“Siya Mihimo Kanako nga Mananagat og mga Tawo,” Alang sa Kalig-on sa Kabatan-onan, Peb. 2023.
Siya Mihimo Kanako nga Mananagat og mga Tawo
Si Colby Merryman sa Topsham, Maine, USA, usa ka mananagat og uwang ug mga tawo.
Sugod sa sayong bahin sa iyang pagkatin-edyer, ang alarm clock ni Colby mobagting matag buntag sa alas 4:00 sa buntag, nagsulti kaniya sa pagbangon aron siya anaa na sa sakayan inig alas 5:00. Kahibalo mo, si Colby mao ang ikatulo nga henerasyon nga mananagat og uwang gikan sa Maine, USA. Kinahanglan siyang anaa na sa tubig uban sa iyang papa inig alas 5:00 sa buntag aron sila malamposong makakuha og uwang sa adlaw sa pagpanagat.
Ang Mananagat og Uwang
Si Colby kinahanglan nga mohatag og daghang panahon ug paningkamot aron makaangkon og iyang kaugalingong lisensiya sa pagpanagat og uwang. Siya migahin og 200 ka adlaw ug 1,000 ka oras nga pagbansay diha sa tubig sa milabay nga pipila ka tuig. Kinahanglan siyang makat-on mahitungod sa pagdumala sa mga bangka nga alang sa mga uwang ug sa paglawig, ug nagtuon usab siya sa mga regulasyon ug mga lagda sa industriya alang sa seguridad.
Miingon siya, “Nag-edad ko og sayis anyos sa dihang gidala ko sa akong papa sa pagpanagat sa unang higayon. Bisan niana nga pangidaron, gihatagan ko og trabahoon sa ‘paghigot’ sa mga uwang, o pagbutang og baga nga lastiko libot sa mga paak sa uwang.”
Sa dihang si Colby nag-edad na og 14, ang iyang papa misuhol niya isip usa ka kaabag sa pagpanguha og mga uwang, ug sa edad nga 15, si Colby nakapalit na og iyang kaugalingon nga bangka. Mieskwela usab siya sa pagkamekaniko sa gagmay nga makina ug sa pagkapanday aron maandam siya nga mahimong kabahin sa negosyo sa uwang.
Ang pagkamananagat og uwang makalingaw ug matulun-on nga bahin sa kinabuhi ni Colby. Nagtudlo kini kaniya sa pagdumala sa iyang kaugalingong bangka ug responsable alang sa mga desisyon nga iyang himoon diha sa tubig ug kon wala sa tubig. “Ang pagpanagat og uwang usa ka makakapoy nga pisikal nga trabaho ug makuyaw,” miingon siya.
Ang mga lagda alang sa seguridad nga gitudlo sa iyang papa kaniya manalipod kaniya sa pisikal, ingon nga ang mga sugo sa Ginoo manalipod kaniya sa espirituhanong paagi. Kon sila maningkamot ug luwas ra sa tibuok panahon sa pagpanguha og mga uwang, ang ilang pamilya maghimo og “salo-salo sa pagpangaon og mga uwang” matag ting-init aron saulogon sa pamilya ang kabilin sa pagpanagat og uwang.
Ang mananagat kasagaran mohingalan sa ilang mga bangka og ngalan sa importante nga babaye sa ilang mga kinabuhi. Si Colby mihingalan sa iyang bangka og “Angelica Jewel,” mga ngalan sa iyang duha ka igsoong babaye. Unya iyang gibaligya ang bangka, trak, ug ekipo aron makatabang sa pagbayad alang sa iyang misyon.
Seminary diha sa Tubig
Sa dihang si Colby dako-dako na aron magsugod og seminary, ang wala magkatakdo nga eskedyul kinahanglan nga sulbaron. Ang pagpanagat magsugod sa alas 5:00 sa buntag ug molungtad og daghang mga oras. Seminary sa alas 6:00 sa buntag. Siya dili mahimong anaa sa duha ka dapit sa usa ka higayon … o makahimo ba siya?
Si Colby nagsugod sa pag-apil sa seminary pinaagi sa video call matag buntag sa alas 6:00 aron siya makatuman sa mga katungdanan sa pagpangisda ug makapadayon sa iyang espirituhanong edukasyon. “Gibati nako kanunay nga akong gisugdan ang adlaw og pagpalambo sa espirituhanon,” miingon siya. “Ganahan ko nga anaa sa tubig alang sa seminary. Kalma ug malinawon kini, ug ako mibati sa Espiritu sa Ginoo didto.”
Siya maminaw ug mamalandong, mobasa sa mga kasulatan, ug moapil sa panaghisgotan uban sa iyang mga magtutudlo ug mga kauban sa klase. Dayon, sa alas 6:45 sa buntag, mobalik siya sa pagpanagat.
Sigurado gayod, ang seminary diha sa bangka nga panagatan dili maayo kanunay. Ang andar sa makina kusog ug makabalda. Ang tubig baluron, ug dunay daghang trabahoon sa bangka sa sayo sa buntag. Usahay ang unuson nga panahon makapugong ni Colby nga adunay maayong koneksiyon aron moapil sa iyang video call. “Ang pagtambong sa seminary diha sa bangka nga panagatan lisod,” miingon siya. “Mas sayon pa unta ang dili pagbuhat niini. Apan ako malipayon kaayo nga ako migahin og panahon matag adlaw sa pag-apil sa seminary.”
Espirituhanon nga mga Leksiyon sa Pagpanagat
Dili tanan nga mga leksiyon ni Colby diha sa bangka mahitungod sa pagpanagat. “Ikaw makakat-on og daghan mahitungod sa ebanghelyo nga nagtrabaho diha sa lawod sakay sa usa ka bangka,” mingon siya. Adunay daghan kaayong mga pagkasusama. Usa sa mga butang nga gitudlo sa akong papa kanako mao ang pagsalig sa tubig ug sa panahon ug sa pagsalig sa imong ekipo sa paglawig.”
Gitandi niya kini sa pagsunod sa Espiritu Santo agi sa mga unos sa kinabuhi, nag-ingon nga ang Espiritu Santo molihok isip atong ekipo sa paglawig. “Nakasabot na ako karon ngano nga importante kaayo nga makat-on sa pagpaminaw ug pagsunod sa mga pag-aghat sa Espiritu Santo ug sa tingog sa Ginoo.”
“Wala ko magtuo nga sayon kanunay ang mahimong usa ka disipulo ni Jesukristo,” miingon siya, “apan ako nagtuo nga bililhon kini.”
Mga Mananagat og Tawo
Karon si Colby nagserbisyo isip full-time nga misyonaryo sa Utah Provo Mission. Siya nakasinati gayod unsa ang gipasabot nga mahimong usa ka “mananagat og mga tawo.” Si Kristo mitawag og ordinaryo, matag adlaw nga mga mananagat nga mahimong Iyang Apostoles ug motabang sa pagsangyaw sa Iyang ebanghelyo. Si Colby, karon Elder Merryman, miingon: “Kana nakatabang nako nga makahibalo nga ang ordinaryo nga tawo sama nako makasunod sa Manluluwas kon Siya motawag. Gibati nako ang koneksyon ngadto sa Manluluwas nga Siya mitawag nako nga mahimong mananagat og mga tawo, sa pag-itsa sa pukot sa kahayag sa ebanghelyo ug sa pagkuha sa pagtagad niadtong kinsa andam nga mosunod Kaniya.”
Sa dihang si Elder Merryman namalandong sa iyang kasinatian sa seminary nga diha sa bangka nga panagatan, siya miingon nga kini “nakahimo og kalainan sa akong misyon.” Ang iyang klase sa seminary mitudlo kaniya og “daghang bililhon nga mga istorya gikan sa mga kasulatan.” Kadto nga mga istorya ug mga leksiyon, nakapaandam niya sa pagtudlo sa ebanghelyo pinaagi sa Espiritu. “Matag adlaw akong gamiton ang mga leksiyon nga akong nakat-onan sa seminary.”
Si Elder Merryman miila usab sa espirituhanong impluwensya sa iyang inahan sa pagdala sa iyang kaugalingong pamilya ngadto sa ebanghelyo. Miingon siya: “Ang akong inahan mao ang unang mananagat og mga tawo. Siya mipaambit sa kahayag sa ebanghelyo ngadto sa akong papa. Tungod kaniya, ang among pamilya nakatagamtam sa mga panalangin sa templo ug sa ebanghelyo ni Jesukristo sa among panimalay.”
“Ako nasayod nga ang gipahiuli nga ebanghelyo ni Jesukristo tinuod,” miingon si Elder Merryman. “Kini nakausab og mga kinabuhi alang sa maayo. Ako nakakita niini nga nahitabo sa mga tawo nga akong gitudloan samtang nagmisyon ko. Ang pagsunod sa ebanghelyo nakatabang nako nga maghinulsol ug magpaduol ngadto ni Jesukristo.”