Mga Sukaranan sa Ebanghelyo

Ang Espiritu Santo Makatabang Nato

Ang Espiritu Santo mao ang ikatulong sakop sa Dios nga Kapangulohan. Ang mga kasulatan naghisgot usab Kaniya isip ang Espiritu, ang Balaan nga Espiritu, o ang Maghuhupay. Samtang kita magkat-on sa pagpaminaw sa Iyang tingog, Siya mopamatuod ngari nato bahin ni Jesukristo ug motabang nato nga makat-on sa mga kamatuoran sa ebanghelyo.

Sakop sa Dios nga Kapangulohan

Ang Langitnong Amahan, si Jesukristo, ug ang Espiritu Santo mao ang Dios nga Kapangulohan. Sila nahigugma nato ug nagkahiusa sa pagpahinabo sa plano sa kaluwasan. Bisan og ang Langitnong Amahan ug ang Anak adunay mga lawas nga unod ug mga bukog; ang Espiritu Santo wala. Siya usa ka espiritu.

Saksi sa Amahan ug sa Anak

Ang Espiritu Santo “mosaksi sa Amahan ug sa Anak” (2 Nephi 31:18). Kini nagpasabot nga kita makadawat og pagpamatuod sa Langitnong Amahan ug ni Jesukristo pinaagi sa Espiritu Santo.

Nagpamatuod sa Kamatuoran

Ang Espiritu Santo nagpamatuod sa tanang kamatuoran. Siya motabang nato nga makahibalo nga ang ebanghelyo—lakip sa plano sa kaluwasan, sa mga sugo sa Dios, sa Pagpahiuli, ug sa Pag-ula ni Jesukristo—mga tinuod. Siya molig-on sa atong pagpamatuod samtang magpadayon kita sa pag-ampo, pagtuman sa mga sugo, ug pagtuon sa ebanghelyo.

Mogiya ug Manalipod Nato

Ang Espiritu Santo makagiya nato sa atong mga desisyon ug manalipod nato gikan sa pisikal ug espirituhanong kakuyaw. Siya motabang nato sa pagpangita og mga tubag sa atong mga pangutana kon kita mag-ampo ug maningkamot sa paghimo unsay matarong. Siya mogiya nato kanunay “sa pagbuhat og maayo” (Doktrina ug mga Pakigsaad 11:12).

Mohupay Nato

Ang Espiritu Santo usahay gipasabot nga “ang Maglalaban” (Juan 14:26). Siya makapuno nato “sa paglaom ug hingpit nga gugma” (Moroni 8:26) kon kita nabalaka, naguol, o nahadlok. Samtang Siya motabang nato nga mobati sa gugma sa Dios, kita makabuntog sa kadismaya ug malig-on sa atong mga pagsulay.

Ang Gasa sa Espiritu Santo

Human kita mabunyagan, kita modawat sa gasa sa Espiritu Santo pinaagi sa usa ka ordinansa nga gitawag og kompirmasyon. Kon madawat na nato kini nga gasa, kita makabaton sa kanunay nga pagpakig-uban sa Espiritu Santo kon kita magpuyo nga matarong.

Paghulagway pinaagi ni J. Kirk Richards

Unsaon Nato sa Pagkadungog sa Espiritu Santo

Ang Espiritu Santo makigsulti ngadto sa mga tawo sa lain-laing mga paagi. Kini maglakip sa malinawon, makahupay nga mga pagbati o mga pagsabot mahitungod sa unsay isulti o buhaton. Samtang mag-ampo kita alang sa giya ug maminaw sa Iyang mga pag-aghat, kita makakat-on kon sa unsa nga paagi Siya makigsulti nato.

Gikan sa mga Kasulatan

Ang Espiritu Santo motudlo kaninyo sa tanan nga mga butang (tan-awa sa Juan 14:26).

Kamo makahibalo sa kamatuoran pinaagi sa Espiritu Santo (tan-awa sa Moroni 10:5).

Ang Espiritu Santo makapamulong nganha kaninyo diha sa inyong hunahuna ug diha sa inyong kasingkasing (tan-awa sa Doktrina ug mga Pakigsaad 8:2).

Mga Pulong nga Hinumdoman

Plano sa kaluwasan: ang plano sa Dios aron matabangan ang Iyang mga anak nga mahimong sama ug mobalik ngadto Kaniya.

Pagpamatuod: usa ka espirituhanon nga pagsaksi nga ang usa ka butang tinuod.

Ordinansa: usa ka sagrado nga buhat nga gipahigayon pinaagi sa awtoridad sa pagkapari.

Pagkaplag Pa og Dugang

Kon kamo adunay mga pangutana mahitungod sa Espiritu Santo, kamo makatuon sa mga kasulatan, mga pakigpulong sa kinatibuk-ang komperensiya, ug sa ubang mga kapanguhaan diha sa Gospel Library (sa ChurchofJesusChrist.org o sa mobile app). Kamo usab makaistorya sa inyong tigpangalagad nga mga igsoong lalaki o mga igsoong babaye, sa inyong mga lider sa ward o branch, o sa mga misyonaryo.