“Kinahanglan Ba nga Kita Mahimong Hingpit Karon?” Alang sa Kalig-on sa Kabatan-onan, Peb. 2023.
Kataposang Pulong
Kinahanglan Ba nga Kita Mahimong Hingpit Karon?
Mga paghulagway pinaagi ni Emily E. Jones
Ang kasulatan gisulat aron sa pagpanalangin ug pag-awhag kanato, ug kini siguradong nagbuhat niini. Apan nakabantay ba kamo nga matag karon ug unya adunay tudling nga makita nga magpahinumdom kanato nga kulang pa ang atong nabuhat? Sama pananglit: “Kinahanglang magmahingpit kamo ingon nga hingpit ang inyong Amahan nga atua sa langit.” (Mateo 5:48). Uban niana nga sugo, gusto natong moundang ug dili na lang maningkamot sa pagsunod. Ang ingon nga celestial nga tumong daw dili nato makab-ot. Apan sigurado nga ang Ginoo dili gayod mohatag kanato og sugo nga nasayod Siya nga dili nato matuman.
“Oo, duol ngadto ni Kristo, ug paghingpit diha kaniya,” mihangyo si Moroni. “Mohigugma sa Dios uban sa tibuok ninyo nga gahom, ug kusog, niana … pinaagi sa iyang grasya kamo mahimo nga hingpit diha kang Kristo” (Moroni 10:32; emphasis gidugang). Ang atong bugtong paglaom alang sa tinuod nga kahingpitan maanaa diha sa pagdawat niini isip gasa gikan sa langit—dili kini nato “makab-ot” nga kita lang.
Gawas ni Jesus, walay perpekto nga mga binuhatan niining yutan-on natong panaw nga atong gisubay, busa samtang ania sa mortalidad maningkamot kita nga kanunayng molambo apan likayan kanang nanobra nga mga ekpektasyon sa atong kaugalingon ug sa uban.
Kon kita magpadayon, niana didto unya sa kahangtoran ang paghashas kanato mahuman ug makompleto—nga mao ang kahulogan sa kahingpitan diha sa Bag-ong Tugon.