“Anaa Siya alang Kanako,” Liahona, Ago. 2023.
Mga Hulagway sa Hugot nga Pagtuo
Anaa Siya alang Kanako
Ang akong namatay na nga asawa ug ako miluhod diha sa usa ka altar sa balaan nga templo, ug sa usa ka tawo nga adunay gahom sa pagselyo mipahayag sa mga panalangin ngari kanamo. Ako misalig niadtong gisaad nga mga panalangin.
Mga litrato pinaagi ni Leslie Nilsson
Samtang diha ko sa simbahan usa ka Dominggo sa buntag niadtong 2013, akong gipalong ang akong telepono tungod kay dili ko gusto nga makabalda kini sa panagtigom alang sa sakramento. Sa dihang nahuman ang miting, akong gi-on og balik ang akong telepono ug nakita nga ang akong asawa, si Tanya, mitawag nako. Misulay ko sa pagtawag niya og balik, apan wala siya motubag.
Atol niana nga miting, ang van nga iyang gisakyan paingon sa usa ka tinuig nga panagtigom nalintuwad sa usa ka dapit didto sa New York Thruway. Ang akong anak nga babaye ug ang akong duha ka apo grabe nga naangol, ug si Tanya namatay diha-diha dayon. Human sa 44 ka tuig nga kaminyoon, ang akong asawa kalit nga nawala.
“Ang hugot nga pagtuo gitawag og gasa sa Dios,” miingon si Brother Evans, “apan kini usab usa ka pagpili nga akong himoon—usa ka pagpili sa pagtuo.”
Paglabay sa upat ka tuig, si Katie, usa sa akong mga umagad nga babaye, napaubos sa usa ka emerhensiya sa C-section aron ipanganak ang kaluhang batang babaye sulod sa 25 ka semana nga pagmabdos, hapit gyod moabot sa dakong kabalaka tungod kay wala pa sa hustong petsa sa pagpanganak. Sa dihang ang mga batang babaye nag-edad pa lang og walo ka semana, si Katie mipauli sa balay nga lawom nang gabii gikan sa iyang matag adlaw nga pagbisita sa neonatal intensive care unit sa ospital ug nabanggaan ug namatay tungod sa usa ka hubog nga drayber, nabiyaan ang akong anak nga lalaki nga usa ka biyodo uban sa unom ka anak.
Ang akong asawa gimahal kaayo nako, ug ang asawa sa akong anak nga lalaki importante ngadto kaniya. Kadto mao ang malisod nga mga panahon sa among pamilya.
Maglaom sa mga Saad
Wala kaayo nako mahatagi og bili kon unsa ka talagsaon si Tanya ug unsa kadako ang akong pagsalig kaniya hangtod nga siya nawala. Apan miluhod kami sa usa ka altar sa balaan nga templo, ug sa usa ka tawo nga adunay gahom sa pagselyo mipahayag sa mga panalangin ngari kanamo. Ako milaom sa saad niadtong mga panalangin. Ako misalig niadtong gisaad nga mga panalangin.
Ang pagkamatay ni Tanya usa ka krisis sa hugot nga pagtuo alang kanako. Kinahanglan ko nga modesisyon, “Motuo ba gayod ako?” Ang hugot nga pagtuo gitawag og gasa sa Dios, apan kini usab usa ka pagpili nga atong himoon—usa ka pagpili sa pagtuo. Ako mipili sa pagtuo, ug akong nasuta nga husto si Moroni sa dihang siya misulti nga kita dili makadawat og pagsaksi hangtod mahuman ang pagsulay sa atong hugot nga pagtuo (tan-awa sa Ether 12:6). Human sa pagsulay, ang pagsaksi moabot. Ang akong hugot nga pagtuo gigantihan og nagpamatuod nga kamalinawon sa hunahuna. Kana mao ang nakapahimo kanako nga mopadayon.
Sama sa gisulti sa akong ikaduha nga asawa si Becky, miingon: “Atong gikinahanglan kaayo ang hugot nga pagtuo kon kita mag-atubang og krisis. Ang pagduol lang gayod sa Ginoo ang bugtong tubag. Mao kini ang dalan ngadto sa pagsagubang ug sa paglaom.”
Si Brother Evans ug ang iyang asawa, si Becky, mipakita og mga litrato sa iyang umagad nga babaye ug sa iyang kaluha nga batang babaye.
Sulod sa usa ka panahon, nanglimbasog ko sa pagsabot kon unsa ang hugot nga pagtuo ug unsa ang paglaom. Si Alma mihulagway sa hugot nga pagtuo isip usa ka “paglaom sa mga butang diin dili makita, diin mga tinuod” (Alma 32:21). Tungod sa akong hugot nga pagtuo diha ni Jesukristo, ako adunay paglaom nga kon ako magpabilin nga magmatinud-anon ug matinuoron sa akong mga pakigsaad, ako makigbahin sa kinabuhing dayon uban ni Tanya. Ako mapasalamaton usab alang sa kasiguroan nga akong naangkon nga ang Manluluwas anaa alang sa matag usa kanato. Adunay kalainan tali sa paghunahuna nga, “Siya Anaa” ug sa pagkaamgo nga, “Anaa Siya alang kanako.”
Ang akong duha ka apo adunay malungtaron nga dili maayo nga mga epekto gikan sa ilang pagkaaksidente sa sakyanan, ug ako nagbangotan pa gihapon sa pagkawala ni Tanya sa akong kinabuhi. Dili gyod mohunong ang akong pagkamingaw kaniya, ug ang gugma nako alang kaniya wala mokunhod tungod sa akong gugma alang sa akong ikaduha nga asawa. Ang gugma midaghan pa.
Ang akong anak nga lalaki naminyo pag-usab. Ang iyang bag-o nga asawa mao ang unang degree nga ig-agaw ni Becky. Kaming duha naminyo ngadto sa samang pamilya. Murag dili katouhan? Talagsaon kaayo kini nga pagkasulagma, o tingali dili.
Mga Hagit ug mga Panalangin
Ang among pamilya adunay daghang hagit, apan amoa usab nasinati ang mga panalangin. Ang akong anak nga lalaki nahimong usa sa akong mga bayani. Iyang gipasaylo ang hubog nga dyaber kinsa nakapatay sa iyang asawa, ug misulti kaniya nga hinaot tarungon na niya ang iyang kinabuhi. Ang iyang duha ka batang babaye bag-o lang nagsaulog sa ilang ikalima nga adlawng natawhan. Sila ang tinuod nga milagro nga mga bata.
“Ako mapasalamaton usab alang sa kasiguroan nga akong naangkon nga ang Manluluwas anaa alang sa matag usa kanato.”
Sulod sa milabay nga 17 ka tuig, ako nakaangkon og kahigayonan sa pagserbisyo isip usa ka patriyarka. Sa sinugdanan, ako nahadlok nga dili ko makatuman sa akong calling, apan akong nakat-onan nga ang mga panalangin maggikan sa Ginoo, dili sa partriyarka. Adunay komon nga mga tema sa patriyarkal nga mga panalangin tungod kay gusto sa atong Langitnong Amahan ang daghan sa samang mga butang alang sa tanan Niyang mga anak, apan ang matag panalangin lahi, indibiduwal, ug personal.
Usa sa mga katuyoan sa usa ka patriyarkal nga panalangi mao ang pagtabang sa indibiduwal nga makita kon si kinsa sila isip mga anak sa Dios ug masabtan kon unsa ka dako ang pagmahal sa Langitnong Amahan kanila. Isip usa ka partriyarka, sa matag higayon nga akong ipandong ang akong mga kamot diha sa ulo sa usa ka tawo aron sa paghatag kanila og usa ka patriyarkal nga panalangin, sulod lang sa pipila ka bililhon nga mga gutlo, ang Langitnong Amahan motugot kanako sa pagbati sa Iyang gugma alang niana nga indibiduwal. Usa kadto ka makapatandog nga pagbati. Kon akong mabati kon unsa ka dako sa Iyang gugma sa matag tawo nga nakadawat sa panalangin, akong mabati nga Siya nahigugma usab kanako.
“Walay makahatag kanako og mas dakong kalipay kay sa mga saad sa templo, nga naghatag kanako og paglaom nga pinaagi ni Kristo, akong mabuntog ang tanan nga mga pagsulay,” miingon si Brother Evans.
Karon, si Becky ug ako nakatutok sa templo. Usa sa mga rason ang atong Ginoo mihatag kanato sa templo mao ang paghatag kanato og usa ka daklit nga paglantaw sa Zion. Agi og dugang sa pagka-patriyarka, ako gidapit pipila na katuig ang milabay sa pagserbisyo isip usa ka tigselyo diha sa templo. Kana nahimong lain nga talagsaong kalipay sa akong kinabuhi. Kini mao ang usa ka calling sa tanang malipayon nga mga okasyon. Walay makahatag kanako og mas dakong kalipay kay sa mga saad sa templo, nga naghatag kanako og paglaom nga pinaagi ni Kristo, akong mabuntog ang tanan nga mga pagsulay,” miingon si Brother Evans.