Alang sa mga Ginikanan

Pagsalig sa Gahom ug sa mga Propeta sa Ginoo

Litrato pinaagi ni Ravell Call, Deseret News

Minahal nga mga Ginikanan,

Sa atong nag-anam kagubot nga kalibotan, sayon ra kaayo ang pagbati og kahadlok ug kawalay kasiguroan. Apan kon kita modangop ni Jesukristo alang sa kahupayan, Siya makahatag nato og kalinaw diha sa mga unos sa kinabuhi. Basaha ang mga artikulo niini nga isyu aron makita kon sa unsang paagi nga ang Manluluwas makatabang ninyo sa pagsugakod sa inyong mga hagit.

Mga Panaghisgotan sa Ebanghelyo

Ang Manluluwas Andam sa Pagtanyag og Kalinaw diha sa Gubot nga mga Panahon

Uban sa inyong pamilya, basaha ang artikulo ni Elder Uchtdorf diha sa pahina 4 mahitungod kon sa unsang paagi nga ang pagsalig sa makaabag nga gahom ni Kristo makahatag og kalinaw diha sa lisod nga mga sitwasyon. Hisgoti og dungan ang pipila ka paagi nga si Jesus nagtanyag og kahupayan. Unsa ang inyong mabuhat aron sa pagdapit sa Iyang gahom nganha sa inyong kinabuhi?

Sa Unsang Paagi nga ang Pagkapari Mopanalangin sa Atong Pamilya?

Basaha ang artikulo sa pahina 22 mahitungod sa mga panalangin sa pagkapari. Dapita ang mga sakop sa pamilya sa pagpaambit sa mga higayon nga sila nakadawat og panalangin sa pagkapari. Unsay ilang gibati? Sa unsang paagi nga ang mga panalangin nakatabang nila? Aduna bay panalangin nga mahimong makatabang sa usa ka sakop sa pamilya karon?

Ang Ginoo Mogamit sa Iyang Propeta sa Pagtabang Nato sa Pag-ugmad og Kaisog

Diha sa artikulo sa pahina 30, si Elder Sikahema naghisgot kon sa unsang paagi nga ang pagsunod sa mga pagtulon-an sa propeta nakatabang niya nga lig-ong mobarog sa iyang gituohan ug mga sumbanan atol sa iyang trabaho isip propesyonal nga American football player ug sa tibuok niyang kinabuhi. Human sa pagbasa niini nga artikulo, mahimo ninyong paambiton ang matag sakop sa inyong pamilya og usa ka higayon diin ang pagsunod sa propeta nakatabang nila nga makabaton og kaisog.

Kalingawan sa Pamilya sa Dali, Sunod Kanako

Kanunay nga Naglambo Matag Adlaw

Isip mga miyembro sa gipahiuli nga Simbahan ni Jesukristo, kita ang responsable sa pagtabang nga molambo ang gingharian sa Dios dinhi sa yuta. Sa Mateo 13:31–32 nag-ingon:

“Ang gingharian sa langit samag liso sa mustasa nga gidala sa usa ka tawo ug gipugas niya diha sa iyang uma:

“Kini mao ang labing gamay sa tanang mga liso apan sa makatubo na kini, kini ang labing dako sa tanang tanom nga ulotanon, ug mahimong kahoy.”

1. Manglingkod nga mag-alirong ug motikongkong og maayo sama sa gamayng liso sa mustasa.

2. Papuli-puliha ang tanan sa pagngalan og kalihokan nga tingali ilang buhaton matag adlaw sa pagtabang sa Simbahan nga molambo (mohatag sa ilang pagpamatuod, mopaambit og kasulatan diha sa social media, mopaambit sa kamatuoran sa ebanghelyo ngadto sa usa ka higala, ubp.).

3. Matag higayon nga ang usa ka tawo mohisgot og kalihokan nga makatabang sa paglambo sa Simbahan, ang matag usa mas motul-id sa paglingkod ug dayon mosugod sa pagbarog hangtod nga tul-id na sila nga nagbarog.

4. Hisgoti uban sa inyong pamilya kon nganong importante man nga ang matag tawo mohimo sa iyang bahin aron ikatampo ngadto sa paglambo sa Simbahan.

Gisumiter ni Brenda Slade

Gikan sa Alang sa Kalig-on sa mga Kabatan-onan nga Magasin

Notebook sa Komperensiya

Gamita kini nga kapanguhaan sa pagpangandam alang sa kinatibuk-ang komperensiya ug pagkuha og daghan gikan sa mga pakigpulong sa komperensiya.

Kalinaw diha sa mga Unos sa Kinabuhi

Si Elder Uchtdorf nagtudlo kon sa unsang paagi nga ang Manluluwas mopahunong sa mga unos sa atong kinabuhi ug maghatag nato og kalinaw.

Andam sa Pagserbisyo og Misyon

Samtang ang kabatan-onan mag-andam sa pagserbisyo og misyon, ania ang pipila sa importante nga mga butang nga mahimo nilang pokusan.

Giunsa sa Manluluwas sa Paghatag og Bili sa mga Babaye

Tan-awa kon sa unsang paagi nga ang Manluluwas nagmaisugon sa pagpakita og kamabination ug pagtahod ngadto sa mga babaye, ug pagkat-on kon unsaon pagsunod sa Iyang ehemplo.

Gikan sa Higala nga Magasin

Pag-andam alang sa Bunyag

Pangita og mga istorya ug mga kalihokan sa karon nga bulan nga Higala aron matabangan ang inyong mga anak sa pagkat-on mahitungod sa bunyag ug sa ilang unang mga pakigsaad.

Kalinaw diha sa Unos

Basaha ang gihulagway nga istorya sa kasulatan mahitungod ni Jesus nga mipahunong sa unos. Dayon pagkat-on mahitungod sa usa ka batang babaye gikan sa Peru nga nakakaplag og kalipay atol sa usa ka linog.

Magsunod ni Jesus diha sa Kiribati

Himamata ang among higala nga si Scott ug pagkat-on kon sa unsang paagi nga siya nagsunod ni Jesus. Dayon pagbasa pa og dugang mahitungod sa mga isla sa Kiribati.

Alang sa Gagmay nga mga Higala

Pangita og mga istorya ug mga kalihokan labi na alang sa atong labing bata nga mga magbabasa, ingon man mga tabang sa pagtuon sa pagtudlo sa mga baroganan gikan sa Dali, Sunod Kanako ngadto sa gagmay nga mga bata.