Sa Miyerkules, Tawaga Siya og Oscar

Ni Richard M. Romney

Bisan pa sa pag-atubang sa mga epekto sa pangidaron ug sa kanser, si Ken nakakita og makahuluganong paagi sa pagserbisyo sa iyang mga silingan.

lalaki nga nagbalhin sa usa ka basurahan — Si Brother Williams modala sa mga basurahan alang sa iyang 28 ka silingan. “Kita kinahanglan nga mosunod sa ehemplo sa Manluluwas ug mohimo og maayo ngadto sa mga tawo,” siya miingon.

Kada Miyerkules, ang 81 anyos nga si Ken Williams magsul-ob og samang sinina ug kalo. Ang sinina ug kalo naghulagway sa usa ka inila nga karakter, si Oscar, kinsa nagpuyo sa usa ka basurahan. Kana nga Oscar nailhan nga mahigugmaong bagulbolan. Si Ken nailhan lang nga mahigugmaon.

Si Ken maghulat sa sulod sa iyang atubangan nga pultahan ug maminaw. Maghulat siya sa tingog sa trak sa basura. Ang mga tingog importante ni Ken tungod kay hanap na kaayo ang iyang panan-aw. Dugang pa niana siya miagi og 14 ka tuig sa chemotherapy, ug bisan pa man siya andam nga mogawas ug motabang sa iyang mga silingan—gani, 28 ka buok kanila.

Si Ken mabination nga nailhan sa iyang tanang silingan sa ibabaw ug ubos sa dalan. Siya ang tawo nga modala sa mga basurahan.

Kon ang Trak Moagi

“Makita namo nga moagi ang trak sa basura,” miingon ang usa ka silingan, nga si Laura Willes, “ug ang sunod nga among makit-an mao si Ken, maglakaw sa sidewalk gamit ang iyang puti nga sungkod, moadto sa matag balay ug moguroy sa mga basurahan.”

“Kini nagpadayon sa among komunidad nga nindot tan-awon,” miingon ang asawa ni Ken, nga si De Ann. “Apan usab kini nakapahawan sa karsada. Wala ko kahibalo kon ang trak sa bombero makaagi ba nga dili makadasmag sa tanang basurahan.”

Si Laura miingon nga ang pagpanguha ni Ken sa basurahan naghatag og kasiguroan sa mga tawo kinsa wala sa ilang mga panimalay, “mao nga dili klaro kon walay tawo sa balay.”

Mao nga giunsa ni Ken pagbalhin ang mga basurahan samtang naglakaw siya gamit ang sungkod? “Ang sungkod mas kinahanglanon alang sa pagbalanse kay sa bisan unsa,” siya miingon, “ug kon ako moakbo sa basurahan, kana naghatag usab nako og balanse.” Uban sa tabang sa usa ka espesyal nga contact lens, siya makaklaro kaayo gamit ang usa ka mata aron makakita sa iyang agianan. Kon dunay snow sa yuta, siya dili moadto sa dapit diin siya madakin-as ug matumba.

“Kon adunay adlaw nga siya dili makadala sa mga basurahan,” miingon si De Ann, “akong pahibaloon ang mga silingan.”

Usa ka Naglambo nga Tahas

Si Ken wala magsugod sa pagdala sa tanang basurahan gikan sa ibabaw ug paubos sa dalan. Kini hinay-hinay niya nga gihimo. “Inig-agi sa trak sa basura, siya moadto sa mga balay sa among palibot ug itulod ang mga basurahan sa daplin sa dalan,” mipasabot si De Ann. “Kini hinay-hinay nga gihimo. Kini iyang gihimo sa usa ka balay ug dayon sa lain pang balay hangtod nga miabot kini sa unsa na karon.”

Ug ang angga nga Oscar? “Kana gikan sa among anak nga babaye, si Collette,” miingon si De Ann. “Ug ang mga tawo nagpadayon sa paggamit niini.”

Si Ken nahimong higala sa dugay na nga mga residente ug sa mga bag-ong mibalhin, nga dunay mga apohan, mga anak, ug mga apo. “Makalingaw kon unsa ka daghan sa mga tawo nga nakaila niya isip Oscar,” miingon si Laura.

“Si Ken Normal Ra nga Naglihok”

Nganong gibalilk-balik paghimo ni Ken kining gamay nga buhat sa pagserbisyo? Ang iyang tubag tiunay. “Kita kinahanglan nga mosunod sa ehemplo sa Manluluwas ug mohimo og maayo ngadto sa mga tawo. “Mao kana ang akong gipaningkamotan nga buhaton. Kini nakapahibalo nila nga sila adunay oportunidad sa pagbuhat usab og maayo ngadto sa ubang tawo.”

Gani, si Ken, migahin sa tibuok kinabuhi sa pagtabang sa uban. Isip usa ka consultant diha sa negosyo sa sakyanan, siya nagtrabaho sa pagpamaligya aron palamboon ang ilang mga operasyon. Isip usa ka miyembro sa Simbahan, siya midawat og mga calling ug mipaambit sa ebanghelyo, “dili pinaagi sa pagsangyaw ngadto sa akong mga silingan apan pinaagi sa pagpakita kanila sa kalipay nga moabot gikan sa pagsunod sa Manluluwas.”

Nahinumdom si De Ann, “Sa dihang si Ken nag-chemo, ang mga nurse ug usa sa mga doktor misulti nako nga siya mitabang og daghan pa nga mga pasyente nga mahuman sa ilang chemo, kasagaran tungod sa iyang personalidad. Siya wala gani makahibalo nga siya naghimo og butang nga espesyal; siya normal ra nga si Ken nga naglihok.”

Si Ken naghambin gihapon sa upat ka matang sa kanser, apan siya mihunong na sa pagdawat og chemo upat ka tuig na ang milabay. “Ang oncologist miingon nga si Ken usa ka naglakaw nga milagro,” miingon si De Ann.

Kada Miyerkules, makita ninyo siya sa iyang uniporme nga Oscar, maghulat sa trak nga moagi aron siya makatabang sa iyang mga silingan. “Wala lang ko mohukom nga moadto ug modala sa mga basurahan,” miingon si Ken. “Ako mihukom nga usa kini sa pipila ka butang nga mahimo gihapon nako. Ug kon ako makahimo pa sa pagserbisyo sa akong mga silingan, ako magpadayon sa pagserbisyo.”

Ang tagsulat nagpuyo sa Utah, USA.