“Puwede ba Nakong Pangayoon Kana nga Libro?,” Liahona, Ago. 2023.
Mga Tingog sa mga Santos sa Ulahing mga Adlaw
Puwede ba Nakong Pangayoon Kana nga Libro?
Ako nagduhaduha sa akong espirituhanong pag-aghat hangtod ang babaye diha sa atbang nako nangutana mahitungod sa Basahon ni Mormon.
Paghulagway pinaagi ni Brian Call
Pagpatalinghog sa tawag sa propeta sa edad nga 19, Akong giandam ang akong kaugalingon sa pagserbisyo og usa ka full-time nga misyon. Sa wala madugay, ako midawat og usa ka tawag ngadto sa Mexico Hermosillo Mission.
Samtang nagpaabot ko sa pagsulod sa missionary training center didto sa Siyudad sa Mexico, nabalaka ko mahitungod kon unsaon nako sa pagpaambit ang ebanghelyo. Naghunahuna ko, “Unsa man ang akong buhaton aron maandam?”
Usa ka buntag sa wala pa mobiya paingon sa trabaho, gisulod nako ang bag-ong kopya sa Basahon ni Mormon sa akong bag. Dayon nag-ampo ko, “Langitnong Amahan, tabangi ako kon unsaon sa paghatag niining Basahon ni Mormon ngadto ni bisan kinsa nga buot Nimong ipadala ngari kanako.” Dayon mipadulong nako sa trabaho.
Paghuman sa trabaho, miadto ako sa institute of religion. Nianang tungora, nakalimtan na nako ang kabahin sa basahon nga naa sa akong bag. Sa dihang misakay na ko sa bus padulong mopauli, milingkod ko tupad sa usa ka batan-on nga babaye nga nagbasa og Biblia.
Gibati nako ang kusog nga pag-aghat nga nag-ingon, “Kini mao ang tawo.” Nagduha-duha ko sa pagbati sa sinugdanan, apan nabati nako kini pag-usab.
“Pasayloa ko,” misulti ko samtang akong gikuha ang akong Basahon ni Mormon, “kini nga basahon espesyal kaayo ngari nako, ug ganahan ko nga ihatag kini diha nimo.”
Uban sa pagtan-aw nga may pagtamay, mitubag siya, “dili, salamat.” Gitudlo ang iyang Biblia, siya midugang, “Kini nga libro igo na para nako.” Dayon mitindog ug mibiya siya, nahabilin ko nga nag-inusara diha sa laray sa mga lingkoranan nga akong gilingkoran.
Samtang naglingkod ko didto sulod sa pila ka gutlo nga mibati nga gisalikway ug gibuang, ang babaye sa akong atbang miliso ug miingon, “tabi, gusto pa ba nimo nga ihatag kana nga libro?”
Klaro kaayo, nga siya ug ang iyang bana nakadungog sa akong panag-istorya uban sa batan-on nga babaye.
“Siyempre!” Mitubag ko.
Samtang nag-istoryahanay kami, akong nahibaloan nga ang magtiayon gusto nga mobasa sa Basahon ni Mormon. Ganahan usab sila nga makahibalo mahitungod sa Simbahan. Mahinamon ko sa pagtubag sa ilang mga pangutana.
Nianang adlawa akong nakat-onan mismo nga “ang umahan puti ug andam na sa pag-ani” kon [kita] adunay tinguha sa pag-alagad sa Ginoo [kita] gitawag ngadto sa buhat” (Doktrina ug mga Pakigsaad 6:3; 4:3).
Ang Dios mihimo gayod kanako nga usa ka instrumento sa Iyang mga kamot. Karon, ang paghimo sa misyonaryo nga buhat mao ang labing gipangga nga butang sa akong kinabuhi.