“Sa Dapit Kon Diin Kami Gikinahanglan nga Anaa,” Liahona, Ago. 2023.
Mga Tingog sa mga Santos sa Ulahing mga Adlaw
Sa Dapit Kon Diin Kami Gikinahanglan nga Anaa
Ako mapasalamaton sa Dios nga nagtugot nga kami nangasaag aron among makaplagan ang usa nga nagkinahanglan og direksiyon.
Paghulagway pinaagi ni Brian Call
Ingon og ang tanan gusto og usa ka panimalay nga kapuy-an sa ting-init diha sa alimuot nga baybay sa Iio, Peru, mao nga ang akong misyonaryo nga kompanyon ug ako kanunayng adunay daghang pultahan nga matuktok. Kadaghanan sa among pagpanuktok mahitabo diha sa naglaray nga tagtulo ka andana nga parehas kaayo, 12 ka apartment nga mga gambalay. Dali ra ang masaag.
Usa ka gabii among giplanohan ang pagbisita sa usa babaye nga among nahimamat. Nakuha namo ang iyang sakto nga andana ug numero sa apartment, apan sayop ang among naadtoan nga apartment complex ibabaw gikan kaniya. Mituktok kami, ug sa dihang ang batan-ong lalaki miabli sa pultahan, nakaamgo kami nga sayop ang apartment nga among naadtoan.
Apan sa wala pa kami makapasabot sa among sayop, ang batan-ong lalaki miingon, “Ah, mga elder, maayo nga makita kamo. Ang akong lola miadto sa tindahan, apan mobalik ra siya pipila lang ka minuto. Dayon sa sulod.”
Nagtinan-away nga naglibog, misulod kami ug milingkod sa sofa. Sa dihang ang lola miabot pipila ka minutos ang milabay, nalipay siya nga nakakita kanamo.
Naglibog gihapon, nangutana mi nganong nakaila siya sa mga misyonaryo. Gipasabot niya nga sila nagtudlo kaniya duha na katuig ang milabay, apan sa dihang ang iyang eskedyul na-busy na kaayo, mihunong sila sa pagbisita.
Sa piho kaayo nga gabii kami miabot, mibati siya nga walay pulos. Ang tibuok semana lisod kaayo alang kaniya. Nasobrahan siya sa trabaho ug gikapoy ug mibati nga wala siyay nabuhat nga mahinungdanon. Dayon miabot kami, midan-ag sa iyang adlaw, ug mihatag kaniya og ikaduha nga higayon sa katuyoan sa paghatag sa ebanghelyo ni Jesukristo. Ang among wala damha nga pagbisita mao ang timaan sa Dios ngadto kaniya nga siya importante ngadto Kaniya.
Sayop ang apartment nga among giadtoan, apan kami anaa sa eksakto nga dapit kon diin kami gikinahanglanan nga anaa. Ang among pagkasaag nagdala kanamo nga makaplagan pag-usab kining anak nga babaye sa Dios. Tungod sa among pagkadili hingpit sa pagtultol, ang Dios migiya kanamo ngadto kaniya.
Human sa among pagbiya, among nakit-an ang babaye nga among giplanohan nga bisitahon. Wala gani siya nakabantay nga ulahi na kaming miabot. Naghunahuna ko mahitungod kon unsa kaha ang nahitabo kon amo pang nakit-an ang husto nga apartment sa sinugdanan.
Kon nadayon pa kami sa among giplanohan, nalabyan unta namo ang gikanahanglan kaayo nga kahigayonan sa pagpakigbhin sa gugma sa Manluluwas. Apan ang Dios naglihok pinaagi sa among pagkadili hingpit sa paggiya kanamo asa Niya gikinahanglan nga kami moadto. Ako mapasalamaton nga Siya mitugot nga nasaag kami aron nga among makit-an ang usa nga nagkinahanglan og direksiyon.