Mga Sukaranan sa Ebanghelyo

Mga Panalangin sa Pagkapari

Christ Ordaining the Twelve Apostles [Si Kristo nga Nag-orden sa Napulog Duha ka Apostoles, ni Harry Anderson

Usa ka panalangin sa pagkapari gihatag pinaagi sa inspirasyon sa usa ka naghupot sa Melchizedek nga Pagkapari. Ang mga panalangin sa pagkapari mihimo niini nga posible alang sa tanan nga mga anak sa Dios nga modawat sa Iyang gahom, pagkaayo, kahupayan, ug giya.

Ang Pagkapari

Ang pagkapari mao ang gahom ug awtoridad sa Dios. Ang takos nga mga lalaki kinsa naghupot sa Melchizedek nga Pagkapari naglihok pinaagi sa ngalan ni Jesukristo kon sila mohatag og mga panalangin sa pagkapari. Samtang sila mohatag niini nga mga panalangin, sila mosunod sa ehemplo sa Manluluwas sa pagpanalangin sa uban.

Litrato pinaagi ni David Winters

Sa Unsa nga Paagi nga ang mga Panalangin Ihatag

Ang mga panalangin sa pagkapari ihatag pinaagi sa pagpandong sa mga kamot. Ang usa ka naghupot sa Melchizedek nga Pagkapari mobutang sa iyang mga kamot sa ulo sa tawo nga nagdawat sa panalangin. Dayon siya mohatag sa panalangin sumala sa giya sa Espiritu. Kadtong kinsa mohatag sa mga panalangin ug kadtong kinsa modawat niini magpakita og hugot nga pagtuo sa Dios ug pagsalig sa Iyang kabubut-on ug tayming.

Paghatag og Ngalan ug Panalangin sa mga Bata

Human matawo ang usa ka bata, usa ka naghupot sa pagkapari mohatag kaniya og ngalan ug panalangin (tan-awa sa Doktrina ug mga Pakigsaad 20:70). Kini sa kasagaran mahitabo sa miting sa pagpuasa ug pagpamatuod. Ang bata hatagan pag-una og ngalan. Dayon ang naghupot sa pagkapari mohatag sa bata og panalangin.

Mga Panalangin alang sa Masakiton

Ang mga naghupot sa Melchizedek nga Pagkapari makahatag og mga panalangin ngadto sa mga tawo kinsa masakiton. Kini nga matang sa panalangin adunay duha ka bahin: pagdihog gamit ang lana ug pagsilyo sa pagdihog. Una, ang usa ka naghupot sa pagkapari mobutang og usa ka tinulo sa lana sa oliba nga gipahinungod, o gipanalanginan diha sa ulo sa tawo ug mohatag og mubo nga pag-ampo. Dayon laing naghupot sa pagkapari mosilyo sa pagdihog ug mohatag sa tawo og usa ka panalangin samtang gigiyahan sa Espiritu Santo.

Mga Panalangin sa Kahupayan ug Tambag

Ang mga naghupot sa Melchizedek nga Pagkapari mahimong mohatag og mga panalangin sa kahupayan ug tambag ngadto sa mga sakop sa pamilya ug sa uban kinsa mangayo niini. Ang usa ka amahan kinsa naghupot sa Melchizedek nga Pagkapari mahimong mohatag og mga panalangin sa amahan ngadto sa iyang mga anak. Kini nga mga panalangin makatabang kon ang mga anak nag-atubang og espesyal nga mga hagit.

Pag-set Apart sa mga Miyembro nga Moserbisyo sa mga Calling

Kon ang mga miyembro sa Simbahan modawat og mga calling, sila hatagan og panalangin kon sila i-set apart aron moserbisyo. Usa ka lider sa pagkapari magpanalangin kanila uban sa awtoridad sa paglihok diha sa calling. Ang lider sa pagkapari mohatag usab kanila og usa ka panalangin aron matabangan sila sa ilang pagserbisyo.

Litrato pinaagi ni Shauna Stephenson

Patriyarkal nga mga Panalangin

Ang matag takos nga miyembro sa Simbahan makadawat og patriyarkal nga panalangin. Kini nga panalangin naghatag og personal nga tambag gikan sa Ginoo. Kini makahatag og giya ug kahupayan sa tibuok kinabuhi sa tawo. Kini mosulti usab sa kaliwatan sa tawo diha sa balay sa Israel. Ang na-orden lang nga patriyarka ang makahatag niini nga matang sa panalangin.

Gikan sa mga Kasulatan

Si Jesukristo mipanalangin sa masakiton pinaagi sa pagpandong sa mga kamot (tan-awa sa Lucas 4:40).

Ang mga miyembro kinsa moserbisyo diha sa Simbahan i-set apart niadtong kinsa adunay tukma nga awtoridad (tan-awa sa Doktrina ug mga Pakigsaad 42:11; Ang mga Artikulo sa Hugot nga Pagtuo 1:5).

Ang mga tawo nga masakiton makapangayo og mga panalangin sa naghupot sa pagkapari (tan-awa sa Santiago 5:14; Doktrina ug mga Pakigsaad 42:44).

Mga Pulong nga Hinumdoman

Miting sa puasa ug pagpamatuod: Usa ka miting sa sakramento diin ang mga miyembro sa kongregasyon mohatag sa ilang mga pagpamatuod. Pagpuasa sa mga miyembro—dili mokaon ug moinom nianang adlawa—sa kasagaran sa unang Dominggo sa bulan.

Pagdihog: Ang pagbutang sa gipahinungod nga lana isip kabahin sa panalangin sa pagkapari alang sa masakiton.

Patriyarka: Usa ka naghupot sa pagkapari kinsa na-orden sa paghatag og patriyarkal nga mga panalangin ngadto sa mga miyembro sa Simbahan diha sa iyang stake.

Pagkaplag pa og Dugang

Kon kamo adunay mga pangutana mahitungod sa mga panalangin sa pagkapari, mahimo kamong moistorya sa inyong tigpangalagad nga mga igsoong lalaki ug mga igsoong babaye, sa inyong mga lider sa ward o branch, o sa mga misyonaryo. Alang sa dugang nga impormasyon mahitungod sa pagpahigayon og mga panalangin sa pagkapari, tan-awa ang kapitulo 18 sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw sa ChurchofJesusChrist.org.