Digital Lamang: Mga Papa sa Ulahing mga Adlaw
Ang Milagro Nga Labing Mahinungdanon
Ang tagsulat nagpuyo sa USA.
Nag-ampo ko sa Manluluwas nga malooy namo ug ayohon ang among anak nga babaye. Ang milagro nga among nadawat dili mao ang akong gilaoman.
Litrato nga giposingan sa modelo
Adunay daghang ehemplo bahin sa kaluoy sa Manluluwas diha sa Bag-ong Tugon. Human giayo ang tawo nga nasudlan og daotang espiritu, miingon si Jesus, “Pauli sa imong panimalay ug sultihi sila unsa kadako ang nahimo sa Ginoo kanimo ug unsa siya kamaluluy-on kanimo” (Marcos 5:19). Sa panahon nga ang mga tawo nagkinahanglan og pagkaon, si Kristo “naluoy niining mga tawhana” (Marcos 8:2) ug mihimo nga ang pipila ka pan ug mga isda mapakaon sa upat ka libo nga mga tawo (tan-awa sa mga bersikulo 1–9).
Ang akong asawa ug ako usab nagkinahanglan sa milagroso nga kaluoy ni Jesukristo aron ayohon ang among bag-ong natawo nga anak nga babaye. Ang mga doktor nakadiskobre og dakong tibogol diha sa iyang abdominal cavity. Sila mihiling niya nga adunay infantile neuroblastoma. Tungod kay duha pa lang ka semana ang iyang pangidaron ug ang malignant (mahimong kanser) nga tibogol dako kaayo, ang iyang resulta sa umaabot [prognosis] dili malaomon.
Puno sa hugot nga pagtuo diha sa abilidad ni Kristo nga ayohon siya, ako mihatag niya og panalangin sa pagkapari sa wala pa kami moadto sa ospital alang sa mga bata. Atol niana nga kasinatian, walay mga pulong mga misulod sa akong hunahuna. Blangko kadto. Naningkamot sa paglitok og bisan unsa nga mga pulong, ang hugpong sa mga pulong nga nasulti lamang nako mao, “Ikaw anaa sa mga kamot sa Dios.”
Nasagmuyo niana nga kasinatian, mipadulong kami sa ospital alang sa mga bata diin ang medikal nga grupo mopahigayon sa operasyon sa pag-biopsy sa tibogol, tan-awon kon mikatap kini, ug tinoon kon unsa, kon aduna man, ang ilang mahimo sa among anak nga babaye. Sa wala pa ang operasyon, ako mihatag na usab sa akong anak nga babaye og panalangin sa pagkapari sama sa miagi; ang masulti lamang nako nga mga pulong, “ikaw anaa sa mga kamot sa Dios.”
Human sa among pagtugyan sa among anak nga babaye ngadto sa surgeon, ang akong asawa ug ako nanghilak sa tumang kaguol. Sa dihang wala nay luha nga moagas sa among mga mata, milingkod ko sa kasagmuyo. Misugod ko sa paghunahuna kon ang maluloy-on nga milagro nga among gipangayo wala ba gihatag tungod kay ang akong hugot nga pagtuo o katakos dili igo. Ngano nga si Kisto mihimo man og daghang talagsaong mga buhat sa kaluoy alang sa uban apan dili mohimo ngari namo?
Gibati nako nga giaghat sa pagbasa sa istorya ni Lazaro nga makita diha sa Juan 11. Ang panagsultihanay tali ni Kristo ug ni Marta ang nakatandog nako. Si Marta morag naglaom sa samang butang nga akong gilaoman, nga dili pa ulahi alang sa akong anak nga babaye nga mamaayo sa milagrosong paagi. Agi og tubag sa hangyo ni Marta, si Jesukristo miingon, “Ako mao ang pagkabanhaw, ug ang kinabuhi: ang mosalig kanako bisan siya mamatay, mabuhi siya:
“Ug ang tanan nga buhi ug nagsalig kanako dili na gayod mamatay. Motuo ba ikaw niini?” (Juan 11:25–26)
Niining higayona, si Jesukristo morag nakigsulti nako. Akong gibati nga kon makita pa lang sa akong mga mata, si Kristo tingali naglingkod tupad nako nga naghulat sa akong tubag sa Iyang pangutana. Samtang namalandong ko sa akong tubag, ang pagsalig milukop sa akong kalag, ug mitubag ko og, “Oo, mituo gayod ako sa Anak sa Dios ug sa tanan nga Iyang gitanyag.”
Ang laing pangutana misantop sa akong hunahuna: “Unsa ang gihimo ni Jesukristo nga posible alang sa mga bata nga namatay sa wala pa moabot sa edad sa pagkamay-tulubagon?”
Usab, sa akong hunahuna, ako mitubag, “Nga ang tanan nga mga bata kinsa namatay sa wala pa sila moabot sa edad sa pagkamay-tulubagon luwas didto sa celestial nga gingharian sa langit” (Doktrina ug mga Pakigsaad 137:10).
“Motuo ka ba niini?” mao ang tubag. Usab, ang pagsalig milukop sa akong kalag, ug mitubag ko og, “Oo.”
Dayon misantop sa akong hunahuna, “Nan nakasabot ka nga makauban niya ang Dios ug mamahimo gihapon nga sama sa Dios. Unsa pa man ang gusto nimo alang niya? Matagamtam gihapon nimo kana nga kinabuhi uban niya kon ikaw magpabiling matinud-anon sa mga pakigsaad didto sa templo nga gipadayag ni Jesukristo.”
Ako nakaingon nga ang labing mahinungdanong milagro sa akong kinabuhi sa kanunay mao ang Pag-ula ni Jesukristo. Wala na koy mas gusto pa alang sa akong anak nga babaye kay sa nga siya makadawat sa tanang panalangin nga gihatag ni Jesukristo pinaagi sa Iyang maulaong sakripisyo ug sa sagrado nga mga ordinansa sa templo. Usa ka maluloy-on nga milagro nga gihatag ngari kanato—ang milagro nga labing mahinungdanon.