Ang Akong Kwarta tungod sa Dugos

Ni Alan Bennett, Utah, USA

Ang Ginoo ba nagpaabot nako nga mobayad sa ikapulo sa gamay nga kwarta nga akong halin sa pagpamaligya og dugos?

Nagsugod ko sa pagpamuhi og buyog isip kalingawan. Sa wala madugay, ang mga tawo nagsugod sa pagpangutana nako kon makapalit ba sila sa akong dugos.

Human makabaligya og gamay nga dugos, naghunahuna ko sa pagbayad sa ikapulo sa akong “ginansiya” (Doktrina ug mga Pakigsaad 119:4). Ang tinuod wala ko maghunahuna sa kwarta nga akong nakita, hinoon, isip usa ka tubo. Migasto ko og mas dako sa pagpamuhi og buyog kay sa akong makuha sa pagpamaligya og dugos.

Apan ako nahinumdom nga ang mga ikapulo balaan ngadto sa Ginoo. Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kita nagtahod kaniya pinaagi sa pagbayad sa ikapulo. Ang pagbayad sa ikapulo mao ang usa ka pagpahayag sa atong hugot nga pagtuo sa Dios ug sa Iyang mga saad.

Nakahinumdom ko nga kadtong mobayad sa ikapulo makadawat niini nga saad gikan sa Ginoo: “Sulayi ako ug makita ninyo nga ablihan ko ang mga bintana sa langit ug ibubo ko kaninyo sa madagayaon gayod ang mga panalangin” (Malaquias 3:10).

Gidawat nako ang hagit sa Ginoo ug mibayad sa ikapulo gikan sa mga halin sa akong dugos. Diha sa mga slip sa ikapulo, ako misulat, “Gikan sa kwarta tungod sa dugos.”

Sa wala madugay, usa ka higala ang miabot sa akong balay ug miingon nga siya nakaila og tawo kansang bana nga namuhi og buyog namatay. Ang biyuda nga asawa gusto nga mohawan sa tanang ekipo sa iyang bana sa pagpamuhi og buyog ug naghunahuna sa paglabay niini. Hinoon, ang akong higala midala nako aron kuhaon ang ekipo.

Ang tanan nga ekipo sa pagpamuhi og buyog nga akong ganahan ug gipangandoy gayod—ug daghan pa—naa didto, lakip sa tanang matang sa ekipo sa pagpuga og dugos.

Walay tawo nga manghatag og ekipo sa pagpamuhi og buyog. Apan niana nga semana human ako mihimo sa pagpili nga mobayad sa ikapulo, ang Langitnong Amahan miabli sa mga bintana sa langit ug miganti nako. Nagtuo ko nga dili kini ingon nga nataymingan lang. Ako adunay pagpamatuod nga ang Langitnong Amahan nakaila nako ug sa akong mga tinguha. Ang akong pagpamatuod sa kaimportante sa pagbayad sa ikapulo sa tinuod milambo.