Digital Lamang: Mga Young Adult
Pagpalambo og “Dili Matarog nga Hugot nga Pagtuo” diha ni Jesukristo—ug sa Iyang mga Propeta
Posible ba nga makakaplag og kalinaw diha sa samok nga mga panahon?
Litrato nga giposingan sa mga modelo
Niadtong Pebrero 2010, ang akong bana ug ako nagserbisyo isip mga lider sa misyon sa Chile Santiago East Mission. Uban sa among mga misyonaryo ug sa taga-Chile nga mga tawo, nasinati namo ang makahahadlok nga pagtay-og sa yuta sa 8.8 nga gikusgon sa linog.
Usa kadto sa makalilisang nga mga kasinatian nga among nasinati sukad. Mitay-og kini sa among panimalay, apan wala kini makatay-og sa among hugot nga pagtuo diha ni Jesukristo ug sa Iyang mga propeta. Gani, nakapalig-on kini sa among kombiksyon nga ang buhing mga propeta makaandam nato alang sa tanang butang.
Siyam ka bulan sa wala pa kadto mahitabo, ang Ginoo miandam namo pinaagi sa usa sa Iyang pinili nga mga propeta, si Elder Richard G. Scott. Sa dihang siya mi-set apart namo aron moserbisyo isip mga lider sa misyon, siya mihatag namo og dinasig nga tambag. Miingon siya nga daghang higayon sa among misyon, ang Espiritu mopukaw namo sa sayong mga oras sa kabuntagon. Siya midapit namo nga isulat ug lihokon ang mga mensahe nga itudlo sa Espiritu namo, ug siya misaad namo nga kon buhaton namo kini, masinati namo ang mga milagro.
Kadto nga mga pulong natuman sa dihang ang Espiritu mipukaw nako duha ka semana lang sa wala pa ang linog, nagpadayag ngari nako nga kinahanglan namong andamon ang among mga misyonaryo alang sa usa ka linog. Gisunod namo kana nga pag-aghat, ug sa dihang miabot ang linog, nasinati namo ang mga milagro sa kalinaw ug seguridad nga gisaad ni Elder Scott namo.
Mopili sa Pagsunod sa Propeta
Kini nga kasinatian nagpahinumdom kanamo nga kita makakaplag og kalinaw dinhi sa samok nga kalibotan kon kita mopili sa pagsunod sa dinasig nga tambag sa atong mga propeta.
Ikonsiderar kini nga mga higayon sa dihang si Nephi nakakaplag og kalinaw pinaagi sa pagpili nga motuo sa iyang amahan, si propeta Lehi:
-
Sa dihang miingon si Lehi nga ang Dios nag-ingon kaniya nga dad-on ang iyang pamilya ug mobiya sa nagkaanam og kadaotan nga siyudad sa Jerusalem, si Nephi mipili sa paggamit sa “dili matarog nga hugot nga pagtuo” (2 Nephi 31:19) ug “nangamuyo ngadto sa Ginoo” (1 Nephi 2:16). Agi og tubag sa pag-ampo ni Nephi, ang Ginoo mipahumok sa kasingkasing ni Nephi. Apan si Nephi kinahanglan pa gihapon nga mopili nga motuo nga ang Dios nakigsulti ni Lehi. Si Nephi milihok diha sa hugot nga pagtuo ug nakahimo sa pagsunod sa iyang propeta nga amahan ngadto sa kamingawan uban sa kalinaw diha sa iyang kasingkasing.
-
Sa dihang si Lehi mipasabot ni Nephi ug sa iyang mga igsoong lalaki nga gusto sa Dios nga mobalik sila sa Jerusalem aron kuhaon ang mga palid nga tumbaga, si Nephi andam gihapon sa pagpili nga motuo nga ang iyang propeta nga amahan namulong sa kabubut-on sa Dios. Si Nephi nahinumdom sa tubag nga kanhi iyang nadawat. Siya namahayag uban sa iyang dili matarog nga tinguha nga mosalig: “Ako moadto ug mobuhat sa mga butang nga ang Ginoo nagsugo” (1 Nephi 3:7).
Sa dihang nagbasa ug namalandong ko ni Nephi, nakapangutana ko sa akong kaugalingon: “Aduna ba koy igong dili matarog nga hugot nga pagtuo nga mopili nga mosunod sa propeta, bisan kon Siya modapit nako sa paghimo sa lisod nga mga butang? Unsa nga espirituhanong buhat nga kinahanglan nakong himoon sa pagpalambo og dili matarog nga hugot nga pagtuo?”
Mopili sa Paghimo og Epirituhanong Buhat
Tulo ka espirituhanong buluhaton ang nakatabang nako nga madugangan ang akong hugot nga pagtuo diha sa Dios ug pagsalig nga Siya mamulong nato pinaagi sa Iyang propeta:
-
Mag-ampo ko. Moadto ko sa usa ka hilom nga dapit, moluhod, ug mangamuyo sa Dios nga tabangan ko nga makasabot ug mahimong mas matuohon. Mangutana ko og sinsero nga mga pangutana ug mangayo og tabang nga himoong mapaubsanon ang akong kasingkasing ug mapahinumdoman nga ako dili makakita sa mahangtoron nga hulagway sa akong kinabuhi, sama sa Iyang mahimo.
-
Magtuon ko sa akong mga kasulatan, labi na sa Basahon ni Mormon, tungod kay kini adunay dakong gahom sa pagdapit sa Espiritu Santo ngari sa akong kinabuhi. Mangita ko sa mga pulong ug hugpong sa mga pulong nga may kalabotan sa hilisgotan nga akong gipangutana. Magtuon ko sa mga pulong sa buhing mga propeta. Magbasa ko sa akong patriyarkal nga panalangin. Mamalandong ko. Magsag-ulo ko. Gani magbasa ko og kusog.
-
Maminaw ko. Akong palungon ang kalibotan pinaagi sa pagpalong sa akong selpon, internet, ug ubang kakompetensiya nga tingog. Maminaw ko sa akong hunahuna ug sa akong kasingkasing tungod kay diha niana ang Espiriu Santo makigsulti kanako (tan-awa sa Doktrina ug mga Pakigsaad 8:2–3).
Kon himoon nako ang gikinahanglan nga espirituhanong buhat, kanunay ko nga makadawat og malinawong kasiguroan nga ang propeta nagsulti sa kamatuoran. Usahay ang akong mga pagkompirmar moabot dayon. Usahay nagkinahanglan kini og panahon. Apan ako mopamatuod nga ang mga tubag sa kanunay moabot gayod.
Human sa pagkamatay ni Nephi, ang iyang manghod nga lalaki nga si Jacob mipadayon sa pagdapit nato nga mopili sa paghimo og espirituhanong buhat aron sa pagpalambo og dili matarog nga hugot nga pagtuo diha sa atong mga propeta.
Si Jacob nagsaad: “Busa, kami nangita sa mga propeta, ug kami adunay daghan nga mga pagpadayag ug sa espiritu sa pagpanagna; ug ingon nga aduna sa tanan niini nga mga saksi kami nakaangkon og usa ka paglaom, ug ang among hugot nga pagtuo nahimo nga dili matarog, hangtod nga kami sa pagkatinuod makasugo diha pinaagi sa ngalan ni Jesus ug ang mao nga mga kahoy motuman kanamo, o ang mga bukid, o ang mga balud sa dagat” (Jacob 4:6).
Kita mahimo nga mopili sa paghimo og espirituhanong buhat nga kinahanglanon aron sa pagpalambo og dili matarog nga hugot nga pagtuo diha ni Jesukristo ug sa atong buhing mga propeta. Kon kita mohimo niini, kita magantihan og matam-is, mahangtoron nga mga panalangin nga modan-ag sa dalan sa pakigsaad sa pagkadisipulo ug maghatag nato og kalinaw ug kaisog nga atong gikinahanglan aron makasugakod sa bisan unsa ka grabe nga kaguliyang sa atong mga kinabuhi.