“Sa Unsang Paagi ang Manluluwas Makapalingkawas Kanako gikan sa mga Pagsulay?” Liahona, Ago. 2023.
Dali, Sunod Kanako
Sa Unsang Paagi ang Manluluwas Makapalingkawas Kanako gikan sa mga Pagsulay?
Paul and the Viper [Pablo ug ang Halas], © Classic Bible Art Collection / lisensyado gikan sa GoodSalt.com
Samtang si Pablo nagbutang og mga igsusugnod diha sa kalayo, “migula ang usa ka halas tungod sa kainit ug mibalikos sa iyang kamot” (Mga Buhat 28:3). Apan siya “[mi]wakli [sa] halas ngadto sa kalayo ug wala gayod siya maunsa” (bersikulo 5). Kitang tanan mag-atubang og mga hagit, mga tintasyon, ug mga kahuyang sa mortalidad, ug sama ni Pablo, inubanan sa hugot nga pagtuo ni Jesukristo ug pinaagi sa pagkamasulundon ngadto sa Iyang mga sugo, kita “makawakli” sa atong mga pagsulay ug makakaplag og kahupayan pinaagi sa pagsalig sa gahom sa Dios sa pagpalingkawas kanato.
Sa Unsang Paagi Ako Makabuntog sa …
Mga Hagit?
“Ang hugot nga pagtuo diha sa Manunubos usa ka baroganan sa paglihok ug gahom. Samtang kita molihok sumala sa mga kamatuoran sa Iyang ebanghelyo, kita mapanalanginan sa espirituwal nga kapasidad sa pagpadayon latas sa mga hagit sa mortalidad samtang makatutok sa hingpit nga mga kalipay nga gidalit kanato sa Manluluwas.”1
Mga Tintasyon?
“Kon moabot ang mga unos sa kinabuhi, mahimo kamong lig-on tungod kay nagbarog kamo diha sa lig-on nga sukaranan sa inyong hugot nga pagtuo kang Jesukristo. Kana nga hugot nga pagtuo mogiya kaninyo ngadto sa inadlaw-adlaw nga paghinulsol ug makanunayon nga pagtuman sa pakigsaad. Dayon kamo kanunayng makahinumdom Kaniya. Ug latas sa mga unos sa kasilag ug kadaotan, mobati kamo nga lig-on ug malaomon.”2
Mga Kahuyang?
“Ang pagtuman sa atong mga pakigsaad motugot sa gahom sa Manluluwas sa paglimpyo kanato samtang kita magkat-on pinaagi sa kasinatian—mahimong usa kini ka gamayng sayop sa paghusga o dakong kapakyasan. Ang atong Manunubos anaa aron mosalo kanato kon kita mahulog kon kita moduol Kaniya.”3