Unsaon nga Kita Makahimo sa Sakramento nga Mas Makahuluganon ngari Kanato?,” Liahona, Hunyo 2023.
Dali, Sunod Kanako
Unsaon nga Kita Makahimo sa Sakramento nga Mas Makahuluganon ngari Kanato?
Niini nga mga kapitulo sa Bag-ong Tugon, mabasa nato ang mahitungod sa Ginoo nga nagpasiugda sa sakramento:
“Gikuha niya ang pan ug nagpasalamat siya sa Dios, unya gipikaspikas niya kini, ug gihatag kanila nga nag-ingon, “Mao kini ang akong lawas nga gihatag alang kaninyo: buhata ninyo kini aron paghandom kanako.
“Gikuha usab niya ang kupa [human sa panihapon], ug miingon siya, “Kining kupa mao ang bag-ong kasabotan sa Dios, tiniman-an sa akong dugo nga giula alang kaninyo” (Lucas 22:19–20).
Tulo ka Pangutana
Pamalandonga kining mga pangutana nga gihatag ni Presidente Russel M. Nelson: “Pangutan-a ang inyong kaugalingon, ‘Unsay akong hunahunaon kon moambit ko sa sakramento? Naghunahuna ba gayod ako bahin sa Pag-ula ni Jesukristo? Nasabtan ba gayod nako ang gibug-aton sa Iyang sakripisyo ug ang kahamili sa akong kaugmaon samtang akong dad-on sa akong kaugalingon ang ngalan ni Jesukristo ug mohukom nga motuman sa Iyang mga sugo?’” (“Reflection and Resolution” [Brigham Young University nga debosyonal, Ene. 7, 1990], 6, speeches.byu.edu).
Tulo ka Butang nga angay Sabton
Ikonsiderar ang pagsunod sa mga pagtulon-an ni Presidente David O. McKay (1873–1970) mahitungod sa tulo ka butang nga angay hinumdoman kalabot sa sakramento:
“Ang una mao ang pagsabot sa kaugalingon. Mao kini ang paghinuklog. ‘Buhata ninyo kini sa paghandom kanako’ [Lucas 22:19], apan kinahanglan nga moambit kita sa takos nga paagi, nga ang matag usa mosuta sa ilang kaugalingon kabahin sa ilang katakos.
“Ikaduha, adunay pakigsaad nga gihimo; usa ka pakigsaad nga mas labaw pa sa usa ka saad. … Ang usa ka pakigsaad, usa ka saad, kinahanglang sama kasagrado sa kinabuhi. Kana nga baroganan maapil matag Dominggo kon kita moambit sa sakramento.
“Ikatulo, adunay laing panalangin, ug kana mao ang pagbati [sa] suod [nga] relasyon ngadto sa Ginoo. Adunay kahigayonan sa pagpakigsulti sa kaugalingon ug sa pagpakigsulti sa Ginoo” (Mga Pagtulon-an sa mga Presidente sa Simbahan: David O. McKay [2003], 42).