“Tabang ug Paglaom gikan sa Kinatibuk-ang Komperensiya,” Liahona, Mar. 2023.
Mga Tingog sa mga Santos sa Ulahing mga Adlaw
Tabang ug Paglaom gikan sa Kinatibuk-ang Komperensiya
Wala ako magdahom nga makapaminaw sa tibuok pakigpulong sa kinatibuk-ang komperensiya nga naghisgot mahitungod gayod sa akong nasinati.
Litrato sa tagsulat ug sa iyang pamilya pinaagi ni Cody Bell
Human matawo ang akong unang anak, ako nag-antos og depresyon pagkahuman sa pagpanganak. Usa kini ka maanindot nga panahon sa akong kinabuhi tungod kay ako adunay anak nga lalaki, apan dili ko makasinati og kalipay sa hingpit nga adunay usa ka masuso tungod kay ako adunay depresyon.
Atol niining panahon sa pagsulay, ako nag-ampo pag-ayo ngadto sa Langitnong Amahan. Ako mihangyo Kaniya sa pagtabang nako nga makalabang niining malisod nga pagsulay. Sa nagkaduol na ang kinatibuk-ang komperensiya nianang tinglarag, ako nag-ampo usab nga ako makakaplag og kahupayan gikan sa mga pakigpulong sa mga lider sa Simbahan.
Samtang ako naminaw sa mga pakigpulong atol sa unang sesyon sa kinatibuk-ang komperensiya, ako nagsugod sa pagbati og kahupayan. Dayon sa ikaduhang sesyon, si Elder Jeffrey R. Holland sa Korum sa Napulog Duha ka Apostoles namulong mahitungod sa depresyon. Siya miingon nga ang depresyon makahimo nato nga mobati nga “sama sa usa ka sudlanan nga nabuak”1 (Salmo 31:12). Wala ako magdahom nga makapaminaw sa tibuok pakigpulong bahin sa eksato nga akong nasinati.
Kini usa ka espesyal nga panahon alang kanako. Ang pakigpulong nakatabang nako nga makasabot nga ang Langitnong Amahan nahigugma nako ug nga Siya nakahibalo kanako. Siya nakasabot unsay akong naagian. Siya gusto nga motabang nako ug mohatag nako og paglaom. Siya mihimo niana pinaagi sa mga pulong ni Elder Holland.