Digital Lamang
Kahayag, Kamatuoran, ug ang Atong Paglakaw uban ni Jesukristo
Hunahunaa kining tulo ka estratehiya nga makatabang kaninyo sa paglakaw diha sa kahayag ug sa pag-ila sa kamatuoran nga dili malingla.
Pagtinguha og Kahayag
Ang dinasig nga mga liriko sa matahom nga kanta nga “Mokuyog ko ni Jesus” usa ka pagdapit alang sa lawom nga pagpamalandong:
Jesus nagsubay sa kamatuoran.
Gimahal Niya ang Dios ug katawhan.
Gusto Siyang mogiya nako sa dalan,
Tanang adlaw Iya ko nga kuyogan.
Susama ni Jesus Maningkamot gyod,
Mosaad ko nga Siya ang masunod.
Uban sa pagpangga, ug pag-alima.
Lakang N’ya sundon ko, ug mohigugma.
Kang Jesus mosalig, pa-ta-ling-ho-gan.
Di ko Niya pasagdan, kon masayop man.
Iya kong lig-unon, dayon hupayon,
Tabangan nga molambo sa dayon.
Mokuyog kong Jesus sa kalangitan,
Pun-on ko niya sa gugma ug panalanginan,
Mag-usab sa hangtod ug Iyang tabangan.
Mokuyog kong Jesus Siya nako mouban.1
Sa tinuod walay mas dako, mas kulba-hinam, ug mas makapabayaw sa kalag nga hagit kay sa pagkat-on kon unsaon sa paglakaw uban sa Ginoo ug sa dungan nga pagdawat sa talagsaong panalangin nga Siya molakaw uban kanato.
Hunahunaa ang propeta nga si Enoch. Samtang siya nagtubo diha sa pagtuo ug panabot, si Enoch gitudloan sa tanang paagi sa Dios. Dako kaayo ang iyang pagtuo ug gamhanan kaayo ang iyang pinulongan nga iyang gitabangan ang matag miyembro sa iyang komunidad sa paghinulsol ug pagsinati sa ilang kaugalingon sa kahayag ug kamatuoran nga moabot gikan sa pagsunod sa mga sugo. Ang ilang pagbag-o ug pagkakabig talagsaon kaayo nga sila naglakaw uban sa Ginoo ug sa ulahi gidala ngadto sa langit. Si Enoch nangita og kahayag ug kamatuoran diha sa iyang kinabuhi, ug siya gidapit sa paglakaw uban ni Jesus (tan-awa sa Moises 6–7).
Atong hunahunaon kon sa unsang paagi ang atong pagpangita sa kahayag ug kamatuoran diha sa atong inadlaw-adlaw nga kinabuhi makatabang kanato sa paglakaw uban ni Jesus. Sumala sa mga kasulatan, ang kahayag mao ang “balaan nga kusog, gahom, o impluwensya nga nagagikan sa Dios pinaagi ni Kristo ug naghatag og kinabuhi ug kahayag sa tanan nga mga butang. … Kini usab makatabang sa [mga anak sa Dios] sa pagsabot sa mga kamatuoran sa ebanghelyo ug pagtabang sa pagbutang kanila diha niana nga dalan sa ebanghelyo nga paingon ngadto sa kaluwasan.”2 Ang propeta sa Basahon ni Mormon, si Abinadi mipasabot nga si Jesukristo, “mao ang kahayag ug ang kinabuhi sa kalibotan; oo, usa ka kahayag nga walay kataposan, nga dili gayod mahimo nga mongitngit” (Mosiah 16:9). Ang Manluluwas miingon, “Ako mao ang kahayag sa kalibotan. Ang mosunod kanako dili na gayod maglakaw diha sa kangitngit kondili makabaton hinoon sa kahayag sa kinabuhi” (Juan 8:12).
Busa, samtang nangita kita og kahayag sa atong kinabuhi, nangita kita kang Kristo. Samtang kita mangita kang Kristo ug modawat sa Iyang kahayag, kita mahimong Iyang mga anak—“mga anak sa kahayag” (1 Mga Taga-Tesalonica 5:5). Ang mga anak sa kahayag mopadan-ag sa ilang kahayag aron ang uban makakita sa ilang maayong mga buhat ug daygon nila ang atong Amahan nga atoa sa Langit (tan-awa sa Mateo 5:16). Kana nga pagtinguha modala kanato sa pagbuhat og maayo sa kinabuhi ug naghatag kanato og saad nga kita “dili na gayod maglakaw diha sa kangitngit, kondili makabaton hinoon sa kahayag sa kinabuhi.” Samtang magpadayon kita niini nga dalan sa paglakaw diha sa balaang kahayag ni Jesus, kita makakat-on, motubo, ug makaangkon og dugang nga kahayag.3 Adunay sundanan sa pag-angkon og kahayag samtang kita maglakaw uban ni Jesus, ug, isip resulta, si Jesus maglakaw uban sa matag usa kanato pinaagi sa pagpanalangin kanato nga “kanunay makabaton sa iyang Espiritu uban [kanato]” (Doktrina ug Pakigsaad 20:77). Mao kini ang tukma nga saad nga gihimo sa Ginoo ngadto kang Enoch: “Ug ikaw magpuyo ngari kanako, ug Ako nganha kanimo; busa lakaw uban kanako” (Moises 6:34).
Tinguhaa ang Kamatuoran
Karon atong ibaling ang atong pagtagad ngadto sa kamatuoran. Ang Ginoo mipadayag ngadto ni Joseph Smith nga “ang kamatuoran mao ang kahibalo sa mga butang ingon nga sila mao karon, ug ingon nga sila mao sa kaniadto, ug ingon nga sila mao sa umaabot” (Doktrina ug mga Pakigsaad 93:24). Si Propeta Joseph Smith kausa mitudlo: “Ang kahibalo gikinahanglan niini nga kinabuhi ug sa pagkadiosnon. … Ang kahibalo usa ka padayag. Paminaw, kamong tanan nga kaigsoonan, niining talagsaong yawe: ang kahibalo mao ang gahom sa Dios ngadto sa kaluwasan.”4 Ang Ginoo miingon:
“Ang Espiritu sa kamatuoran mao ang Dios. Ako mao ang Espiritu sa kamatuoran, ug si Juan nagpamatuod bahin kanako, nga nag-ingon: Siya nakadawat sa usa ka kahingpitan sa kamatuoran, oo, gani sa tanan nga kamatuoran;
“Ug walay tawo nga makadawat sa usa ka kahingpitan hangtod siya maghupot sa iyang mga sugo” (Doktrina ug mga Pakigsaad 93:26–27).
Mga kaigsoonan, niini nga konteksto, ang kamatuoran may kalabotan sa kahayag, kahibalo, ug mga pagpadayag gikan sa langit ug nahiuyon sa hunahuna, kabubut-on, kinaiya, himaya, ug pagka-Dios.5 Adunay gahom diha sa kamatuoran tungod kay “ang kamatuoran maghatag [kanato] og kagawasan” (Juan 8:32). Busa, ang kamatuoran makapahimo kanato nga makakita og klaro, pag-ila ug paglikay sa pagpanglimbong, ug paghimo og plano kon unsaon pagbuntog ang kawalay kasigurohan sa atong panahon. Sa pagkatinuod, kita kinahanglan kanunay nga mangita sa kamatuoran sa atong kinabuhi sa usa ka paagi o sa lain. Ang ikaduha ug ikaupat nga mga bersikulo sa himno nga “Sulti, Unsa ang Kamatuoran?” makatudlo kaayo sa paghulma sa importansya sa atong pagpangita sa kamatuoran:
Sulti unsa ang kamatuoran?
Ang ganti nga labing dungganan.
Lakaw pangitaa sa kahiladman,
O ngadto sa kapunaw-punawan:
Dungganan nga katuyoan.
Isulti unsang kamatuoran,
Kini una ug kataposan.
Langit mobiya ug yuta mosiak,
Mosugakod ang kamatuoran,
Mohangtud sa kahangtoran.6
Nagpuyo kita sa kahibulongang mga panahon diin ang kalibotan napuno sa daghang impormasyon kaysa kaniadto. Apan walay sama sukad ang kalisod sa pag-ila sa kamatuoran. Nagpuyo kita sa usa ka kalibotan nga adunay managlahi nga mga panglantaw, kusog ug makabahin nga mga opinyon, ug maliputon nga mga pilosopiya nga kasagaran gikan sa nagpahayag sa kaugalingon nga mga eksperto ug mga tig-impluwensya—kadaghanan kanila tingali mopahayag dayon og mga opinyon ug panglantaw gamit ang internet. Sa online adunay daw walay kataposan nga pag-atake nga gipunting batok sa kamatuoran.
Ang presidente sa Amerika nga si Abraham Lincoln ganahan nga makig-uban sa iyang mga tumatan-aw ug kanunayng mogamit og mga tigmo ug kataw-anan kon siya mamulong. Usa ka istorya nag-ingon nga nangutana siya sa usa ka tumatan-aw kon pila ang mga bitiis sa usa ka iro kon ang ikog giisip nga usa ka bitiis. Sa diha nga sila miingon nga lima, siya mitubag nga ang tubag mao ang upat, tungod kay ang pagtawag sa ikog nga usa ka bitiis wala makahimo niining tinuod nga bitiis.
Tinuod gayod nga adunay kamatuoran. Bisan unsa pa kadaghan sa mga tawo ang ganahan [like] ug mopakigbahin [share] sa ilang “kamatuoran” o unsa kadaghan ang mga tig-impluwensiya diha sa sosyal medya [social influencers] ang nagpamatuod niini, ang kamatuoran mao nga ang ikog dili ug dili mahimo nga usa ka bitiis. Ang tigmo ni Lincoln nagpasabot sa kalainan tali sa “akong kamatuoran” ug sa hingpit nga kamatuoran. Si Satanas mao ang hawod sa paghubas sa kahulogan sa mga pulong, pag-usab sa mga kahulogan, ug pagtuis sa kamatuoran. Daghang mga tawo sa online ang daw gabuot-buot sa pag-usab sa unsay gipasabot sa usa ka butang nga wala maghunahuna og sangpotanan, apan ang arbitraryong pag-usab sa mga unsay gipasabot dili makausab sa reyalidad o kon unsa gayod ang tinuod.
Sa usa ka bahin, ang sumbanan sa kamatuoran alang sa kalibotan nahimo nga kon unsay uyon sa maayo nga bation. Ang bisan unsang pagkwestiyon sa “kaugalingong kamatuoran” sa usa ka tawo, isip mao ang ilang gituohan mismo sa ilang kaugalingon, giisip nga kontrobersyal ug usa ka personal nga pag-atake. Ang impormasyon nga walay sumbanan ug walay kahayag ug kamatuoran nagmugna og lahi nga kamatuoran. Hunahunaa, pananglitan, ang inyong mga gibasa ug mga gitan-aw sa mga piho nga mga butang nga miresulta isip proseso sa internet nagpakita og daghan ug dugang pa nga sulod ug kasayoran base sa inyong mga gi-klik ug mga nagustohan [like]. Kon mas mo-klik ka sa usa ka butang, ang proseso sa internet mas magpakita og susama nga sulod—dili sa pagpangita sa kamatuoran kondili aron sa pagpalambo sa pag-advertise ug kita. Pananglitan, kon mo-klik ka sa mga bidyo sa iro, tingali sa dili madugay maghunahuna ka nga ang tanan ganahan og mga iro ug tanan adunay iro ug nga ang internet gibuhat gayod sa iro alang sa mga ganahan og iro. Ang internet mopakita kanimo og nagkadaghan kaayo niini nga mga imahe ug mga pahinumdom [advertisement] hangtod sa punto nga mahimo ninyong hunahunaon nga kinahanglan ninyo ang usa ka iro.
Sa kalibotan karon, mahimo kamo nga makalakaw gamit ang hilabihan ka gamhanan nga teknolohiya sa inyong bulsa o backpack, apan dili kamo makapangayo sa teknolohiya alang sa kahayag ug kamatuoran. Ang paglakaw kauban ang teknolohiya, bisan pa sa talagsaon niini nga mga kapabilidad, dili gayod saypon nga sama sa paglakaw uban ni Jesus. Ang pagsalig sa atong paglakaw uban sa kalibotanon nga mga tingog ug yutan-on nga mga tinubdan makapahimo kanato nga madutlan sa sayop nga mga pilosopiya ug dili mga kamatuoran. Kini nga mga butang mahimong makapadani kanato, apan wala kini magrepresentar sa kamatuoran.
Ang atong minahal nga propeta, si Presidente Russell M. Nelson, kausa mitudlo: “Ang Kamatuoran mao ang tinuod. Ang pipila ka mga butang tinuod gayod. Ang tighusay sa kamatuoran mao ang Diyos—dili ang inyong paboritong social media nga news feed.”7
Ug sa wala pa niya, daghang tuig na ang milabay, si Presidente Spencer W. Kimball (1895–1985), kinsa mao ang propeta sa akong panahon isip estudyante sa unibersidad, mitudlo usab nga ang hingpit nga kamatuoran dili “mausab pinaagi sa mga opinyon sa mga tawo.”8 Mga kaigsoonan, “ang hingpit nga kamatuoran anaa sa kalibotan nga nagpadayong nagpugong ug nagbaliwala niini.”9
Maglakaw uban ni Jesukristo
Ang atong tinguha sa kinabuhi mao ang pagtinguha sa kahayag ug kamatuoran ug sa paglakaw uban sa atong Manluluwas ug sa pagdawat sa talagsaong panalangin nga Siya molakaw uban kanato, bisan pa sa kangitngit nga anaa sa kalibotan karon. Si Presidente Nelson mitambag, “Karon, palihog paminawa ko kon ako mosulti: Ayaw itugot nga kamo mahisalaag pinaagi niadtong kansang mga pagduhaduha nga gipakaingon sa mga butang nga dili ninyo makita sa ilang mga kinabuhi.”10 Siya midapit usab kanato sa pagdala og kahayag ug kamatuoran sa atong mga pagpamatuod:
“Ako mangamuyo kaninyo sa pag-ako sa responsibilidad sa inyong pagpamatuod. Trabahoa kini. Angkona kini. Atimana kini. Amomaha kini aron motubo kini. Palamboa kini gamit ang kamatuoran. Ayaw kini hugawi sa sayop nga mga pilosopiya sa dili matuohon nga mga lalaki ug mga babaye ug dayon matingala nganong nagkahuyang ang inyong pagpamatuod.”11
Kini nga mga tambag sa pagkatinuod usa ka pagdapit sa paglakaw uban ni Jesus aron si Jesus makalakaw uban kanato.
Sa unsang paagi kita makalakaw diha sa kahayag ug makaila sa kamatuoran nga dili malingla sa ingong uyon nga mga kamatuoran nga gipasiugdahan sa mga tawo nga wala maapektohan sa balaanon ug hingpit nga kamatuoran? Mahimo ba kong motanyag og pipila ka mga estratehiya base sa unsay akong nakat-onan gikan sa dinasig nga mga pagtulon-an sa atong mga propeta ug pinaagi sa akong kaugalingong kasinatian sa kinabuhi?
Kanunay nga Magtuon sa Basahon ni Mormon
Una, pangayo sa Dios og inspirasyon kon unsaon pagbalanse ang inyong nagkapuliki [busy] nga eskedyul aron makagahin kamo og panahon sa pagtuon kanunay sa Basahon ni Mormon. Ang mga kamatuoran sa ebanghelyo ni Jesukristo gitudlo nga labing klaro ug labing gamhanan diha sa Basahon ni Mormon. Kining sagrado nga rekord sa mga kasulatan usa ka sukaranang hitabo sa Pagpahiuli sa ebanghelyo ni Jesukristo niini nga dispensasyon, human sa pagpakita sa Dios nga Amahan ug sa Iyang Anak, si Jesukristo, ngadto ni Joseph Smith. Ang Basahon ni Mormon nagpamatuod sa tinuod ug hingpit nga gugma sa Dios alang sa Iyang mga anak, ang dili hinakog ug balaan nga maulaong sakripisyo ni Jesukristo, ug ang labing mahinungdanon nga pangalagad sa Manluluwas taliwala sa mga Nephite human dayon sa Iyang Pagkabanhaw (tan-awa sa 3 Nephi 11).
Ang Basahon ni Mormon naglangkob sa mga tubag sa labing makapukaw nga mga pangutana sa kinabuhi, ug kini nagtudlo sa doktrina ni Kristo. Sama sa gitudlo sa atong minahal nga propeta, si Presidente Nelson, ang mga kamatuoran nga anaa niini nga libro “adunay gahom sa pag-ayo, paghupay, pagpahiuli, pagtabang, paglig-on, pagpakalma, ug pag-abiba sa atong mga kalag.”12 Hunahunaa ang mga saad sa propeta alang niadtong mogahin og panahon sa pagtuon niining talagsaon nga basahon sa kasulatan:
“Mosaad ko kaninyo nga kon mainampoon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. … Kon mamalandong kamo unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksyon sa inyong kinabuhi. … Mosaad ako nga kon inyong isub-sob ang inyong kaugalingon sa Basahon ni Mormon, mapanalipdan kamo batok sa mga daotan niining panahona.”13
Ang paggahin og panahon diha sa Basahon ni Mormon mogiya kaninyo ngadto ni Jesukristo ug mopuno kaninyo og inspirasyon ug pagpadayag alang sa inyong kinabuhi. Kini mopuno sa inyong kalag sa kahayag ug motabang kaninyo sa pag-ila sa kamatuoran.
Akong gibasa ang Basahon ni Mormon gikan sa sinugdanan hangtod sa kataposan sa unang higayon sa dihang batan-on pa ko nga estudyante sa seminary. Nahinumdoman pa nako ang init nga pagbati nga midagayday sa akong kalag, mipuno sa akong kasingkasing, milamdag sa akong panabot, ug nahimong labaw nga makalipay, sama sa gihulagway ni Alma sa dihang siya misangyaw sa pulong sa Dios ngadto sa iyang mga katawhan (tan-awa sa Alma 32). Kana nga pagbati ug dugang nga kahayag ug kamatuoran nga nakita sa Ginoo nga angayan sa pagpanalangin kanako sa kataposan nahimong kahibalo nga nakagamot sa akong kasingkasing ug nahimong pundasyon sa akong pagpamatuod. Ang Basahon ni Mormon mao ang bato sa pamag-ang nga nakasustiner sa akong hugot nga pagtuo diha ni Jesukristo ug sa akong pagpamatuod sa doktrina ni Jesukristo. Mao kini ang usa sa mga bato sa pamag-ang nga naglig-on sa akong pagsaksi sa kamatuoran sa balaan nga maulaong sakripisyo ni Kristo. Mao kini ang akong taming batok sa mga pagsulay sa kaaway sa paghuyang sa akong hugot nga pagtuo ug pagtisok og kawalay pagtuo ug kangitngit diha sa akong hunahuna. Kini naghatag nako og kaisog aron maisugong ipahayag ang akong pagpagmatuod sa kahayag ug kamatuoran bahin sa Manluluwas sa kalibotan. Ako mosaad kaninyo nga samtang kamo mainampoon ug makanunayong magtuon sa Basahon ni Mormon, inyong makaplagan ang kahayag ug kamatuoran diha sa inyong kinabuhi ug kamo mas maduol sa atong Manluluwas nga si Jesukristo ug makakat-on kon unsaon sa paglakaw uban Kaniya.
Paggahin og Daghang Panahon diha sa mga Templo sa Ginoo
Ang ikaduhang estratehiya mao ang paggahin og daghang panahon sa Ginoo diha sa Iyang mga templo. Sukad sa unang pakigpulong ni Presidente Nelson ngadto sa tibuok Simbahan niadtong Enero 2018, iyang gipunting ang daghan sa iyang pagtulon-an bahin sa importanting tahas sa templo ug sa sagrado nga mga ordinansa ug mga pakigsaad niini nga buhaton diha sa atong mga kinabuhi. Ania ang iyang gitudlo sa mao nga okasyon:
“Ang tumong nga gipaningkamotan sa matag usa kanato mao ang matugahan og gahom diha sa balay sa Ginoo, ma-seal isip mga pamilya, matinud-anon sa mga pakigsaad nga gihimo diha sa templo nga maghimo kanato nga takus sa labing mahinungdanong gasa sa Dios—ang kinabuhing dayon. … Ang inyong pagsimba sa templo ug ang inyong pagserbisyo didto alang sa inyong mga katigulangan mopanalangin kaninyo og dugang nga personal nga pagpadayag ug kalinaw ug molig-on sa inyong pasalig nga magpabilin diha sa dalan sa pakigsaad.”14
Unsay kahulogan niini alang kanato? Ania ang tubag ni Presidente Nelson niini nga pangutana:
“Ang atong panginahanglan nga maanaa sa templo kanunay wala sukad pa nga mas labaw nga gikinahanglan. Mohangyo ko kaninyo nga mainampoong motan-aw kon giunsa ninyo paggamit ang inyong oras. Pagpahinungod og oras alang sa inyong kaugmaon ug diha sa inyong pamilya. Kon adunay templo nga dili kaayo layo kaninyo, giawhag ko kamo sa pagpangita og paagi sa paghimo og regular nga pakigkita sa Ginoo—moadto sa Iyang balaan nga balay—dayon tumanon kanang pakigkita nga hingpit ug malipayon. Ako mosaad kaninyo nga ang Ginoo mohatag og mga milagro nga Siya nasayod nga inyong gikinahanglan samtang kamo naghimo og mga sakripisyo sa pagserbisyo ug pagsimba diha sa Iyang mga templo.”15
Mga kaigsoonan, kini nga tubag usa ka pagdapit sa pagpunting og balik sa atong mga prayoridad diha sa atong mga kinabuhi ug ilakip ang templo isip usa niini. Ang mga templo sa literal nga paagi mga balay sa Ginoo. Ug kon anaa kita didto, nakapunting sa pagsimba Kaniya ug pagtinguha sa Iyang kahayag ug kamatuoran, kita makabati og lahi nga impresyon nga gibiyaan nato ang yuta, ug ang mingaw ug awaaw nga kalibotan layo ra kaayo gikan sa atong hunahuna. Mobati kita nga hingpit nga nahigawas sa bisan unsa nga daotan nga impluwensya gikan sa kalibotan. Ang mga templo mao ang mga dapit sa pagpadayag, panudlo, ug dangpanan gikan sa espirituhanong mga unos nga atong giatubang sa atong panahon.
Gidapit ko kamo sa paghunahuna og mga paagi sa paghatag og oras alang sa Ginoo diha sa Iyang mga templo. Dali ug ibutang ang inyong mga palas-anon sa atubangan Niya diha sa Iyang balaan nga balay, ug ako mosaad kaninyo nga kamo mapuno uban ang usa ka bag-ong espiritu ug kamasaligon diha sa umaabot. Ang Ginoo mogunit kaninyo, mogakos kaninyo, ug mogiya kaninyo sa matag lakang sa dalan sa paglakaw uban Kaniya. Diha sa templo atong makat-onan ang mga kamatuoran sa kahangtoran ug makadawat og dugang nga kahayag samtang kita mopaduol kang Jesus ug magkat-on kon unsaon sa paglakaw uban Kaniya.
Pagsunod sa mga Pulong sa Atong Buhi nga mga Propeta
Ang ikatulo nga estratehiya nga akong itanyag kaninyo mao ang pagsunod sa mga pulong sa atong buhi nga mga propeta. Mga higala, kita napanalanginan nga magiyahan sa mga propeta, kinsa mga dinasig nga mga tawo nga gitawag sa pagpamulong alang sa Ginoo. Gitawag sila sa pagpahibalo sa kabubut-on sa Dios ug sa Iyang tinuod nga kinaiya pinaagi sa ilang mga pagtulon-an. Kita makasalig kanunay sa buhing mga propeta. Ang ilang mga pagtulon-an nagpakita sa kabubut-on sa Ginoo, kinsa mipahayag, “Ug ang tingog sa pasidaan mahimo ngadto sa tanan nga mga katawhan, pinaagi sa mga ba-ba sa akong mga disipulo, kinsa Ako mipili niini nga kataposan nga mga adlaw” (Doktrina ug mga Pakigsaad 1:4; tan-awa usab sa Doktrina ug mga Pakigsaad 1:38). Diha sa 2 Cronicas sa Daang Tugon, kita makabasa, “Salig kamo sa Ginoo nga inyong Dios ug malig-on kamo. Tuo kamo sa iyang mga propeta ug magmalampuson kamo” (2 Cronicas 20:20).
Ang pagkaadunay buhi nga mga propeta dinhi sa atong panahon mao ang usa ka timaan sa gugma sa Dios alang sa Iyang mga anak. Si Elder Jeffrey R. Holland sa Korum sa Napulog Duha ka mga Apostoles mitandog sa akong kasingkasing diha sa usa ka espesyal kaayo nga paagi sa panahon nga nagkinahanglan ko og kahupayan. Human nako madawat kining hilabihan kadako nga calling nga mahimong usa ka apostol sa Ginoo nga si Jesukristo, si Elder Holland maoy unang tawo nga nanawag kanako. Nakaila dayon ko sa iyang lahi, gamhanang tingog sa pikas tumoy sa linya sa telepono ug mibati ko sa iyang gugma ug sa gugma sa Dios alang kanako. Nakaila ko sa tingog ni Elder Holland isip tingog sa usa sa mga sulugoon sa Manluluwas, ug nakahatag kini kanako og dakong kahupayan ug pagsalig sa usa ka hilabihan nga kahimtang.
Mao kana ang buhaton sa mga propeta ug apostoles. Dili kinahanglan nga kamo adunay personal nga tawag sa telepono gikan sa usa sa mga propeta sa Ginoo aron mabati ang gugma sa Dios alang kaninyo. Inyong mabati ang gugma sa Dios pinaagi lamang sa pagsunod sa ilang mga pagtulon-an. Dapiton ko kamo, akong batan-ong mga higala, sa pag-ila ug paghibalo sa ilang mga tingog ug sa pagsunod sa ilang dinasig nga tambag, nga modala kaninyo ngadto sa kahayag ug kamatuoran. Sila gi-orden sa pagpadayag sa hunahuna ug kasingkasing sa Ginoo. Ang atong labing dako nga kasiguroan anaa sa pagsunod sa pulong sa Ginoo nga gihatag pinaagi sa Iyang mga propeta, ilabi na sa kasamtangang presidente sa Simbahan. Ako mosaad nga samtang kamo maglakaw ug maminaw sa mga propeta ug mga apostoles sa ulahing adlaw, inyong makita ang inyong kaugalingon nga mas maglakaw uban ni Jesus.
Usa ka tinuod nga mahimayaon nga panghitabo sa kasaysayan sa katawhan nga nahitabo sa Betlehem sa Judea mao ang pagkatawo sa atong Manluluwas, si Jesukristo. Ang Iyang pagkatawo, kinabuhi, ug maulaong sakripisyo literal nga nagdala og kahayag ug kamatuoran sa kalibotan. Siya Mismo mipahayag:
“Tan-awa, Ako mao si Jesukristo, kinsa gipamatud-an sa mga propeta nga moanhi sa kalibotan.
“Ug tan-awa, Ako ang kahayag ug ang kinabuhi sa kalibotan” (3 Nephi 11:10–11).
Ganahan ko sa tambag nga gihatag ni apostol Pablo ngadto sa mga Santos nga mga taga Tesalonica: “Kay kamong tanan mga anak sa kahayag ug mga anak sa adlaw; kita dili iya sa kagabhion o sa kangitngit” (1 Mga Taga-Tesalonica 5:5). Isip mga miyembro sa Ang Simbahan ni Jesukristo sa mga Santos sa Ulahing mga Adlaw, mga anak kamo sa kahayag! Kamo adunay kahayag ni Kristo, ingon man usab ang giya sa kahayag nga moabot pinaagi sa gasa sa Espiritu Santo. Kanunay, kanunay og lakaw niana nga kahayag, nga motultol kaninyo ngadto sa kamatuoran ug makapahimo kaninyo sa paglakaw uban ni Jesukristo.
Samtang atong dawaton ang kahayag ug kamatuoran sa Manluluwas, kita makasunod sa Iyang mga tunob ug maminaw sa tingog sa nakasandalyas Niya nga mga tiil ug makakat-on kon unsaon paglakaw uban Kaniya. Ako nag-ampo nga ang matag usa kanato makahimo sa pagpahayag uban sa dakong kalipay, “Ako magalakaw uban ni Jesus,” ug dayon masaligon nga moingon, “Siya magalakaw uban kanako.”16 Ang paglakaw uban Kaniya mao ang dalan nga labing maagian.
Ako nagpamatuod nga si Jesukristo buhi ug ang Iyang hingpit nga gugma gihatag ngadto sa tanan nga moduol ngadto Kaniya. Kanunay siyang naa sa duol, mapailubon nga naghulat kanato kon kita gikapoy sa dalan ug sa walay kataposan naglakaw uban kanato bisan asa kita.
Gikan sa debosyonal nga pakigpulong sa Brigham Young University nga gihatag niadtong Dis. 12, 2022.