Sa Unsang Paagi ang Manluluwas Makatabang Kanako?

Si Jesukristo “miadto siya sa tanang dapit ug naghimog mga maayong butang” (Mga Buhat 10:38): Siya miayo sa usa ka sanlahon (tan-awa sa Mateo 8:2–3). Siya miayo sa sulugoon sa usa ka opisyal, kinsa mibati nga dili takos apan mituo nga ang Manluluwas motabang kaniya (tan-awa sa Mateo 8:5–13). Siya mitanyag sa Iyang mga disipulo og kalinaw atol sa usa ka unos (tan-awa sa Mateo 8:23–27). Sa dihang Siya nakakita sa usa ka babaye kinsa naguol sa kamatayon sa iyang bugtong anak, Siya mihupay kaniya ug mihatag kaniya og paglaom, dayon mipabangon sa iyang anak gikan sa mga patay (tan-awa sa Lucas 7:11–15).

Kalihokan

Kita makabati sa gahom sa Manluluwas karon kon kita magpakita og hugot nga pagtuo diha Kaniya. Basaha ang usa sa mga asoy gikan sa basahonon niining semanaha sa Dali, Sunod Kanako. Tan-awa kon giunsa pagtubag sa Manluluwas ang mga panginahanglan ug hugot nga pagtuo sa mga tawo.

Pamalandongi ug hisgoti ang mosunod nga mga pangutana aron ikonsiderar kon giunsa pagtabang sa Manluluwas kanimo sa imong kinabuhi:

Kanus-a ako mibutang sa akong hugot nga pagtuo diha sa Manluluwas ug mibati sa Iyang pag-ayo sa (emosyonal, mental, espirituwal, o sa pisikal)?
Kanus-a ako mibati sa Iyang kalinaw?
Kanus-a ako nakadawat sa wala damha nga tabang gikan sa Manluluwas?
Kanus-a ako nakakita sa Iyang kamot pinaagi sa usa ka milagro o malumo nga kaluoy?
Sa akong kinabuhi, unsaon nako sa pagpalig-on sa akong hugot nga pagtuo diha Kaniya ug modawat sa Iyang tabang?