tawag sa usa ka propeta. Mas sigurado na ako niini karon. Kon kita motan-aw sa propeta ug mosunod sa iyang mga pagtulun-an, ma-OK ra kita bisan unsa pa nga mga hagit ang mopalibot kanato.