“Ang Pagbarog pinaagi sa Kinaugalingong Paningkamot Nagpalig-on Kanato,” Liahona, Ago. 2023.
Mga Sukaranan sa Ebanghelyo
Ang Pagbarog pinaagi sa Kinaugalingong Paningkamot Nagpalig-on Kanato
Ang pagkahimong makabarog pinaagi sa kinaugalingong paningkamot nagpasabot nga kita makaatiman sa atong mga panginahanglan ug sa mga panginahanglan sa atong pamilya. Kon kita makabarog pinaagi sa kinaugalingong paningkamot, kita usab mas maayong makaserbisyo sa Ginoo ug makaatiman sa uban. Apan ang pagbarog pinaagi sa kinaugalingong paningkamot wala magpasabot nga kinahanglan natong sagubangon ang atong mga hagit nga mag-inusara. Makapangayo kita og tabang gikan sa mga higala, pamilya, mga miyembro sa ward o branch, ug sa mga propesyonal kon gikinahanglan nato kini.
Mga Baroganan sa Pagbarog Pinaagi sa Kinaugalingong Paningkamot
Ang pagkahimong makabarog pinaagi sa kinaugalingong paningkamot nagkinahanglan og edukasyon, pagkamasulundon, ug kakugi. Buhaton nato ang atong labing maayo sa pag-atiman sa atong kaugalingon, ug kita makapangayo og tabang sa uban kon gikinahanglan. Hinuon, aron mahimong tinud-anay nga makabarog pinaagi sa kinaugalingong paningkamot, kinahanglan usab kitang magkat-on sa pagbaton og hugot nga pagtuo kang Jesukristo. Dayon samtang maningkamot kita sa pagtabang sa atong kaugalingon, Siya molig-on kanato.
Espirituhanon nga Pagbarog pinaagi sa Kinaugalingong Paningkamot
Kita makapalambo sa atong espirituhanon nga pagbarog sa kinaugalingong paningkamot pinaagi sa pagpaningkamot sa pagpalig-on sa atong pagpamatuod ni Jesukristo. Buhaton nato kini samtang kita mag-ampo, magtuon sa mga kasulatan, motambong sa simbahan, motuman sa mga sugo, ug mobuhat sa ubang mga butang nga magpadauol kanato ngadto ni Kristo. Ang pagkahibalo nga Siya andam sa pagtabang kanato mohatag kanato og hugot nga pagtuo nga magpabiling lig-on bisan kon lisod ang kinabuhi.
Temporal nga Pagbarog pinaagi sa Kinaugalingong Paningkamot
Ang temporal nga pagbarog pinaagi sa kinaugalingong paningkamot naglakip sa pag-atiman sa pisikal nga mga panginahanglan sa atong kaugalingon ug sa atong pamilya. Naglakip kini sa pagkaon, balay, panglawas, ug ubang mga panginahanglan. Buhaton nato kini pinaagi sa pagkuha og maayo nga edukasyon, pagkat-on o pagpalambo sa gikinahanglan nga mga kahanas, pagkugi, paggamit sa atong panahon sa maalamon nga paagi, ug sa maayong pagdumala sa atong salapi.
Emosyonal nga Pagbarog pinaagi sa Kinaugalingong Paningkamot
Ang emosyonal nga pagbarog pinaagi sa kinaugalingong paningkamot mao ang abilidad sa pagpahiangay sa emosyonal nga mga hagit sa kaisog ug hugot nga pagtuo. Kitang tanan adunay mga hagit ug mga kapakyasan. Salamat sa ebanghelyo, kita nasayod nga kita makapili kon unsaon sa pagtubag niini. Ang pagtubag inubanan sa hugot nga pagtuo sa Ginoo nagpausbaw sa atong abilidad sa pag-atubang og ubang mga kalisod uban sa dugang nga paglaom.
Edukasyon
Kinahanglan nga kanunay kitang magkat-on. Gusto sa Dios nga kita moedukar sa atong mga hunahuna ug mopalambo sa atong mga kahanas sa tibuok nga kinabuhi ug ngadto sa sunod nga kinabuhi. Kon mas daghan ang atong makat-onan, mas mahimo kitang mas maayo nga impluwensiya alang sa kaayohan ug makasangkap sa atong kaugalingon, sa atong pamilya, ug niadtong nanginahanglan.
Mga Panalangin sa Pagkahimong Makabarog pinaagi sa Kinaugalingong Pningkamot
Ang mga propeta mitudlo nga samtang palamboon nato ang atong pagbarog pinaagi sa kinaugalingong paningkamot, kita mapanalanginan og mas dako nga paglaom ug kalinaw. Kita makahimo sa pagtabang sa atong pamilya ug sa uban nga nanginahanglan. Ug kita mapanalanginan og dugang nga mga kahigayonan ug sa abilidad nga magpadayon sa pag-uswag.
Mga Kapanguhaan sa Simbahan
Ang inyong stake mahimong nagtanyag og mga grupo sa pagbarog pinaagi sa kinaugalingong paningkamot. Kini makatudlo kaninyo sa mga baroganan sa pagbarog pinaagi sa kinaugalingong paningkamot ug sa mga kahanas sama sa pagdumala sa inyong salapi o pagpangita og mas maayo nga trabaho. Makita ninyo ang may kalabotan nga mga kapanguhaan diha sa Gospel Library. Pilia ang “Mga Basahon ug mga Leksiyon” ug dayon ang “Pagbarog sa Kinaugalingong Paningkamot.”