Pagdapit sa Espiritu nganhi sa Atong Kinabuhi

Ang kataposang panihapon sobra pay kay sa usa ka pagpangaon alang sa mga Apostoles: milagroso ug sagrado kadto nga gutlo nga maanaa kauban sa presensya sa ilang Ginoo. Ang mga pag-ampo sa sakramento mipadangat og susamang milagro ngari nato ingon nga kita napanalanginan nga ang Iyang Espiritu magauban kanato (tan-awa sa Doktrina ug mga Pakigsaad 20:77, 79). Sa unsang paagi nga kita, sama sa mga Apostoles, mobati nga duol sa presensya sa Manluluwas?

Diha sa iyang artikulo sa pahina 4, gipasabot ni Elder David A. Bednar nga ang “atong sagrado nga responsibilidad mao ang pagpalambo og balaang mga kinaiya nga magdapit sa Espiritu sa Ginoo nga magauban kanato sa tanang panahon.” Ang pagsunod sa tambag dinhi sa iyang artikulo makatabang kanato sa pagpalambo og balaang mga kinaiya nga, bisan kon gamay man kini, modala kanato paduol ni Jesukristo.

Sa pahina 40, gipaambit nako ang akong kasinatian sa pagkamatay sa akong bana kinsa nasakit samtang nagpuyo mi sa Sidlakang Dapit sa Uropa. Bisan og lisod kadto nga panahon para nako, kasinatian kadto nga misantop sa hunahuna dihang nakigbisog ko kon unsaon sa pag-istorya mahitungod sa milagro bahin sa pagsinati sa kamanggiloy-on sa Manluluwas sa wala dahomang mga paagi.

Dako kaayong milagro ang mobati sa presensya sa Ginoo sa mga panahon sa atong pag-inusara, pagsulay, ug mga kahuyang. Makapili kita sa pagpalambo og balaang mga kinaiya nga magdapit sa Espiritu nganhi sa atong kinabuhi. Mag-ampo ko nga kita magtinguha sa kalig-on ug sa giya nga andam ihatag sa Dios kanato pinaagi sa langitnong gasa sa Espiritu Santo.

Matinuoron,

Presidente Susan H. Porter

Kinatibuk-ang Presidente sa Primary