“Nga Kita sa Kanunay Mohinumdom Kaniya,” Liahona, Hunyo 2023.
Nga Kita sa Kanunay Mohinumdom Kaniya
Ako mopamatuod nga ang makapabalaan nga gahom sa Espiritu Santo mopanalangin nato kon kita takos nga moambit sa sakramento ug maningkamot sa pagsunod sa ebanghelyo ni Jesukristo.
Litrato pinaagi ni Jerry Garns
Human ang Manluluwas ug ang Napulog Duha ka Apostoles nagpundok alang sa ilang kataposan nga pagdungan og pagpangaon, si Jesus misulti kanila “Dako kaayo ang akong tinguha sa pagkaon uban kaninyo niining panihapon sa Kasaulogan sa Pagsaylo sa dili pa ako mag-antos” (Lucas 22:15).
Uban sa napulog usa sa Napulog Duha, si Jesus sa wala madugay mibiya padulong sa Tanaman sa Getsemani ug midala sa Iyang Kaugalingon sa mga sala sa kalibotan. Siya usab milahotay sa hinimo-himo nga husay ug gipugos sa pagpas-an sa Iyang krus ngadto sa Golgota. Apan sa wala pa ang Iyang hilabihan nga pag-antos didto sa tanaman ug diha sa krus, ang Manluluwas miandam sa Iyang mga disipulo alang sa indibidwal nga mga hagit ug mga kalisod nga antoson sa matag usa kanila.
“Samtang nangaon sila, mikuha si Jesus sa pan, nagpasalamat sa Dios ug gipikaspikas niya kini ug gihatag sa iyang mga tinun-an. Ug miingon siya, Dawata ninyo kini ug kan-a. Kini mao ang akong lawas.
“Unya gikuha niya ang kupa, nagpasalamat sa Dios ug gihatag kanila. Inom kamong tanan niini;
“Kini mao ang akong dugo nga naglig-on sa kasabotan, ang akong dugo nga gipaagas alang sa daghan aron sa pagpasaylo sa mga sala” (Mateo 26:26–28).
Dayon, sa usa sa Iyang kataposan nga mga pagtulon-an sa pagkamortal, Siya mipasabot:
“Apan ang tinuod mao nga mas makaayo kaninyo nga biyaan ko kamo kay kon dili, dili moanhi kaninyo ang Magtatabang [Maghuhupay]. Apan kon mobiya ako, ipadala ko siya kaninyo. …
“Apan inig-abot sa Espiritu sa kamatuoran, tultolan kamo niya sa tibuok kamatuoran. Dili siya magsulti sa iyang kaugalingong pagbuot kondili sultihan kamo niya sa iyang nadungog ingon man sa mga butang umaabot.” (Juan 16:7, 13).
The Last Supper [Ang Kataposang Panihapon], ni Simon Dewey
“Pagkadakong panalangin!”
Human sa pag-ambit sa sakramento, atol sa bag-ong seminar sa pagpangulo sa misyon, si Presidente Russell M. Nelson miingon: “Usa ka hunahuna ang miabot kanako nga ang akong paghimo sa usa ka pakigsaad karon mas labaw ka importante kay sa mensahe nga akong giandam. Mihimo ako og pakigsaad dihang miambit ako sa sakramento nga ako andam nga modala ngari kanako sa ngalan ni Jesukristo ug nga ako andam nga mosunod sa Iyang mga sugo. Sa kasagaran, makadungog ko nga kita moambit sa sakramento aron sa pagbag-o sa mga pakigsaad nga gihimo atol sa bunyag. Samtang tinuod kana, mas labaw kini kay niana. Mihimo ako og bag-ong pakigsaad. Mihimo kamo og bag-ong mga pakigsaad. … Karon agi og balos … [ang Ginoo] mihimo sa pamahayag nga kita sa kanunay makabaton sa iyang Espiritu uban kanato. Pagkadakong panalangin!”1
Sa mga pag-ampo sa sakramento, ang mga naghupot sa pagkapari naghangyo sa Amahan “sa pagpanalangin ug pagbalaan” sa pan ug tubig, aron nga kita makakaon ug makainon “agi og paghinumdom” sa lawas ug dugo sa Iyang Anak. Matag usa kanato nagsaksi nga kita andam sa pagdala diha nato sa ngalan sa Iyang Anak. Kita molihok ug molig-on niana nga pagsaksi pinaagi sa kanunay nga paghinumdom Kaniya ug sa pagtuman sa Iyang mga sugo. (Tan-awa sa Doktrina ug mga Pakigsaad 20:77, 79.)
Alang sa ulahing mga adlaw nga mga disipulo sa Ginoo, ang ordinansa sa sakramento nagkinahanglan og mas daghan pa kay sa gibalik-balik ug sa naandan nga pag-apil ug kaswal nga pasalig.
Litrato pinaagi ni Robert Casey
“Kita personal nga mamalandong sa Pag-ula ni Jesukristo,” miingon si Presidente Nelson. “Kita mamalandong sa kaimportante sa Iyang pag-antos sa Getsemani ug sa Iyang Paglansang didto sa Kalbaryo. Niining higayona, matag usa nato ‘mosusi sa iyang kaugalingon (1 Mga Taga-Corinto 11:28) ug mamalandong sa personal nga mga pakigsaad nga gihimo uban sa Ginoo. Niining higayona, kita mamalandong sa sagradong mga butang sa Dios.”2
Ang mga buhat sa pagkaon ug pag-inom sa mga timaan sa sakramento dili makabayad sa mga sala. Apan kon kita mainampoon ug sinsero nga mangandam ug takos nga moapil sa ordinansa, kita mosusi sa atong mga aksiyon ug sa mga tinguha sa atong mga kasingkasing ug mohangop sa imbitasyon sa Ginoo sa paghinulsol (tan-awa sa Moises 5:8). Kon kita mohalad sa sakripisyo Siya nagkinahanglan—sa usa ka masulub-on nga kasingkasing ug mahinulsolon nga espiritu (tan-awa sa 3 Nephi 9:20)—kita gisaaran nga kita makabaton kanunay sa Iyang Espiritu nga magauban kanato. Ug pinaagi sa makapabalaan nga gahom sa Espiritu Santo isip kanunay natong kauban, kita makabaton ug sa kanunay makaangkon og kapasayloan sa atong mga sala (tan-awa sa Moroni 6:4).
Ang atong sagrado nga responsibilidad mao ang pagpalambo og balaan nga mga kinaiya nga magdapit sa Espiritu sa Ginoo nga magauban nato sa tanang higayon—mga kinaiya sama sa pagtuman sa mga pakigsaad, pagsunod sa mga sugo, paghinulsol, pagpasaylo, pagsiksik sa mga kasulatan, pagserbisyo, ug pagsimba diha sa panimalay, diha sa simbahan ug diha sa templo.
Ang mga disipulo sa Manluluwas diha sa Basahon ni Mormon mipakita og ehemplo sa dugang nga balaan nga kinaiya: “Sila nag-ampo alang niana diin sila labing nagtinguha; ug sila nagtinguha nga ang Espiritu Santo kinahanglan ihatag ngadto kanila” (3 Nephi 19:9).
Our Light [Atong Kahayag], ni Dan Wilson
Ang Yawe sa Paghinumdom
Sama sa mga disipulo sa karaan, kita usab makaampo sa matinguhaon ug sa makanunayon nga paagi alang sa Espiritu Santo ug sa Iyang may kalabotan nga mga panalangin. Ang Manluluwas misaad: “Apan ang Manlalaban, ang Espiritu Santo, … magtudlo kaninyo sa tanang butang, ug magpahinumdom kaninyo sa tanan, nga akong gisulti kaninyo” (Juan 14:26).
Mas importante, ang pagpakig-uban sa Espiritu Santo nagtabang nato nga mahinumdom kanunay ni Jesukristo—sa Iyang sakripisyo, sa Iyang ebanghelyo, sa Iyang mga saad kanato, sa Iyang gugma alang kanato, ug sa mga pakigsaad nga nagyugo nato ngadto ug uban Kaniya.
Si Presidente Henry B. Eyring, Ikaduhang Magtatambag sa Unang Kapangulohan, mitudlo:
“Ang yawe sa paghinumdom nga nagdala ug nagpatunhay sa pagpamatuod mao ang pagdawat sa Espiritu Santo isip kauban. Ang Espiritu Santo maoy motabang kanato nga makakita sa gibuhat sa Dios alang kanato. Ang Espiritu Santo maoy makatabang niadtong atong gialagaran aron makakita unsay gibuhat sa Dios alang kanila. …
“Kini ang Espiritu Santo kinsa mopamatuod nga si Jesukristo mao ang Hinigugmang Anak sa Langitnong Amahan kinsa nahigugma kanato ug buot nga kita makaangkon og kinabuhing dayon uban Kaniya diha sa mga pamilya.”3
Ug ang Espiritu Santo maoy motabang kanato nga espirituhanong mopadayon diha sa nagkadaotan nga kalibotan. Niining panahon sa mga virus ug mga bakuna, ang pisikal nga sakit dili lamang ang atong bugtong hulga.
“Ang espirituhanon nga mga sakit kabahin sa epidemya mikatap sa kalibotan. Dili kita makapahunong niini. Apan kita makapugong sa atong kabatan-onan [ug sa atong mga kaugalingon] nga matakdan niini,” gitudlo ni Presidente Boyd K. Packer (1924–2015), Presidente sa Korum sa Napulog Duha ka Apostoles.
Ang dugang nga kahibalo ug pagpamatuod sa ebanghelyo, uban sa pagpakig-uban sa Espiritu Santo, siya midugang, sama sa usa ka bakuna nga mahimong makabantay [inoculate] kanato batok sa pagkadaotan ug panglimbong.
“In [nagpasabot] ‘diha sa sulod’ ug oculate nagpasabot og ‘mata aron makakita,’” misulti si Presidente Packer. “Kita nagbutang og usa ka mata diha sa sulod [kanato]—ang dili masulti nga gasa sa Espiritu Santo [tan-awa sa Doktrina ug mga Pakigsaad 121:26].”4
Kana nga mata mogiya, modumala, mohupay, ug mopanalipod nato. Alang sa mga Santos sa Ulahing mga Adlaw, kinsa nakadawat sa gasa sa Espiritu Santo, ang paggiya gikan sa Espiritu Santo mahimo ug kinahanglan nga magpadayon ug dili panagsaon nga hitabo. Ang saad ngadto sa sinaaran nga katawhan sa Ginoo, human sa tanan, mao nga kita “unta sa kanunay makabaton sa iyang Espiritu uban [kanato]” (Doktrina ug mga Pakigsaad 20:77).
Gisaad nga mga Panalangin
Ang paghinumdom unsa ang nahimo sa Ginoo alang nato, ang pag-apil sa ordinansa sa sakramento, ug ang kanunay nga pagbaton sa Iyang Espiritu uban kanato sa tinuod talagsaon nga mga panalangin. Ako mopamatuod nga ang gisaad nga mga panalangin modagayday diha sa atong mga kinabuhi kon kita mangandam ug takos nga moambit sa sakramento matag semana ug sa ingon molig-on sa atong koneksiyon sa pakigsaad uban sa Manluluwas.