“Gipanalanginan og Gahom ug Kalig-on,” Liahona, Hunyo 2023.
Mga Tingog sa mga Santos sa Ulahing mga Adlaw
Gipanalanginan og Gahom ug Kalig-on
Nagkurog ang mga kamot sa akong papa samtang siya mipanalangin nako og mga pulong nga nakapausab sa akong kinabuhi.
Paghulagway pinaagi ni Dilleen Marsh
Dihang nauli ko gikan sa akong duha ka tuig nga misyon, ang sunod nakong tumong mao ang pagminyo sulod sa templo. Sa wala damha, nagsugod ko sa pagtinguha og dili maayong mga kalingawan, minunot sa mga tentasyon, ug nakig-date sa dili miyembro sa Simbahan.
Kaalaotan, pagmahay, ug kasubo ang misunod, lakip na ang diborsiyo. Duna gihapon koy pagpamatuod ug nangandoy nga maminyo sulod sa templo, apan mibati ko nga dili takos niadtong mga panalangin. Akong gitago ang akong sad-ang mga pagbati ug nangita og kalipay pinaagi sa kalibotanong mga buhat.
Sa kataposan dili na nako matago ang mga pagbati, ug mibati ko og labihang kahasol nga ako sad-an tungod sa akong mga kalapasan. Miluhod ko ug mitawag sa Ginoo uban sa diosnon nga kasubo. Misaad ko nga sukad niadto, sundon nako ang balaod sa kaputli.
Apan dili lang kay kana ra ang akong gisagobang. Nalulong usab ko sa grabeng pagkaadik sa druga. Usa ka gabii, akong nakita ang akong kaugalingon nga napuno sa makagun-ob nga kahadlok. Naggunit sa akong selpon, gitutokan nako ang numero sa akong papa. Mikabat og kapin sa usa ka oras una ko nakatigom og igong kaisog nga tawagan siya ug mohangyo nga mahimo ba kong makigkita niya.
Human sa igong gidugayon sa among pag-istoryahanay mahitungod sa akong mga gisagobang, gihatagan ko sa akong papa og panalangin sa pagkapari. Nangurog ang iyang mga kamot samtang namulong siya uban sa gahom ug kombiksiyon. Miingon siya nga si Satanas ug iyang mga anghel walay pagkaluya nga mibira kanako tungod kay ang akong espirituhanong potensyal naghulga kanila. Si Papa miingon nga hangtod nia ko sa yuta, duna koy oportunidad nga makabuntog sa akong pagkaadik. Iya kong gipanalanginan uban sa gahom ug kalig-on sa paghimo niini.
Dihang nahuman ang panalangin, gigakos nako ang akong papa ug mama ug mibakho sa abaga sa akong papa. Akong gibati ang dili kapugngan nga kabuhong sa gugma ug pasalamat sulod sa akong kasingkasing. Gibanlas na ang akong mga pagbati sa pagkawalay paglaom. Ang pisikal nga tinguha sa pagkaadik ug ang itom nga dag-om sa depresyon ug pagbati nga kahaw-ang nahanaw usab.
Dihadiha dayon, gibati nako nga nakakaplag og bag-ong kadasig sa kinabuhi ug sa posibilidad alang sa kamaya kon ako motugyan ngadto sa kabubut-on sa Langitnong Amahan. Mopamatuod ko nga ang gahom sa pagkapari tinuod ug anaa gayod!
Sa tukmang panahon, ang Langitnong Amahan mipanalangin nako nga maminyo sa templo, sa usa ka mapinanggaong asawa kinsa nakasabot sa gahom sa Manluluwas sa Pag-ula, ug sa duha ka anak.
Ang pagkahaw-as gikan sa lungag nga kausa akong nahimutangan ngadto sa kon asa ako karon tinuod nga usa ka milagro. Pinaagi sa sinserong paghinulsol ug hugot nga pagtuo kang Jesukristo, posible ang tanan nga butang! Ako ang buhi nga panghimatuod niana.