“Anatomiya sa usa ka Magbubuhat og Kadaitan,” Alang sa Kalig-on sa Kabatan-onan, Peb. 2023.
Dali, Sunod Kanako
Anatomiya sa usa ka Magbubuhat og Kadaitan
Ania ang pipila ka proseso nga mahitabo diha sa sulod sa usa ka tawo nga naningkamot sa paghimo og kadaitan.
Paghulagway pinaagi ni Spencer Hale
Kadaghanan sa mga tawo gusto og kadaitan—alang sa ilang kaugalingon, sa ilang mga panimalay, sa ilang mga komunidad, ug sa kalibotan.
Ang Manluluwas mitudlo kanato nga kini magsugod kanato. Siya miawhag nato nga magmahimong magbubuhat og kadaitan (tan-awa sa Mateo 5:9). Ug si Presidente Russell M. Nelson miawhag nato sa “pagtapos sa mga kasungian nga nagdilaab sa inyong kasingkasing, sa inyong panimalay, ug sa inyong kinabuhi” (“Ang Gahom sa Kadasig sa Espirituhanong Paglambo,” Abr. 2022 kinatibuk-ang komperensiya [Liahona, Mayo 2022, 97]).
Maong, unsay mahitabo kon kamo mosupak sa usa ka tawo mahitungod sa butang nga importante kaninyo? Unsaon ninyo sa pagbaton og kadaitan samtang manalipod sa hugot nga gihuptan nga opinyon o pagbarog alang sa usa ka baroganan sa ebanghelyo sama sa pagpabilin nga putli sa sekswal nga paagi o dili manikas sa eskwelahan?
Mga Proseso diha sa Sulod
Kon kamo naningkamot nga mahimong magbubuhat og kadaitan, kamo naglig-on og piho nga mga proseso nga anaa sa sulod kaninyo sa emosyonal, mental, ug espiritwal kon moabot ang dili pagsinabtanay. Kini kabahin sa anatomiya sa usa ka magbubuhat og kadaitan. Ania ang pipila niini.
Pagpaminaw
Ang pagpaminaw nagpasabot nga mohatag og pagtagad sa unsay isulti sa mga tawo ug dili lamang maghunahuna kon unsay inyong sunod nga isulti. Ang usa ka tawo nga nakahibalo nga sila gipaminaw minos ra ang kahigayonan nga masuko.
Pagkahibalo sa Kaugalingon
Ang pagkahibalo sa kaugalingon mao ang paghunahuna unsay inyong isulti ug unsay inyong reaksiyon—ug sa pagkaamgo kon unsaon kini pagsabot sa uban. Nagpasabot usab kini sa pagkaamgo ngano nga inyong gisulti ug gibuhat kadtong mga butanga—ang nakapaaghat kaninyo.
Empatiya
Ang empatiya nagpasabot nga mobati unsay gibati sa uban. Maningkamot kamo sa paghunahuna sa ilang mga pagbati kon sila makadungog sa unsay inyong isulti ug makakita sa inyong lihok.
Kahibalo
Ang kahibalo mao ang pundohanan sa impormasyon ug mga kamatuoran nga kakuhaan. Apan ang labing importante, maglakip kini og espiritwal nga pagkat-on ug mga kasinatian nga inyong magamit ug mapaambit.
Pagdani
Ang pagdani mao ang kahanas sa pagtabang sa mga tawo nga mausab ang paagi sa ilang paghunahuna ug pagbati mahitungod sa usa ka butang. Si Elder Neil L. Andersen sa Korum sa Napulog Duha ka Apostoles miingon, “Ang magbubuhat og kadaitan … maawhagon sa pamaagi sa Manluluwas” (Abr. 2022 kinatibuk-ang komperensiya [Liahona, Mayo 2022, 18]). Ang pamaagi sa Manluluwas dili lamang mahitungod sa pagkahimong sakto. Mahitungod kini sa paghigugma sa kamatuoran ug sa mga tawo nga gusto ninyong paambitan niini. Ang pamaagi sa Manluluwas dili mahitungod sa pagsulti nga kamo ang sakto ug ang uban sayop. Mahitungod kini sa pagpaambit unsay sakto sa pamaagi nga tinud-anay nga makatabang sa mga tawo. Kini nagpasabot sa paghigugma sa kamatuoran ug sa mga tawo nga gusto ninyong paambitan niini.
Pailob
Sa paghimo og kadaitan, ang pailob nagpasabot nga magbaton og kontrol sa kaugalingon. Kini kanunay nga nagpasabot sa pagpahinumdom sa inyong kaugalingon nga kamo dili kinahanglan nga mobalda. Dili kamo kinahanglan nga masuko o maglagot. Dili kamo kinahanglan nga mopataas sa inyong tingog o pakusgan ang inyong tono. OK ra nga tugotan ang mga tawo nga mosulti, bisan kon kamo dakong supak. Ang pailob dili kahuyang. Kabahin kini sa pamaagi sa Manluluwas.
Kaalam
Alang sa magbubuhat og kadaitan, ang kaalam nagpasabot nga makahimo sa paghukom unsay labing maayo nga buhaton sa bisan unsa nga sitwasyon. Kinahanglan bang manggilabot kamo o mopalayo? Kinahanglan bang motanyag kamo og lohika, emosyonal nga suporta, kahimuot, pagpamatuod? Kamo makakita og posible nga mga sangpotanan sa lain-laing mga pagpili. Ang kaalam usa ka gasa gikan sa Dios nga moabot pinaagi sa kasinatian, pagtuon, ug pagsunod sa Iyang tambag.
Pagpaubos
Ang pagpaubos nagpasabot sa pagdawat nga kamo wala makahibalo sa tanan ug wala sa tanang mga tubag. Nagpasabot usab kini sa pag-ila nga ang Dios nakahibalo sa tanan ug makahatag ninyo sa mga tubag. Ang pagpaubos makatabang nato sa pagsiguro nga kita “dili motugot sa garbo ni pagkamapahitas-on sa pagguba sa [atong] kalinaw; nga ang matag tawo kinahanglan motamod sa iyang isigkatawo ingon sa iyang kaugalingon” (Mosiah 27:4).
Hugot nga Pagtuo
Ang pagbaton og hugot nga pagtuo diha kang Jesukristo nagpasabot sa pagsalig Kaniya ug sa pagpaningkamot sa pagtuman sa Iyang mga sugo, lakip na kon unsaon ninyo pagtagad ang mga tawo. Kamo makasiguro nga kon kamo magtinguha og kadaitan sa Iyang pamaagi, “ang tanang nga mga butang molihok alang sa inyong kaayohan” (Doktrina ug mga Pakigsaad 105:40).
Gugma
Ang pagbaton og gugma sa Dios diha sa atong mga kasingkasing mosangpot ngadto sa panagdait (tan-awa sa 4 Nephi 1:15). Motabang kini nato sa paghigugma sa atong isigka tawo ug mopahinumdom nato nga sila mga anak sa Dios.
Padayon sa Pagpaningkamot
Dili kanunayng sayon nga mahimong magbubuhat og kadaitan, ug kamo makahimo og mga sayop. Kitang tanan masayop. Apan ang Manluluwas miingon nato nga kon kita magbubuhat og kadaitan, kita mapanalanginan ug “pagatawgon nga mga anak sa Dios” (Mateo 5:9).
Makaayo ang pagpaningkamot sa paghimo og kadaitan. Ang Ginoo makapanalangin nato sa anatomiya sa pagbuhat og kadaitan aron nga kini mahimong ikaduhang bahin kanato. Dayon kita tinud-anay nga matawag nga mga anak sa Prinsipe sa Kalinaw.