Digital Lamang
Kalinaw diha ni Jesukristo—Bag-ong mga Mensahe gikan sa mga Propeta ug Apostoles
Tan-awa kon unsa ang bag-ohay lang nga gitudlo sa mga buhing propeta diha sa social media mahitungod sa kalinaw nga atong bation pinaagi ni Jesukristo.
Paghulagway pinaagi ni James Johnson
Niadtong Oktubre 2022 nga kinatibuk-ang komperensiya, si Presidente Russell M. Nelson namulong bahin sa gahom ni Jesukristo sa pagdala og kalinaw, paglaom, ug kapahulayan ngari sa atong mga kinabuhi: “Kamo makabuntog sa espirituhanon ug emosyonal nga makakapoy nga mga sala sa kalibotan, lakip sa pagkaarogante, garbo, kasuko, imoralidad, kasilag, kahakog, kasina, ug kahadlok. Bisan pa sa mga makalibog dili ensakto nga mga kamatuoran nga anaa sa atong palibot, kamo makakita og tinuod nga kapahulayan—nagpasabot nga kahupayan ug kalinaw—bisan taliwala sa inyong labing makahasol nga mga problema.”1
Ang mga sakop sa Unang Kapangulohan ug sa Korum sa Napulog Duha ka Apostoles namulong sa kinatibuk-ang komperensiya kon sa unsang paagi nga si Jesukristo makahatag kanato og kalinaw, paglaom, ug kapahulayan. Mipaambit usab sila og mga mensahe mahitungod niini nga mga hilisgotan diha sa social media, lakip na sa mosunod:
Mopaambit sa Kahayag ni Jesukristo
“Tungod kay daghan kanato ang nanlimbasog sa mga hagit sa milabay nga kapin sa tuig, mahimong lisod ang pagkahibalo kon asa kita modangop alang sa kalinaw.
“… Dapiton ko kamo sa pagpakigbahin sa kahayag sa Manluluwas nga si Jesukristo ngadto niadtong nagpalibot kaninyo. Ang Iyang kahayag ug ang Iyang gugma mao ang moayo sa atong mga kasingkasing … atol sa tanang mga hagit sa kinabuhi.”
Presidente Russell M. Nelson, Facebook, Dis. 16, 2021, facebook.com/russell.m.nelson.
Mosunod sa mga Pagtulon-an ni Jesukristo
“Kitang tanan nagsagubang sa makapaukyab ug wala damha nga mga panghitabo.
“Taliwala sa samang ka walay kasiguroan, adunay usa lamang ka paagi nga mobati og kalinaw—ang tinuod nga kalinaw nga lapas sa tanang salabotan. Kana nga kalinaw makaplagan diha sa hugot nga pagtuo ngadto ni Ginoong Jesukristo.
“Niining Dominggo sa Lukay, dapiton ko kamo sa paghimo niining umaabot nga semana nga tinud-anay nga balaan pinaagi sa paghinumdom—dili lamang sa mga lukay nga giwara-wara sa pagpasidungog sa pagsulod ni Jesus ngadto sa Jerusalem—apan pinaagi sa paghinumdom sa mga palad sa Iyang mga kamot.
“Human sa tanan nga gibuhat ni Jesukristo alang kaninyo, ako modapit kaninyo sa pagbuhat og butang karong semanaha sa pagsunod sa Iyang mga pagtulon-an. Pwede ninyong himoon nga mas kinasingkasing ang inyong mga pag-ampo. Mahimo kamong mopasaylo og tawo o motabang og higala nga nanginahanglan. Makasugod kamo karon og usa ka bag-o nga espirituhanong tumong.”
Presidente Russell M. Nelson, Facebook, Mar. 28, 2021, facebook.com/russell.m.nelson.
Magtinguha sa Hingpit nga Kalipay Nga Mao ang Mahangtoron
“Kita nagpuyo sa kapanahonan sa mahagiton nga mga panahon: mga gubat ug hungihong sa mga gubat, mga linog, mga alimpulos, mga tsunami, ug mga kalagmitan sa pinansyal nga mga kalamidad. Labi pa gyod, ang mga hiyas ug mga sumbanan nga gitahod sulod sa liboan nga katuigan gibaliwala ug gisalikway na karon. Ang kahakog ang mipuli sa pagserbisyo. Ang daotan gitawag og maayo, ug ang maayo gitawag og daotan.
“Bisan kon ang mga kasingkasing sa mga tawo mopakyas kanila, kamo mosulti nila nga sila kinahanglang magmadasigon ug magmalaomon. Sa kanunay adunay mahagiton nga mga panahon. Kami, ang mga henerasyon sa inyong mga katigulangan, nakasugakod sa grabe nga mga hagit, ug ingon man usab kamo. Ang tubag sa tanan niini nga mga hagit mao ra gayod gihapon. Kita adunay Manluluwas, ug Siya mitudlo nato kon unsay atong kinahanglang buhaton.
“‘Gisulti ko kini kaninyo aron nga dinhi kanako makabaton kamog kalinaw. Paantoson kamo sa kalibotan apan ayaw kahadlok kay nabuntog ko na ang kalibotan’ (Juan 16:33).
“Ang Basahon ni Mormon nagtudlo nga ang mga anak sa Dios naingon nga unta sila makabaton og hingpit nga kalipay (2 Nephi 2:25). Kanang importante nga kamatuoran mahinungdanon sa atong pilosopiya sa kinabuhi. Ang matang sa hingpit nga kalipay nga gipasabot diha sa mga kasulatan dili mao ang kalipay nga atong masinati diha sa temporaryo nga taphaw nga kalingawan. Ang kalipay nga gitagana alang kanato malungtaron.
“Ako nagtuo nga ang labing dakong kalipay makaplagan pinaagi sa ebanghelyo ni Jesukristo, nga nagpasabot sa atong gigikanan isip mga espiritu, sa paglalang sa kalibotan, sa atong katuyoan sa mortalidad, ug sa atong padulngan sa kahangtoran.
“Hatagi og bili ug palamboa ang panagsuod sa inyong mga pamilya. Ampingi ug gamita ang iyong mga oportunidad sa pagmugna og mahangtorong kaminyoon. Ug hatagi og bili ang inyong panaghigalaay ug ang mga oportunidad sa pagkat-on ug pagserbisyo, kay kana nga mga paningkamot magdala usab ngadto sa hingpit nga kalipay nga mahangtoron.”
Presidente Dallin H. Oaks, Facebook, Peb. 8, 2022, facebook.com/dallin.h.oaks.
Mosalig sa Langitnong Amahan ug ni Jesukristo
“Gusto ko nga mopaambit og mensahe nganha kaninyo nga mga batan-on. Gimahal ko kamo. Gusto kong motabang ninyo. Karon ang mga panahon nga kitang tanan nagkinahanglan og gugma ug sa nag-uban niini nga pagpakabana alang sa uban. Giunsa ninyo ug sa inyong mga kaedad pagdumala ang daghang hagit nga inyong giatubang?
“Ang personal nga mga hulga ug mga epekto sa COVID-19 diha sa edukasyon ug ekonomiya siguradong nakapagrabe sa kabalaka sa tanan, ug, sama sa inyong nasayran, ang kabalaka sa ubang mga butang ingon usab ka grabe diha sa mga batan-on.
“Bisan unsa pa man ang mga hinungdan sa dakong pag-orsa sa kabalaka ug sa nag-uban nga mga problema sa kahimsog sa pangisip, ang atong unang pangdepensa sa kanunay mao ang atong hugot nga pagtuo diha ni Ginoong Jesukristo. Kita misalig sa Iyang mga saad sa kalinaw ug diha sa paglimpyo nga nahimong posible tungod sa Iyang Pag-ula. Imbes magpadala sa kabalaka ug kahadlok nga mao ang kinaiya sa inyong henerasyon, salig diha sa mga kasiguroan sa mahigugmaong Langitnong Amahan. Ang propesyonal nga tambag kinahanglan usab nga ilakip niini nga proseso kon angay.
“Ako moawhag kaninyo nga mosalig sa tambag sa Iyang mahigugmaon nga Anak, ang Manluluwas nga mihatag nato og kasiguroan nga ‘kon kamo andam dili kamo mahadlok’ (Doktrina ug mga Pakigsaad 38:30).”
Presidente Dallin H. Oaks, Facebook, Nob. 10, 2020, facebook.com/dallin.h.oaks.
Mosunod sa mga Sugo
“Bisan niining lisod nga panahon, ang mga baroganan nga kami isip mga lider sa Simbahan nanghinaot nga inyong masabtan mao gihapon ang mga sukaranan sa hugot nga pagtuo diha ni Jesukristo ug pagkamasulondon sa Iyang ebanghelyo nga kanunay namong gitudlo.
“Kon nagmasulundon kita sa mga sugo, ang Ginoo misaad nato, “Kaninyo ihatag ko ang akong kalinaw: dili sama sa hinatagan sa kalibotan ihatag ko kaninyo. Ayaw kamog kabalaka ug ayaw kahadlok” (Juan 14:27).
“Ang kalinaw ug kahimayaan mao ang gisaad nga mga epekto sa pagsunod sa mga sugo ug pagsalig diha sa Ginoo.
“Ang paagi sa pagpadayon klaro: ‘Salig sa Ginoo sa bug-os mong kasingkasing. Ayaw gayod pagsalig sa imong kaalam. Hinumdomi siya sa tanan mong buhaton ug tultolan ka niya sa matarong nga dalan’ (Mga Panultihon 3:5–6).”
Presidente Dallin H. Oaks, Facebook, Sept. 10, 2020, facebook.com/dallin.h.oaks.
Moserbisyo sa Usag Usa
“Nagpuyo kita sa kalibotan nga walay kasiguroan, komplikado, ug makalibog. Ang mga gipangayo sa matag adlaw nga kinabuhi makapaluya nato. Ako nagtuo nga adunay usa ka yano apan tiunay nga baroganan nga makatabang nato nga makalingkawas niining makatanggong nga mga kutay sa mga hagit aron makakaplag og kalinaw sa hunahuna ug kalipay: pagserbisyo sa usag usa.
“Adunay daghang gagmay ug yano nga mga paagi ug mga kahimtang diin makahimo kita sa pagserbisyo ug paghigugma sa uban diha sa panimalay, sa simbahan, ug sa atong mga komunidad.
“Ang dagkong mga butang mapahinabo pinaagi sa yano ug gagmay nga mga buhat sa kamabination ug pagserbisyo. Matigom kini ngadto sa usa ka kinabuhi nga puno sa gugma alang sa Langitnong Amahan, debosyon sa buhat ni Ginoong Jesukristo, ug pagbati sa kalinaw ug kalipay sa matag higayon nga kita motabang sa usag usa.”
Presidente M. Russell Ballard, Facebook, Sept. 1, 2022, facebook.com/mrussell.ballard.
Modangop ngadto sa Ginoo aron Mahisakop
“Ang Pagkabanhaw sa atong Manluluwas nga si Jesukristo naghatag og paglaom nako ug sa tanan nga mituo sa Iyang ngalan bisan pa sa mga hagit nga atong giatubang sa kinabuhi. Sama nianang unang kabuntagon sa Pasko sa Pagkabanhaw, kita mahimong momata ngadto sa usa ka bag-ong kinabuhi diha kang Kristo, uban sa bag-o ug talagsaon nga mga posibilidad ug bag-ong mga kamatuoran samtang kita modangop sa Ginoo aron mahisakop.”
Presidente M. Russell Ballard, Facebook, Abr. 17, 2022, facebook.com/mrussell.ballard.
Mag-ampo Kanunay
“Kon ang mga butang nagkaguliyang, sama sa nahitabo sa atong panahon karon, ang Ginoo gusto nga kita modangop ngadto Kaniya pinaagi sa pag-ampo.
“Naghunahuna ko kanunay kaninyo kinsa nanag-antos, nabalaka, nahadlok, o mibati nga nag-inusara. Akong ipaniguro sa matag usa kaninyo nga ang Ginoo nakaila kaninyo, nga nasayod Siya sa inyong mga problema ug mga kasubo, ug nga Siya nahigugma kaninyo—sa hilabihan gayod, sa personal nga paagi, halawom nga paagi, ug hangtod sa hangtod. Palihog pag-ampo kanunay ug pahibaloa ang inyong Amahan sa Langit sa mga gibati sa inyong kasingkasing.
“Matag gabii kon mag-ampo ko, mohangyo ko sa Ginoo nga panalanginan ang tanan nga nabug-atan sa kasubo, sa kasakit, sa pag-inusara, ug sa kaguol. Nasayod ako nga ang ubang mga lider sa Simbahan mipalanog sa samang pag-ampo. Ang among mga kasingkasing, sa indibidwal ug sa tiningob nga paagi, maanaa kaninyo, ug ang among mga pag-ampo gipaabot sa Dios alang kaninyo.
“Ingon nga ako mipadangat og panawagan alang sa pag-ampo niadtong Oktubre 2020 nga kinatibuk-ang komperensiya, ako mopalanog na usab niana nga pagdapit karon. Bisan unsa pa ang paagi sa inyong pag-ampo, palihog gamita ang inyong pagtuo—bisan unsa pa ang inyong tinuohan—ug pag-ampo alang sa inyong nasod ug sa inyong mga lider sa nasod. Walay mas importante pa karon kay sa mga tawo sa tanang nasod nga nag-ampo alang sa balaanong pagdasig ug giya.”
Presidente M. Russell Ballard, Facebook, Mayo 6, 2021, facebook.com/mrussell.ballard.
Maningkamot sa Pagsunod Kaniya
“Labaw sa tanan, ako mapasalamaton ni Ginoong Jesukristo ug sa Iyang ehemplo ngari nako. Kon kita maningkamot nga mosunod Kaniya ug mahimong Iyang matinud-anong mga disipulo, makakaplag kita og kalinaw, kamaya, ug kalipay bisan pa sa kalibotanong mga kasamok nga naglibot kanato.”
Presidente M. Russell Ballard, Facebook, Nob. 27, 2020, facebook.com/mrussell.ballard.
Mangayo og mga Panalangin ug Giya
“Nahibalo ako sa gahom sa pag-ampo tungod sa akong kaugalingon nga kasinatian. Bag-ohay lang nag-inusara ako sa akong opisina. Bag-o lang ko nahuman sa usa ka proseso sa pagpatambal sa akong kamot. Nangitom kini ug nilagom, naghubag, ug sakit kaayo. Samtang naglingkod ko dapit sa akong lamesa, dili ako makatutok sa importante ug kritikal nga mga butang tungod kay nabalda ako sa kasakit niini.
“Miluhod ako sa pag-ampo ug mihangyo ako sa Ginoo nga iya akong tabangan nga makatutok sa akong trabahoon aron kini mahuman. Mibarog ko ug mibalik ngadto sa nagtipun-og nga papel sa akong lamesa. Dihadiha dayon, ang katin-aw ug ang pagpokus miabot sa akong hunahuna, ug akong nahuman ang dinalian kaayong mga butang sa akong atubangan.
“Ang kasamtangan nga samok nga sitwasyon sa kalibotan ingon og makalisang kon maghunahuna kita sa nagtipun-og nga problema ug mga hagit. Apan maoy akong tinuorayng pagpamatuod nga kon kita mag-ampo ug mohangyo sa Langitnong Amahan sa gikinahanglang mga panalangin ug giya, atong mahibaloan kon sa unsang paagi kita makapanalangin sa atong mga pamilya, mga silingan, mga komunidad, ug gani sa mga nasod nga atong gipuy-an.”
Presidente M. Russell Ballard, Facebook, Okt. 26, 2020, facebook.com/mrussell.ballard.
Mosuporta sa Usag Usa
“Ang kinabuhi mahimong mahagiton … apan kon kita mosuporta sa usag usa ug kon kita mosalig ni Jesukristo, Siya motabag nato nga makasugakod sa mga pagsulay sa kinabuhi.”
Elder Jeffrey R. Holland, Twitter, Sept. 14, 2022, twitter.com/HollandJeffreyR.
Modangop ngadto ni Jesukristo
“Ang pagtuon sa kinabuhi sa atong Manluluwas mas makapaduol kanato ngadto Kaniya. … Dapiton ko kamo sa paggahin og panahon aron makaila sa Prinsipe sa Kalinaw—sa Iyang pagkatawo, kinabuhi, mensahe, ug pagkabanhaw. Kon magkadako ang atong makat-onan kabahin Niya ug mosunod sa Iyang ehemplo, mas malinawon ang atong pagbati diha sa mga panahon sa kasamok.”
Elder Jeffrey R. Holland, Facebook, Dis. 20, 2021, facebook.com/jeffreyr.holland.
“Sukad sa kinatibuk-ang komperensiya, nagpadayon ko sa pagpamalandong kon unsaon nga kita makakaplag og Diosnong kahupayan samtang anaa kita niining mortal nga kalibotan. Nakita nato ang hilabihang panagbikil, kasuko, ug sagad nga kawalay pagtahod sa atong palibot. Maayo na lang, ang karon nga henerasyon walay Ikatulong Gubat sa Kalibotan nga awayon, ni kita nagsinati og tibuok kalibotan nga pagkaguba sa ekonomiya sama kaniadtong 1929 nga misangpot ngadto sa Dakong Pagkahagsa sa Ekonomiya.
“Kita, hinuon, nag-atubang og sama sa Ikatulong Gubat sa Kalibotan nga dili usa ka away aron sa pagpukan sa atong mga kaaway apan usa ka mando sa pag-andam sa mga anak sa Dios sa dugang pagbinatiay sa matag usa ug sa pagtabang nga maayo ang mga samad nga atong nakita diha sa kalibotan nga nagsinati og panagbikil. Ang Dakong Pagkahagsa sa Ekonomiya nga atong giatubang karon adunay gamay nga kalabotan sa dayag nga pagkawala sa atong mga tinigoman ug adunay mas dakong kalabotan sa hilom nga pagkawala sa atong pagsalig sa kaugalingon, uban sa tinuod nga kakulangan sa hugot nga pagtuo ug paglaom ug gugmang putli libot kanato.
“Apan ang mga himan nga atong gikinahanglan sa pagmugna og usa ka mas hayag nga adlaw ug pagpa-uswag og usa ka ekonomiya sa tinuoray nga kaayo diha sa katilingban buhong nga gisangkap diha sa ebanghelyo ni Jesukristo. Busa sa usa ka kalibotan nga ‘ginatugpo sa unos, ug wala paglipaya,’ ingon nga gisulti sa Ginoo nga kini mao, unsaon nato sa pagkaplag sa unsay Iyang gitawag og ‘ang pakigsaad sa … kalinaw’? Kita makakaplag niini pinaagi sa pagdangop ngadto Kaniya kinsa miingon nga Siya malooy kanato ug ‘uban sa walay kataposang pagkamabination’ mohatag og kalinaw sa atong mga anak (tan-awa sa Isaias 54:8, 10–11, 13).”
Elder Jeffrey R. Holland, Facebook, Ago. 10, 2021, facebook.com/jeffreyr.holland.
Magpraktis og Kalinaw sa Personal nga Paagi
“Bisan pa sa makahahadlok nga mga panagna ug makapahasol nga mga kasulatan nga nagpahayag nga ang kalinaw pagakuhaon gikan sa yuta sa kinatibuk-an, ang atong pinalangga nga si Russell M. Nelson nagtudlo nga kana wala magpasabot nga kini pagakuhaon gikan sa matag usa kanato!
“Busa, … maninguha kita sa pagpasiugda og kalinaw sa atong kaugalingong pamaagi, mogamit sa grasya ug sa makaayo nga haplas sa Pag-ula ni Ginoong Jesukristo ngari sa atong kaugalingon ug sa atong mga pamilya ug sa tanan niadtong atong matabangan sa atong palibot.
“Taliwala kanato adunay daghang nanlimbasog sa lainlaing gidaghanon sa mga hagit––pisikal o emosyonal, sosyal o pinansyal, o daghan pa nga mga matang sa kahasol. Apan sa daghan niini dili igo ang atong kalig-on nga makatubag nga kita lang mismo sa atong mga kaugalingon, kay ang kalinaw nga atong gikinahanglan dili ang matang sa ‘hinatagan sa kalibotan’ (Juan 14:27). Dili, alang sa tinuoray nga malisod nga mga problema kita nagkinahanglan sa unsay gitawag sa mga kasulatan nga ‘mga gahom sa langit’ (Doktrina ug mga Pakigsaad 121:36).
“Bisan pa sa pagluib ug kasakit, pagdagmal ug kawalay kaluoy, ug pagpas-an sa natigom nga mga sala ug mga kasub-anan sa tawhanong pamilya, ang Anak sa buhing Dios milantaw sa taas nga dalan sa mortalidad, mitan-aw kanato niining tapos sa semana, ug miingon: ‘Kaninyo ibilin ko ang akong kalinaw, kaninyo ihatag ko ang akong kalinaw: dili sama sa hinatagan sa kalibotan ihatag ko kaninyo. Ayaw kamog kabalaka ug ayaw kahadlok’ (Juan 14:27).”
Elder Jeffrey R. Holland, Facebook, Abr. 3, 2021, facebook.com/jeffreyr.holland.
Mobutang og Hingpit nga Pagsalig diha ni Jesukristo
“Ang akong kasingkasing nagbangotan tungod sa makapasakit nga kagul-anan ug makapabalaka nga mga kahadlok nga tingali inyong nasinati niining higayona. Hinuon, tungod sa sakripisyo sa atong minahal nga Manunubos, ang kamatayon walay kahapdos, ang lubnganan walay kadaogan, mga sayop himoong sakto, ug si Satanas walay mahangtorong gahom.
“‘Mahimong may paghilak sa gabii, apan sa pagkabuntag mobanos ang kalipay’ (Salmo 30:5).
“Ang hingpit, halawom, ug mahangtoron nga gugma ni Kristo makahatag nato og pagsalig nga mopadayon latas sa atong mga kahadlok. Tungod sa Iyang mahimayaong Pagkabanhaw, kita makabutang sa atong hingpit nga pagsalig diha kaniya, bisan diha sa labing lisod nga mga panahon.
“‘Ang Dios mao ang atong dalangpanan ug kusog’ (Salmo 46:1).
“‘Hunonga ang inyong panag-away ug ilha ako nga mao ang Dios’ (Salmo 46:10).”
Elder Dieter F. Uchtdorf, Facebook, Abr. 17, 2022, facebook.com/dieterf.uchtdorf.
Makaila sa Ginoo
“Pipila kaninyo mahimong motuo nga si Jesukristo mao ang Anak sa Dios ug nga Siya mitanyag og walay kinutoban ug mahangtoron nga maulaong sakripisyo. Apan mahimo usab kamong motuo nga ang Iyang Pag-ula magamit alang sa tanan—apan dili kanimo. Mopakita kamo og hugot nga pagtuo sa Manluluwas apan mahimong dili motuo nga ang tanang gisaad Niya nga mga panalangin maanaa kaninyo o makatabang sa inyong kinabuhi. Ako modapit kaninyo nga dili lang mahibalo kabahin sa Ginoo apan makaila usab Kaniya.
“Gitambagan kita sa Manluluwas sa pagpakahimo nga sama Kaniya. Mahimo kitang makaila sa Ginoo samtang magtinguha kita pinaagi sa gahom sa Iyang Pag-ula sa pagkahimong sama Kaniya. Mahimo kitang makaila sa Ginoo kon kita moserbisyo Kaniya ug maghago sa Iyang gingharian. Mas hingpit kitang makaila sa Ginoo kon kita dili lang motuo Kaniya apan motuo usab Kaniya ug sa Iyang mga gipangsaad.
“Ang pagtuo Kaniya—pagdawat nga tinuod ang Iyang gahom ug mga saad—magdala og panglantaw, kalinaw, ug hingpit nga kalipay sa atong kinabuhi. Ang Iyang Pag-ula indibidwal; personal kini. Ug kini alang kanatong tanan.”
Elder David A. Bednar, Facebook, Mar. 14, 2021, facebook.com/davida.bednar.
Mosunod sa Kahayag ug Ehemplo sa Manluluwas
“Niining matahom nga adlaw sa Pasko sa Pagkabanhaw, mamalandong ug magmaya kita sa tanang nabuhat sa Manluluwas alang kanato. Siya mihatag sa iyang kinabuhi isip usa ka puli nga Pag-ula, sa pagbuntog sa kamatayon ug paghatag og katubsanan alang sa tanang katawhan. Ako mosaad nga ang pagsunod sa Iyang kahayag ug ehemplo magdala kanato og dugang nga kalipay, kamaya, ug kalinaw niining kinabuhi kay sa bisan unsang butang.”
Elder Quentin L. Cook, Facebook, Abr. 17, 2022, facebook.com/quentin.lcook.
Magbaton og Pagsalig diha ni Jesukristo
“Si Rosana ug ako nalipay nga mamulong bag-ohay lang ngadto sa mga estudyante sa BYU–Idaho. Migahin kami og panahon sa paghisgot sa mga kabalaka nga gipahayag sa daghang batan-on kon unsaon nga imong mabati ang pagsalig ug kalinaw mahitungod sa umaabot kon ang kahimtang sa kalibotan dili ingon niana ka nindot.
“Ako mopaniguro ninyo nga ang atong pagsalig diha sa atong Manluluwas nga si Jesukristo molig-on nato sa pagpadayon sa paglihok sa kinabuhi, bisan pa sa mga hagit nga atong gisagubang.
“Ang pagduol ngadto kaniya dili makagapos nato o makahatag og limitasyon sa atong kagawasan! Kondili, makahatag kini nato og rason alang sa lig-on nga paglaom ug magsangkap og lig-on nga angkla sa atong mga kalag, nga maghatag nato og malungtaron nga kalinaw sa kahiladman nga kita kinahanglang magpakabuhi niini nga mga panahon ug makakaplag og kapahulayan diha Kaniya.
“Kon kita dili mopalayo sa kahayag nga atong nadawat gikan sa Manluluwas, dili kita mobati og kahaw-ang sa atong mga kinabuhi apan usa ka kahingpitan ang molukop sa kinahiladman nga mga bahin sa atong mga kalag.
“Pinaagi kini sa Manluluwas nga si Jesukristo ug sa Iyang makaayo nga maulaong sakripisyo nga kita makabarog nga tul-id ug lig-on, bisan nag-atubang og kalisdanan. Ang makaayo nga gahom sa Manluluwas mopuno sa atong mga kalag og kalinaw, kahayag, pagsabot, hingpit nga kalipay, ug gugma.”
Elder Ulisses Soares, Facebook, Mayo 20, 2021, facebook.com/soares.u.