Dali, Sunod Kanako

Mateo 27; Marcos 15; Lucas 23; Juan 19

Ang Eksakto Ba o Ang Ilado?

Dihang si Ponso Pilato misukitsukit ni Jesukristo, siya “walay nakaplagang sayop” Kaniya (Lucas 23:4). “Buot ni Pilato nga buhian si Jesus” apan ang katawhan “nagpadayon sa pagsinggit ug namugos nga si Jesus ilansang gayod sa krus” (Lucas 23:20, 23). Kay “buot ni Pilato nga mahimuot kaniya ang mga tawo,” si Pilato naminaw sa katawhan (tan-awa sa Marcos 15:15).

“Dili Iya sa Kalibotan”

Isip mga disipulo ni Jesukristo, padayon kita nga mag-atubang og mga pagpili tali sa paghimo sa unsay eksakto ug paghimo sa unsay ilado. Gisultihan ni Jesukristo ang Iyang mga disipulo, “Kon kamo iya pa sa kalibotan, higugmaon unta kamo sa kalibotan ingon nga iya sa kalibotan: apan gipili ko kamo gikan niining kalibotana ug kamo dili na iya sa kalibotan, busa nasilag kaninyo ang kalibotan” (Juan 15:19).

Sa unsang mga sitwasyon kaha kamo mag-atubang og pagpamugos sa kahigalaan?

Unsa kaha ang pwede ninyong buhaton o isulti niadtong mga sitwasyon aron makapili sa eksakto? Kon duna kamoy mga bata, tingali makita ninyong makatabang ang pagdrama-drama kon unsaon nila sa pag-atubang ang pagpamugos sa kahigalaan. Pahinumdomi sila nga ang pagpili sa eksakto tingali nagpasabot sa dili paghimo sa unsay gihimo sa ilang mga higala, apan ang pagpili sa eksakto magdala nato paduol sa Langitnong Amahan.

“Pilia ang mas Lisod nga Eksakto”

“Hinaot nga magpadayon ang atong kaisog sa pagsupak sa kadaghanan sa kalibotan. Hinaot nga pilion nato ang mas lisod nga sakto, kay sa mas sayon nga sayop.

Sa atong pagpamalandong sa mga desisyon nga atong himoon sa atong kinabuhi kada adlaw—bisan sa paghimo niini nga pagpili o niana nga pagpili—kon mopili kita ni Kristo, nakahimo kita og sakto nga pagpili.”

Presidente Thomas S. Monson (1927–2018), “Mga Pagpili,” Liahona, Mayo 2016, 86.

Panaghisgotan

Unsaon nimo sa pagbaton og kaisog sa pagpili sa eksakto kon kini lisod?