“Ang Tanan Mamaayo Ra,” Liahona, Mar. 2023.
Mga Tingog sa mga Santos sa Ulahing mga Adlaw
Ang Tanan Mamaayo Ra
Ang mga oras ingon og dugay kaayo hangtod usa sa mga doktor miduol sa akong inahan diha sa hulatanan nga kwarto.
Litrato ni Russell M. Nelson pinaagi ni Eldon K. Linschoten
Sa sayong bahin sa mga 1980, ang akong amahan, kinsa nag-antos gikan sa grabe nga sakit sa kasingkasing, miagi og operasyon sa kasingkasing nga among gilaoman nga makapalugway sa iyang kinabuhi.
Nianang higayona, ang moderno nga paagi nga gigamit sa mga doktor bag-o sa Uruguay. Ang mga doktor miilis sa aortic valve uban sa artipisyal nga valve. Sa kataposan, kana nga paagi nahimong komon ug nakaluwas og dili maihap nga mga kinabuhi.
Tungod kay ang operasyon naglakip niining modernong pamaagi sa operasyon, daghang mga cardiologist ang mitambong nag-obserbar sa operasyon. Samtang ang mga doktor nag-opera, ang akong inahan naglingkod nga nabalaka diha sa hulatanan nga kwarto. Dugay kaayo silang naghulat.
Kami nagmaya sa dihang among nahibaloan nga ang operasyon hingpit nga malamposon. Sa paggawas gikan sa kwarto sa operasyon, usa sa mga doktor mibulag gikan sa ubang mga doktor ug miadto sa hulatanan nga kwarto. Siya usa ka nagbisita nga doktor kinsa mianha sa Uruguay aron sa pagdumala sa operasyon.
Siya miduol sa akong inahan, mihunong, ug masigurohon nga mihikap sa abaga. Dayon, mitan-aw sa iyang mga mata, siya miingon, “Ang tanan mamaayo ra.”
Ang doktor sakto. Ang akong amahan nabuhi pa og laing 24 ka tuig, nagserbisyo sa Ginoo sa iyang tibuok kasingkasing—karon himsog—hangtod sa kataposang adlaw sa iyang kinabuhi.
Atol sa labing bag-ong kinatibuk-ang komperensiya, ang akong inahan gipahinumdoman nianang espesyal nga pagbisita daghang mga tuig na ang nakalabay. Gani, siya mapahinumdoman nga matag higayon nga ang nagbisita nga doktor—si Presidente Russell M. Nelson—namulong ngadto sa mga Santos.
Ang tanang mga propeta sa Ginoo espesyal ngari nato sa ubang paagi. Ang uban mga espesyal tungod kay sila nagserbisyo isip Presidente sa Simbahan samtang kita mga batan-on. Ang uban mga espesyal tungod kay sila nagserbisyo isip Presidente sa dihang kita nabunyagan. Alang sa akong inahan ug nako, si Presidente Nelson espesyal tungod kay siya nasayod nga ang matag seryoso nga medikal nga pamaagi makapatandog dili lamang sa pasyente apan ingon usab sa mga minahal niana nga pasyente. Siya nasayod nga ang mga sakop sa pamilya kinahanglan og mga pulong sa kadasig, kalig-on, ug kasiguroan kon ang panglawas o kinabuhi sa usa ka minahal anaa sa kakuyaw.
Kami mapasalamaton kanunay sa mga pulong sa kasiguroan ni Presidente Nelson sa dugay nang panahon sa Uruguay ug alang sa iyang kinabuhi sa pagserbisyo sa Langitnong Amahan ug sa mga anak sa Langitnong Amahan.