“Unsa May Akong Mahimo aron sa Pagtabang sa Akong Apo nga Babaye,” Liahona, Ago. 2023.
Nagkatigulang nga Matinud-anon
Unsa May Akong Mahimo aron sa Pagtabang sa Akong Apo nga Babaye?
Nagtinguha ko sa pagsalig sa kabubut-on sa Dios tungod kay si Heather Iya sa Langitnong Amahan sa wala pa siya nahisakop kanamo.
Ang among gamay nga apo nga babaye (tawagon nako siya og Heather) midako nga usa ka malipayon, lagsik nga bata. Siya kanunay nga adunay pahiyom sa iyang nawong. Apan sa dihang nag-edad siya og 12, kanang tanan nausab. Siya nakasinati og tumang kabalaka, usahay mibati og kataranta, ug misugod sa pagpasakit sa iyang kaugalingon. Siya nagpabilin lang sa balay nga wala moeskwela ug mitago sa iyang kwarto.
Ang iyang mga ginikanan mitawag kanako, mibati nga nabalaka og maayo. Naminaw ko ug misabot. Apan gibati nako nga dili husto nga sultihan sila kon unsa ang buhaton. Kini ubos sa ilang tahas isip mga ginikanan. Ang akong trabaho isip usa ka apohan mao ang pagpaminaw ug pagtanyag og mga ideya samtang naghunahuna sila kon unsa ang buhaton.
Nakakaplag sila og medikal nga tabang ug therapy alang kang Heather. Atol sa misunod nga mga bulan, ang iyang pag-uswag medyo hinay. Ang iyang inahan nangandam alang sa online nga pagkat-on tungod kay si Heather daghan na kaayo og palta sa eskwelahan. Si Heather mipadayon sa pagtago sa iyang kaugalingon diha sa iyang kwarto ug sa iyang art.
Unsa may akong mabuhat?
Mag-ampo
Miluhod ko kada adlaw sa pag-ampo alang kang Heather. Nag-ampo kami isip kaparyentehan, apan si Heather mipahimulag gihapon sa iyang kaugalingon. Gusto ko nga ayohon siya og balik sa Dios ngadto sa malipayon nga gamayng bata nga babaye nga siya mao kaniadto.
Samtang nagpadayon ko sa pag-ampo, ang Espiritu nagpahinumdom kanako sa usa ka pagtulon-an ni Presidente Gordon B. Hinckley (1910–2008): “Ayaw kalimti nga kining gagmayng mga bata mga anak nga lalaki ug mga anak nga babaye sa Dios ug ang inyo mao ang temporaryong pag-amuma kanila, nga Siya ang ginikanan sa wala pa kamo mahimong mga ginikanan ug wala Niya biyai ang Iyang katungod o interes isip usa ka ginikanan ngadto sa Iyang gagmayng mga anak.”1
Salig sa Dios
Misugod ko sa pag-ampo alang sa kabubut-on sa Dios, sa Iyang timing, ug sa Iyang direksiyon, dili ang akoa. Gikinahanglan nakong tahoron nga Siya mao ang Amahan sa Langit ni Heather. Nagtinguha ko sa pagpaminaw sa Espiritu, dili lang mag-ampo sa kataranta nga matuman ang akong kabubut-on. Nasayod ako nga Siya moatiman ni Heather. Akong gibasa ug gibasa pag-usab ang 3 Nephi 18:20: “Ug bisan unsa nga kamo mangayo sa Amahan diha sa akong ngalan, nga matarong, magtuo nga kamo makadawat, tan-awa kini ihatag nganha kaninyo.” Ang Langitnong Amahan misaad, mao nga midesisyon ako nga mosalig ako Kaniya.
Gugma
Ang Espiritu nagpahinumdom kanako nga ako ang apohan ug makahigugma ni Heather sa lahi nga paagi kay sa iyang mga ginikanan. Gikinahanglan lang nakong ipakita nga ako nalingaw nga ikauban siya. Nagteksanay mi. Nag-istorya kami kabahin namong duha nga mga anak nga babaye sa Dios, ug kami nagkanaa og mga panag-istoryhanay sa ebanghelyo. Naghimo siya og pipila ka piraso sa art alang lamang kanako. Gigakos nako siya sa matag kahigayonan nga aduna ko. Magkauban kaming nagluto, magkaubang namalit, ug magkaubang nagtan-aw sa iyang paborito nga mga salida.
Paglabay sa mga bulan, milambo siya og gamay. Uban sa tabang sa iyang mama, mitudlo siya og usa ka leksiyon sa Dali, Sunod Kanako sa among videoconference sa pamilya. Sa laing mga higayon mipaambit siya og kasulatan. Nagluto siya og mga biskwit uban sa iyang iyaan ug nakigdula uban sa iyang mga ig-agaw.
Hinay-hinay, ang kinabuhi ni Heather nagsugod sa pagkausab. Nakighigala siya sa usa ka batang babaye diha sa kasilinganan samtang gipalakaw ang iyang iro. Ang iyang mga ginikanan miawhag kaniya nga magpabilin alang sa klase sa Young Women sa Dominggo, dili lang motambong sa panagtigom alang sa sakramento. Nakahimamat siya og usa ka bag-o nga higala diha sa usa ka kalihokan sa kabatan-onan. Samtang gibati ni Heather nga mas lig-on, nakadesisyon siya nga mosulay siya sa pagbalik ngadto sa personal nga pag-eskwela. Maayo ang iyang kalamboan karon sa eskwelahan ug nalingaw sa seminary.
Mga paghulagway pinaagi ni Carolyn Vibbert
Pagmapasalamaton
Sa matag lakang nga gihimo ni Heather, mibati ko og dako kaayo nga pasalamat. Mapasalamaton ko alang sa iyang mga ginikanan, sa iyang kaparyentehan, sa batan-ong mga babaye ug sa ilang mga lider, ug sa usa ka mapahinungoron nga magtutudlo sa seminary. Mopahayag ko sa akong pasalamat alang niini nga mga anghel sa kalibotan sa akong inadlaw-adlaw nga mga pag-ampo.
Ang kinabuhi ni Heather dili hingpit, apan siya nakaangkon og kaalam, kalig-on, ug kaisog pinaagi niini nga pagsulay. Siya usab makaapambit sa iyang malipayon, lagsik nga pahiyom niadtong naglibot kaniya. Siya naglambo ngadto sa usa ka mabungahon, nakatutok sa solusyon nga tin-edyer. Ang Dios mao ang Langitnong Amahan ni Heather ug motabang kaniya nga mahimong ang iyang labing maayo nga kaugalingon. Ang iyang yutan-on nga mga ginikanan madawaton sa Espiritu ug nagtinguha sa paggiya sa iyang kinabuhi uban sa Iyang tabang. Maminaw gihapon ko kon kinahanglan sila nga makig-istorya, ug kanunay akong mopakita og gugma.
Managlahi ang kinabuhi sa matag usa. Ug ang Langitnong Amahan nasayod sa labing maayo nga paagi sa pagpanalangin sa matag usa kanato.
Mapasalamaton ako nga kita adunay kahigayon nga “padayong magtinabangay.”2 Ang mga pagsulay sa pamilya mipanalangin sa akong kinabuhi tungod kay pinaagi niini, ang Langitnong Amahan nagtudlo kanako. “Magpaubos ka; ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo” (Doktrina ug mga Pakigsaad 112:10).
Siya mao ang akong naggiya nga Langitnong Amahan ingon man usab kang Heather.
Ang tagsulat nagpuyo sa Utah, USA.