Digital Lamang
Mga Sugo—usa ka Talagsaon nga Koleksiyon sa mga Pagdapit ug mga Panalangin
Ako gusto nga mobuhat sa tanan nga gisugo sa Ginoo, apan ako naghunahuna kon unsaon nako nga kining tanan mohaom sa akong eskedyul.
Sa Iyang tibuok nga mortal nga pangalagad, ang Ginoo midapit sa mga indibidwal sa paghatag tanan nga ilang gipanag-iya ug mosunod Kaniya (tan-awa, pananglitan sa, Mateo 8:18–22; Marcos 3:31–35; Marcos 10:17–22).
Samtang kita dili sugoon sa pagbiya sa mga sakayan sa pangisdaan o sa atong tanang katigayonan, duha ka paagi nga kita tingali sugoon sa paghatag Kaniya sa atong tanan ipaagi sa atong panahon ug pagkamasulondon.1
Tungod sa tanang mga kalihokan sa atong inadlaw nga mga listahan sa buhatonon, tingali mobati ta nga nabug-atan sa pagbuhat sa tanan nga gidapit sa Ginoo ug sa Iyang mga propeta nga atong buhaton. Pananglitan:
-
Paghimo og makahuluganon, dili dinalidali nga pag-ampo
-
Pagtuon sa Basahon ni Mormon kada adlaw
-
Pagtuon sa Dali, Sunod Kanako matag semana
-
Pagtambong sa templo kanunay (kon mahimo)
-
Pagsiksik ug paghimo sa atong mga tree sa family history ug sa pagpahigayon og buhat sa ordinansa pinaagi sa proxy
-
Pagpakigbahin sa ebanghelyo
-
Pagpangalagad
-
Pag-apil sa home evening
-
Pagsulat sa journal
-
Pagserbisyo diha sa mga callings, sa atong mga panimalay, ug sa komunidad
-
Pagdawat og mga pagdapit sa pagtuon sa hilisgotan gikan sa mga lider sa Simbahan (pananglitan, ang pagdapit ni Presidente Nelson sa pagtuon sa tanang mga bersikulo sa kasulatan mahitungod sa Manluluwas2 o sa pagtuon mahitungod sa gahom sa pagkapari sa Dios3)
-
Ug daghan pa
Samtang balansehon ang mga responsibilidad sa pamilya, mga panaghigalaay, panimalay, trabaho, mga eskedyul sa mga anak, ug ubang mga interes, tingali ingon og makahadlok o imposible ang pagbuhat sa tanan nga anaa sa ibabaw. Naagian na ni nako, ug usahay kana nga kabalaka moabot gihapon sa hunahuna. Apan akong gitan-aw kini nga hunahuna sa lahi nga paagi karon tungod sa mga pag-aghat nga akong nadawat mga tuig na ang milabay.
Makausa ako nag-ampo mahitungod kon unsaon nako nga mas makasunod sa Manluluwas, napahinumdoman ko nga ako tingali naghimo na sa mga aksiyon sa ibabaw sa mas matinud-anong paagi. Samtang ako makanunayon sa pipila niini, ang uban niini ingon og wala nako mahimo kanunay.
Uban sa inspirasyon sa pagpaningkamot nga magmakanunayon sa tanan niini, napahinumdoman usab ako sa duha ka mapanagnaon nga mensahe:
-
1 Nephi 3:7: “Ako moadto ug mobuhat sa mga butang nga ang Ginoo nagsugo, kay ako nasayod nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila.”
-
Sa dihang si Presidente Henry B. Eyring, Ikaduhang Magtatambag sa Unang Kapangulohan, namulong sa kinatibuk-ang komperensiya bahin sa pagsulat sa mga ebidensya sa impluwensya sa Ginoo sa kinabuhi sa iyang pamilya kada adlaw, siya miingon: “Nagsulat ako og pipila ka mga linya matag adlaw sulod sa mga katuigan. Wala gayod koy gisal-angan nga adlaw bisan unsa pa ko kakapoy o unsa ako kasayo mosugod pagka-ugma.”4
Nakahukom ko nga akong ibutang ang akong pagsalig diha sa mga pulong ni Nephi ug hinumdoman nga ang Ginoo dili mohatag nako og bisan unsa nga sugo (o koleksyon niini) nga dili Siya motabang nako nga matuman kini. Ug nadasig usab ako sa pasalig ni Presidente Eyring nga matinud-anong mosunod sa pagdapit sa inadlaw nga pagsulat sa journal bisan kon siya mibati og kapoy kaayo sa pagbuhat sa ingon. Kon, sa iyang nagkapuliki nga eskedyul, magpabilin siyang masulundon kon gikapoy, nan nasayod ko nga ako makahimo usab.
Mao nga nakahukom ko sa pagpakita og dugang nga hugot nga pagtuo sa abilidad sa Ginoo sa pagtabang nako nga matuman ang tanan nga Iyang gidapit nako nga buhaton. Ako nag-ampo ngadto sa Langitnong Amahan ug ako usab nagtinguha sa “tambag sa Ginoo” (Alma 37:37) nga masayod sa tukmang panahon o unsa kasubsob ang kinahanglan nakong igahin sa matag pagdapit ug sa sugo. Nasayod ko nga ang pipila sayon ra tumanon tungod kay kini kabahin na sa akong inadlaw nga pagkadisipulo. Ug ako usab nakahibalo nga ako dili makahimo sa pipila ka kalihokan, sama sa family history, sa sama nga kadugayon nga mahimo sa ubang tawo. Apan ako nasayod nga ako makahimo og pipila ka butang kanunay. Ako usab misalig nga niini nga mga sitwasyon, sama sa gisaad ni Presidente Russell M. Nelson, “ang Ginoo ganahan og paningkamot.”5 Ako nasayod nga Siya usab mihatag og bili sa duha ka gagmayng sinsilyo sa biyuda (tan-awa sa Lucas 21:1–4) ug bisan unsa nga akong mahatag. Human sa tanan, matag usa kanato makahatag og lainlaing mga halad sa lainlaing mga panahon sa atong kinabuhi o gani sa matag adlaw sa semana.
Human makahimo og plano sa mainampoong paagi kon unsaon nga mahimo ang mga butang nga wala nako mabuhat kanunay nga angay nakong buhaton, ako nag-ampo alang sa balaan nga tabang sa paglihok niana nga plano. Misalig usab ako sa saad ni Presidente Ezra Taft Benson (1899–1994) sa dihang siya mitambag:
“Kon atong unahon ang Dios, ang tanan nga butang mapahimutang sa tukma nilang dapit o mawala kini sa atong kinabuhi. Ang atong gugma sa Ginoo modumala sa mga pag-angkon alang sa atong pagbati, sa gipangayo sa atong panahon, sa mga kaayohan nga atong gitinguha, ug sa pagpahimutang sa atong mga prayoridad.
“Kinahanglan unahon nato ang Dios kay ni bisan kinsa diha sa atong mga kinabuhi.”6
Nakahukom ko nga unahon ang Ginoo sa akong eskedyul, sa akong mga aksiyon, ug sa akong kasingkasing ug sa pagbiya sa akong masumbingayon nga “mga pukot sa pagpangisda” ug mas maayo nga ipahinungod ang akong kinabuhi ngadto Kaniya.
Nagpasabot ba kana sa paghimo og espirituhanon nga mga butang sulod sa 24 ka oras sa usa ka adlaw? Dili buot ipasabot nga mogahin sa matag minuto sa pagbasa sa mga kasulatan o paghimo og family history. Apan nagpasabot kini sa tinuyo nga pagdapit sa Langitnong Amahan ug ni Jesukristo ngadto sa matag bahin sa akong adlaw. Sa paghalad sa akong kaugalingon ngadto Kanila niana nga paagi, ako napahinumdoman nga ang tanang mga butang nga temporal mga espirituhanon usab (tan-awa sa Doktrina ug mga Pakigsaad 29:34–35) ug nga ang Ginoo mao ang hatagan og pagtagad sa tanan nakong paningkamot (tan-awa sa Alma 34:17–27). Ug kini nagpasabot nga magpabiling hatagan og pagtagad ang unsay mas labing importante samtang ako maningkamot nga mahimong mas mapaningkamoton nga disipulo.
Ang gagmay nga mga kausaban misugod sa paghimo og kalainan ug nakahatag og dalan sa pagpalambo sa pagkamasulundon. Kon mogamit ko sa akong telepono sulod sa pipila ka minuto sa buntag, magamit nako kana nga oras diha sa FamilySearch’s Family Tree nga app imbis motan-aw nga walay tumong diha sa social media. Samtang maghulat ko sa linya, makadalikyat ko sa pagtawag, pagpadala og text aron sa pagpangalagad ngadto sa usa ka higala, o makigsulti sa usa ka tawo nga anaa sa akong duol.7 Natapos nako ang akong adlaw pinaagi sa pagsulat sa akong journal imbis nga anaa sa kalingawan. Makamata ko nga adunay mas maayong tumong ug usa ka inadlaw nga eskedyul sa pag-una sa espirituhanong pagtuon sa dili pa moabot ang ubang mga makabalda nianang adlawa. Gisunod nako ang tambag ni Presidente Nelson sa “paghimo og regular nga pakigkita sa Ginoo—moadto sa Iyang balaan nga balay—dayon tumanon kanang pakigkita nga hingpit ug malipayon.”8 Ako nakahibalo sa mga higayon diin ako sa kasagaran mabalda sa maayong mga butang ug hinuon misulay sa paggamit niana nga panahon alang sa labing maayo nga mga butang.9
Ug kahibalo ba kamo? Nakahimo ko sa pagpasigo sa tanan ngadto sa akong eskedyul ug sa gihapon adunay panahon sa paglingawlingaw sa ubang mga butang. Ingon og imposible nga makakita siya og panahon alang sa tanang butang apan nahimo niya, apan ako nasayod nga kini mao ang laing paagi nga ang Ginoo mohimo og mga milagro sa atong mga kinabuhi nga dili nato mapasabot.
Sama sa gitudlo ni Sister Michelle D. Craig, Ikaduhang Magtatambag sa Kinatibuk-ang Kapangulohan sa Young Women: “Kamo ug ako makahatag kon unsay anaa nato ngadto kang Kristo, ug Iyang pilo-piloon ang atong mga paningkamot. Unsay inyong mahalad sobra na kaayo—bisan pa sa inyong tawhanong mga kahuyang—kon mosalig kamo sa grasya sa Dios.”10 Ako mibati (ug padayon nga mobati) nga kana nga saad natuman sa akong kinabuhi, ug akong nakaplagan nga ang akong kinabuhi sa tinuod dili kaayo problemado, dili kaayo, kon ako maninguha sa pagbuhat sa tanan nga gisugo sa Ginoo. Akong nakaplagan nga ang mga sugo ug mga pagdapit sa Ginoo makahatag og dugang kabuhong sa akong kinabuhi kay sa bisan unsa nga butang.
Samtang ako wala na unta masurprisa sa unsay nanghitabo samtang ako milihok inubanan sa hugot nga pagtuo ug nakasinati og mga milagro nga nakapahimo nga posible sa pagbuhat sa tanan nga gisugo sa Ginoo, nahibulong gihapon ko kon giunsa ako pagtabang sa Langitnong Amahan ug ni Jesukristo nga matuman kon unsa ang ingon og imposible kaniadto sa akong eskedyul (tan-awa sa Lucas 1:37). Wala lang ang Ginoo “moandam og paagi alang [nako] aron [ako] makatuman sa butang nga iyang gisugo” kanako, apan ang dugang kamaya ug katumanan nga miabot sa akong kinabuhi mas labaw pa kay sa akong gipaabot. Ug ako nagsugod sa pagkaamgo nga kini nga mga paningkamot mas mahitungod kon kinsa ako mamahimo kay sa mahitungod unsa ang akong gibuhat.11 Ang dako nga bahin niana nga pagkahimo migiya nako nga makakita nga ang akong kasingkasing nagkaduol ngadto sa Langitnong Amahan ug ni Jesukristo ug nagtabang nako nga mahimong mas sama Kanila.
Si Elder D. Todd Christofferson sa Korum sa Napulog Duha ka Apostoles sa makausa miingon, “Usahay, ang ubang mga tawo naglibog, naghunahuna nga ang mga sugo mga restriksyon o limitasyon nga nakapalisod sa kinabuhi, nga makapawala sa mga oportunidad o sa kalipay o sa kahayahay sa kinabuhi. Sa pagkatinuod, ang mga sugo makapanalipod nato ug makagiya nato ngadto sa kalipay. Kini wala magpugong apan hinoon sa paghimong posible—nga motugot kanato sa pagkab-ot niining kinabuhia ug sa sunod—sa unsay atong tinuoray nga tinguha ug unsay gusto sa atong Langitnong Amahan, kinsa nahigugma kanato, nga kita mamahimo.
“… Busa, … palihog ayaw og reklamo kabahin sa mga sugo. Ayaw og ingon, ‘Dili nako gusto og dugang,’ hinoon sulti og, ‘Sige pa. Gusto ko nga molambo. Gusto ko nga malipay. Gusto ko nga mahisama sa akong Langitnong Amahan. Ug gipakita sa mga sugo kon unsaon nako pagbuhat niini. Ipakita niini ang dalan diha sa akong atubangan.’”12
Samtang matinud-anon nakong gihimo ang akong labing maayo sa pagsunod sa matag mapanagnaon nga pagdapit, kini nagtabang nako nga mas magpadayon diha sa dalan sa pakigsaad ug mahimong mas sama sa akong Manluluwas, kinsa naghatag sa atong hingpit nga ehemplo sa pagsunod sa tanan nga gisugo Kaniya sa Amahan. Samtang nagpadayon, ako nakaamgo nga ang pag-una niini nga mga sugo ug ang mapanagnaon nga pagdapit dili mahitungod sa pagkab-ot og mga butang sa listahan sa buhatonon apan mahitungod sa paagi sa pagpuyo sa pagtabang nako nga molambo. Nakita nako kini isip mga oportunidad sa pagtahod sa akong mga pakigsaad sa templo samtang akong ipahinungod ang akong kasingkasing ug ang akong eskedyul ngadto sa Ginoo isip timailhan sa akong gugma alang Kaniya ug tinguha nga mahimong sama Kaniya. Samtang ako nagtinguha sa pagtahod nianang mga pakigsaad, gibati nako ang katinuod sa pagdawat sa “gahom sa pagbuhat sa tanan nga gusto sa Dios nga [akong] buhaton.”13
Karon gusto nako nga ihulagway ang matag pagdapit gikan sa Dios isip usa ka pundohanan sa kamaya ug mga panalangin nga naghulat kanato kon kita yanong mopili sa pagsulod ngadto sa katubigan. Ang Langitnong Amahan gusto nga mopanalangin nato lapas sa pagsabot, ug Siya naghatag nato og mga sugo nga makapahimo nianang mga panalangin nga moabot pinaagi sa atong pagkamasulundon (tan-awa sa Doktrina ug mga Pakigsaad 130:20–21). Kinahanglan lang nga mopili ta nga mosalig Kaniya ug sa Iyang abilidad sa pagtabang nato nga makatuman sa Iyang tanan nga mga sugo. Kon ang atong mga kasingkasing, mga kamot, ug panahon gihatag ngadto Kaniya, kita makakita Kaniya nga mohimo og mga milagro sa atong mga kinabuhi.