“Usa ka Embodo sa Inspirasyon,” Liahona, Hunyo 2023.
Mga Tingog sa mga Santos sa Ulahing mga Adlaw
Usa ka Embodo sa Inspirasyon
Agig tubag sa akong pag-ampo, ang Ginoo migamit kanako aron mapanalanginan ang usa sa Iyang mga anak.
Litrato pinaagi sa maayong kabubut-on sa pamilyang Brandenburg
Mga tuig nang milabay ang akong bana ug ako gitawag nga moserbisyo og misyon sa institute of religion sa Santa Monica, California, USA. Miserbisyo mi dili lang isip mga direktor sa institute apan isip mga magtutudlo usab. Usa ka gabii mihangyo ko sa Ginoo pinaagi sa pag-ampo, “Himoa ako nga embodo sa Imong inspirasyon aron makatabang ko og usa sa Imong mga anak.” Human sa akong pag-ampo, natulog ko apan nakamata pagka-alas 4:30 sa kaadlawon.
Ang akong bana sa kasagaran magtudlo sa alas 7 sa buntag. Basahon ni Mormon ang klase, apan sayo niana nga buntag, ang Ginoo mitubag sa akong pag-ampo. Ang tema sa leksiyon mao “Ang Tinguha sa Akong Kasingkasing,” apan wala koy ideya unsay gi-eskedyul sa akong bana nga itudlo, wala pud ko motan-aw sa iyang manwal. Apan mibangon ko, gisultihan siya nga gusto kong ako ang motudlo sa leksiyon nianang adlawa, ug miadto sa building sa institute.
Nakakita ko og ubay-ubay nga susamang tema sa mga kasulatan, lakip ang 1 Nephi 2:16: “Ug nahinabo nga ako, si Nephi, … adunay dako nga tinguha nga mahibalo sa mga misteryo sa Dios, busa, ako nangamuyo ngadto sa Ginoo; ug tan-awa siya miduaw kanako, ug nalumoy ang akong kasingkasing nga ako mituo sa tanan nga mga pulong nga gilitok sa akong amahan.”
Dayon akong gikonektar ang mga tinguha ni Nephi ngadto sa kang Hari Solomon sa 1 Mga Hari 3:9: “Busa hatagi ang imong alagad og kaalam aron mahibalo siya [sa] pagdumala sa imong katawhan uban ang katarong. Kay kinsa may makamando niining imong katawhan nga labihang daghana?”
Usa ra ka batan-ong lalaki ang mitungha sa among klase nianang adlawa. Gani dili siya miyembro sa Simbahan, apan nasayod ko nga kini nga leksiyon mao ang giplano sa Ginoo alang niya. Gibasa namo ug gihisgotan ang mga istorya sa kasulatan ni Nephi ug ni Solomon. Dayon gihangyo nako siya nga isulat niya ang iyang tubag niini nga pag-aghat: “Unsa ang mga tinguha sa imong kasingkasing?” Human sa pipila ka minuto, nangutana ko kon gusto ba niyang ipaambit unsay iyang gisulat. Miingon siya, “Gusto kong mahibalo kon ang Basahon ni Mormon tinuod ba ug kon ako kinahanglan bang magpabunyag.”
Ang Ginoo nakadungog ug mitubag dihadiha dayon sa tinguha niining batan-ong lalaki. Hunahunaa ang among kalipay dihang, paglabay sa upat ka bulan, ang akong bana ug ako mitambong sa iyang bunyag. Nagpasalamat ko nga ang Ginoo mihimo kanako nga embodo alang sa usa ka dinasig nga leksiyon nianang adlawa aron matabangan sa pagpangandam kining batan-ong lalaki alang sa bunyag.