Pagpangalagad uban sa Kaluoy

Ang pagpalambo og kaluoy ngadto sa uban nagtabang nato sa pagtambayayong sa mga alantuson sa usag usa.

Video sa Biblia nga naghulagway sa Manluluwas nga nakigsulti sa usa ka tigulang nga lalaki

Usa ka Ehemplo sa Kapuangod

Atol sa Paglansang diha sa Krus sa Manluluwas, pipila niadtong kinsa nagmahal Kaniya nagpabilin diha sa tiilan sa krus. Apil niadtong nagpabilin mao ang Iyang inahan, Iyang iyaan, si Maria Magdalena, ug si Juan. Unsa ka malisod nga sitwasyon alang niadtong kinsa nagmahal Kaniya pag-ayo. Bisan og sila dili makahupay Kaniya sa Iyang pag-antos, sila mihatag sa ilang panahon, gugma, ug suporta, bisan og kini dili komportable, dili sayon, ug tingali makuyaw.

Ang pipila niini nga babaye nagpabilin uban Kaniya hangtod sa kataposan ug nagpadayon sa pagserbisyo bisan human Siya mamatay pinaagi sa pag-andam sa Iyang lawas alang sa lubong gamit ang maayo nga mga hilba ug panapton. (Tan-awa sa Mateo 27:55–56; Marcos 15:40–41, 47; Lucas 23:55–56; Juan 19:25–27.)

Pagpangalagad uban sa Kaluoy

Ang kaluoy mao ang pagkaamgo sa pag-atiman sa “kalisod sa uban sa tinguha sa paghupay niini.”¹ Isip mortal nga mga binuhat, kita makasinati og kalisod. Segurado, kadtong atong gipangalagaran adunay mga hagit, ug ang pipila tingali sa tinuod nag-antos.

Si Elder Neal A. Maxwell (1926–2004) sa Korum sa Napulog Duha ka Apostoles miingon, “Kon, sa makadiyot, kita sa atong mga kaugalingon wala makasinati og lisod kaayo nga pagsulay, kita kinahanglan nga mohatag og suporta niadtong nakasinati og malisod nga mga pagsulay—puno sa empatiya ug molig-on sa tawo sa espirituhanong paagi.”²

Ang buluhaton ingon og dako kaayo, ilabi na kon kadtong atong gipangalagaran nakasinati og bug-at nga mga pagsulay. Kon adunay paagi sa paghupay sa pag-antos, kita mohimo sa atong labing maayo sa pagtabang. Apan usahay, tingali gamay ra ang atong mahimo. Ang pagtan-aw lang, sama sa gihimo ni Maria, mahimong malisod. Apan bisan kon kita dili makahupay sa pag-antos, kita mahimong anaa taliwala niini, magtanyag sa atong gugma ug suporta.

Samtang daghan ang dili gusto nga kaluy-an, ang kadaghanan mopasalamat sa maluloy-on nga pagsabot ug suporta kon ang mga panahon lisod.

Pagpalambo og Kaluoy

Kon kita makaila sa Manluluwas, kita mas makasabot giunsa Niya paghatag og kaluoy ngadto sa tanan nga moduol ngadto Kaniya. Unsaon nato nga makapalambo niining Kristohanon nga hiyas sa atong mga kinabuhi?

Tun-i ang mga asoy diin ang Manluluwas nagpakita og kaluoy. Gibalik-balik, Siya nagpakita og kaluoy bisan kon Siya gikapoy o nagkapuliki. Ikonsiderar unsay Iyang gibati niadtong Iyang gitabangan.
Hinumdomi ang mga panahon sa dihang ang uban mihupay o misuporta nato sa atong mga pagsulay. Kini makatabang sa pag-ugmad og kaluoy ug makapahunahuna og mga paagi nga kita makasuporta sa uban.
Pagpuasa ug pag-ampo alang sa dugang nga kaluoy ug pangayo og giya kon unsa nga mga aksiyon nga atong mahimo sa pagpakita sa atong gugma ug pagpakabana.
Paningkamot nga makaila sa uban ug mas makasabot sa ilang mga sitwasyon. Samtang ang atong pagsabot ug kaluoy molambo, mao usab ang atong mga relasyon, ang mga panaghigalaay mahimo nga makahuluganon ug malungtaron.
Pagbansay sa pagmatikod sa mga sirkumstansiya sa uban pinaagi sa pagpangutana sa imong kaugalingon sama sa, “Unsa kaha ang kalisod niana nga tawo karon?” “Unsa kaha ang akong bation kon ako ang anaa sa dapit niana nga tawo?”
Pagbansay sa pag-ila kon ikaw mopagamay o mobaliwala sa pag-antos sa usa ka tawo. Kon kita dali nga mobaliwala sa pag-antos sa usa ka tawo, wala nato hatagi og panahon ang atong mga kaugalingon nga maimpluwesyahan niini sa maluloy-on nga paagi.