Atong Personal nga Panaw paingon sa Dios

gamay nga batang lalaki nga mikab-ot ngadto sa iyang inahan samtang ang ubang mga sakop sa pamilya nag-una og lakaw

Minahal nga mga Ginikanan,

Ang atong panaw ngadto sa pagkahingpit, sama sa makita dinhi niini nga isyu, gibiyahe pinaagi sa pagbaton og hugot nga pagtuo sa Langitnong Amahan ug ni Jesukristo, paghinulsol, paghimo ug pagtuman sa sagrado nga mga pakigsaad, ug pagtinguha sa direksiyon sa Dios sa atong mga kinabuhi.

Mga Panaghisgotan sa Ebanghelyo

Atong Pagpangaplag nga Moduol ngadto kang Kristo

Pangutan-a ang inyong mga anak kon unsay buot ipasabot nga moadto sa usa ka pagpangaplag [quest]. Ipakigbahin ang pipila sa mga pagtulon-an gikan sa artikulo ni Elder Neil L. Andersen sa pahina 4 mahitungod sa atong pagpangaplag nga moduol ngadto kang Kristo. Unsa nga mga himan ang makapalig-on kanato niini nga panaw?

Pag-awhag og Kristohanong Paglambo

Hisgoti uban sa inyong mga anak kon unsa nga taas og tagal nga mga tumong nga aduna sila, sama sa panarbaho, misyon, o kaminyoon sa templo. Pagbasa og mga ideya sa mga pahina 14–17. Magkauban, mahimo kamong magplano og pipila ka kalihokan nga makatabang sa inyong mga anak nga makakab-ot sa ilang mga tumong.

Pagpamenos sa Pagkabantang ngadto sa Dili Angay nga Materyal

Gamit ang artikulo sa pahina 8, paghisgot mahitungod sa paglaom nga ang usa ka tawo makahinulsol kon ang usa ka tawo nanglimbasog sa paggamit sa pornograpiya. Paghimo og plano sa pamilya sa pagpamenos sa potensiyal nga pagkabantang ngadto sa dili angay nga materyal diha sa media sama sa telebisyon ug sa internet.

Gikan sa Alang sa Kalig-on sa mga Kabatan-onan nga Magasin

Ang kabatan-onan adunay talagsaon nga tahas diha sa plano sa kaluwasan, ug ang usa ka personal nga paagi sa pagkaplag niini nga tahas mao ang pinaagi sa usa ka patriyarkal nga panalangin. Hunahunaa ang paghisgot sa mga pangutana niini nga pahina sa home evening, ug ipasabot kon sa unsa nga paagi ang balaanon nga giya makatabang sa mga sakop sa pamilya nga makaandam ug makabuntog sa mga hagit sa kinabuhi.

Unsa ang usa ka Patriyarkal nga Panalangin?

Kini nga panalangin nagpahayag sa kaliwat sa usa ka tawo diha sa balay sa Israel ug “naghatag og dinasig nga direksiyon gikan sa Langitnong Amahan,”¹ kasagaran naglakip sa mga saad, mga panalangin, espirituhanon nga mga gasa, ug mga pasidaan nga piho ngadto sa indibidwal. Ihatag kini pinaagi sa usa ka patriyarka human sa pagtugot gikan sa bishop o presidente sa branch.

Kinahanglan Pila ang Akong Pangidaron aron Makapangayo og Patriyarkal nga Panalangin?

“Ang mga lider sa pagkapari kinahanglang dili moestablisar og minimum nga pangidaron sa pagdawat og patriyarkal nga panalangin.”² Ang modawat kinahanglan may igo nga pangidaron aron makaila sa kasagrado niini nga panalangin.

Unsaon Nako sa Pagpangandam?

Pagpaduol ngadto sa Dios pinaagi sa paghinulsol, pagtuon sa mga pagtulon-an sa mga propeta, ug pagsakripisyo sa kalibotanon nga mga butang. Mainampoon nga hunahunaa ang mga pangutana mahitungod sa imong tahas diha sa plano sa Langitnong Amahan, ug palig-ona ang imong tinguha nga mosunod sa Iyang kabubut-on.

Gikan sa Higala nga Magasin

Espesyal nga Isyu kabahin sa Bunyag

Karong bulana, ang Higala mahitungod tanan sa bunyag, kompirmasyon, ug pagkahimong usa ka miyembro sa Ang Simbahan ni Jesukristo sa mga Santos sa Ulahing mga Adlaw! Basaha ang usa ka espesyal nga mensahe gikan sa Unang Kapangulohan, pagkat-on mahitungod sa ubang mga bata nga nabunyagan ug nakompirmahan, ug pagbuhat og mga kalihokan aron sa pagtabang sa inyong anak nga makakat-on mahitungod sa ilang pakigsaad sa bunyag.

Sa pag-order og dugang nga mga kopya niini nga espesyal nga isyu sa umaabot, bisitaha ang store.ChurchofJesusChrist.org.

Dali, Sunod Kanako nga mga Kalihokan sa Online

Niining bulana, pangita og sinemana nga mga kalihokan sa friend.ChurchofJesusChrist.org aron makatabang nga mahimong makalingaw ang inyong pamilya nga pagtuon sa kasulatan.