“Sa Unsang Paagi nga ang Pagpakabuhi nga Putli Nakapalig-on sa Akong Pagbati kon Kinsa Ako,” Liahona, Hunyo 2023.
Mga Young Adult
Kaputli: Sa Unsang Paagi nga ang Pagpakabuhi nga Putli Nakapalig-on sa Akong Pagbati kon Kinsa Ako
Mibati ko kanunay nga dili komportable mahitungod sa sekswal nga kasuod nga gawas sa kaminyoon, ug ang ebanghelyo mitudlo nako nga balido ang akong mga pagbati.
20 ang akong edad niadtong 2021 dihang nagpasakop ko sa Ang Simbahan ni Jesukristo sa mga Santos sa Ulahing mga Adlaw. Wala ko magpuyo sa hingpit nga “pagkamatarong”—gani sa tinuod, ingon og baligtad. Sa wala pa ko magpasakop sa Simbahan, manigarilyo ko, moinom, ug kanunayng naa sa party, nga komon kaayo sa mga young adult sa Hungary.
Bisan og wala kaayo nako seryosoha sa pagtratar kining mga butanga, wala ko mobati nga husto ang pagbuhat niini. Mibati ko og labihan ka dili komportable kon hisgotan ang sekwal nga mga inter-aksiyon. Akong nahibaloan gikan sa kalibotan nga ang katuyoan sa pakighilawas mao ang paglingaw ug pagtagbaw sa kaugalingon. Kadaghanan sa mga tawo sa akong palibot miuyon nga dili kini dako nga isyu. Wala nako hukmi ang akong mga higala sa pagbaton niana nga panglantaw, apan akong naamgohan nga ang pagsabot bahin sa sekswal nga kasuod mahinungdanon ngari nako.
Werdo ba ko?
Gikaulaw nako nga mahimong usa niadtong mga tawo nga “werdo” kinsa nagtinguhang maghulat hangtod maminyo. Naghunahuna ko nga makig-date og tawo nga parehas nako og panglantaw.
Apan, ang mga pagpamugos sa kalibotan mas nagkakusog, ug nagsugod ko sa pagtuo nga ang akong mga ekspektasyon taas ra kaayo. Mao nga gipaubsan nako ang akong mga sumbanan.
Sa pag-edad nako og 18, nakig-date ko og usa ka tawo ug miingon ko sa kaugalingon nga dramatik ra ko ug wala koy kasinatian—nga ang pakighilawas dili ra kaayo seryoso sama sa akong gihunahuna. Gipalabay ra nako ang dili komportable nakong mga pagbati ug nagtuo nga sa kadugayan mobati ra ko nga kini husto.
Apan wala gayod kana mahitabo.
Kristiyano na ko sukad niadtong 16 pa ko, apan walay balaod sa kaputli nga mopahinumdom kanako kon si kinsa ko—usa ka anak sa Dios kinsa takos alang sa gugma ug pasalig ug kabalaan. Gibati nako kini nga kamatuoran apan dili sigurado kon unsa kini hangtod nga nakakat-on ko mahitungod sa ebanghelyo.
Ang Hugot nga Pagtuo Mohatag Kanato og Gahom
Sayon ra ang pagpatalinghog sa lanog nga mga tingog sa kalibotan. Apan isip mga anak sa Dios, nagtuo ko nga kitang tanan dunay espirituwal nga gawi gikan sa Espiritu Santo aron magmatinud-anon sa atong balaan nga pagkatawo. Dili nato ipaubos ang atong mga sumbanan o ikaulaw ang atong mga gituohan. Uban sa hugot nga pagtuo diha sa Manluluwas nga si Jesukristo, mahimo kita nga lahi kon motuman kita sa Iyang mga sugo.
Kanunay kong mibati nga ang sekswal nga pagpakigsuod sagrado ug mas mahinungdanon kay sa unsay gihimo sa kalibotan. Tuyo niini nga matabangan ang mahangtorong managkompanyon nga mas mapalawman ang ilang paghigugmaay ug mapalig-on ang ilang mga pakigsaad sa usag usa samtang magtukod sila og celestial nga relasyon ug pamilya.
Apan bisan pa, samtang nagkat-on ko sa ebanghelyo, ang pag-usab sa estilo sa akong kinabuhi dili sayon. Sama sa gitudlo ni Presidente Russell M. Nelson, “Nagkinahanglan og hugot nga pagtuo ang pagpakabuhi og putli nga kinabuhi samtang ang kalibotan nagsinggit nga ang balaod sa Dios bahin sa kaputli karon lawos na.”1
Bisan pa sa mga pagpanghulhog libot kanako, ang akong hugot nga pagtuo kang Kristo nakapalig-on kanako sa pagtuman sa mga sugo.
Mas mapasalamaton gayod ako sa gasa sa paghinulsol ug sa suporta ug Pag-ula sa Manluluwas. Bisan makahimo kita og mga sayop, mahimo Niya ang pagbalaan sa atong mga kalag gikan sa pagbati nga sad-an ug kaulaw ug hatagan kita og kalig-on sa paagi nga dili nato mahunahuna nga posible.
Paglaom alang sa Umaabot
Karon makapahiyom ko sa kanhi nako nga panghunahuna nga dili gyod ko makakita og kapares kinsa andam nga mosunod sa balaod sa kaputli. Ang pagkahimong miyembro sa Simbahan mipakita kanako nga daghan kanato ang naningkamot alang sa parehas nga mga sumbanan. Ang pagpakabuhing takos nakatabang nako nga makabaton og pagsalig sa akong balaanong pagkatawo ug kalinaw sulod sa akong kasingkasing samtang nagpadayon kong mag-uswag sa dalan sa pakigsaad.
Nakasinati ko og daghan nga kasakit tungod sa wala pagsunod sa balaod sa kaputli. Apan dihang akong gipangita si Kristo, akong nahibaloan unsa kadako ang gugma sa Langitnong Amahan kanato. Makapamatuod ko nga Siya wala magpugong kanato—Gusto Siya nga kita maluwas gikan sa kasakit, kasagmuyo, ug ubang sangpotanan ug moandam kanato alang sa mahigugmaon, malungtaron, ug walay kahakog nga mahangtorong relasyon.
Tungod sa Iyang gugma ug mga balaod ug gasa sa Manluluwas, karon ako mibati sa kamaya, katubsanan, ug paglaom nga Ilang gitanyag. Kon sabton, “ang kinadak-ang mga panalangin sa Dios giandam alang niadtong motuman sa Iyang mga balaod. … Ang [Iyang] mga balaod dinasig sa Iyang hingpit nga walay kinutobang gugma kanato ug sa Iyang tinguha alang kanato nga mahimong maayo kutob sa mahimo.”2
Nasayod ko nga pinaagi sa pagsunod sa mga sugo sa Ginoo ug pagtuman sa mga pakigsaad, masabtan ninyo ang Iyang mga kamatuoran ug makita ang daghan kaayong mga saad ug mga panalangin nga matuman sa inyong kinabuhi.
Nasayod ko nga ako aduna niini.
Ang tagsulat nagpuyo sa Hungary.